ក្រសួងការងារបានបញ្ជាក់ថា គម្រោងនេះធ្វើឡើងក្នុងគោលដៅបណ្តុះបណ្តាលកម្លាំងពលកម្មនៅកម្ពុជាឱ្យកាន់តែមានជំនាញ ដើម្បីបំពេញតម្រូវការទីផ្សារការងារទាំងនៅកម្ពុជា និងសាធារណរដ្ឋកូរ៉េ តាមរយៈការពង្រឹងសមត្ថភាពប្រព័ន្ធ TVET នៅវិទ្យាស្ថាន TVET ចំនួន ៣ គឺ វិទ្យាស្ថានជាតិពហុបច្ចេកទេសកម្ពុជា (NPIC) វិទ្យាស្ថានពហុបច្ចេកទេសព្រះកុសុមៈ (PPI) និងវិទ្យាស្ថានបច្ចេកទេសឧស្សាហកម្ម (ITI)។

លោក ហេង សួរ បានសម្តែងនូវការជឿជាក់យ៉ាងមុតមាំថា តាមរយៈកិច្ចសហប្រតិបត្តិការនេះ កម្ពុជានឹងអាចជំរុញការអភិវឌ្ឍមូលធនមនុស្សប្រកបដោយគុណភាពខ្ពស់ស្របតាមស្តង់ដាទីផ្សារការងារទាំងក្នុង និងក្រៅប្រទេស ដែលជាទិសដៅអាទិភាពមួយរបស់រាជរដ្ឋាភិបាល ក៏ដូចជាក្រសួងការងារ និងបណ្តុះបណ្តាលវិជ្ជាជីវៈ។ គម្រោងនេះនឹងផ្តល់អត្ថប្រយោជន៍ដល់សិស្សនិងពលករកម្ពុជា ព្រមទាំងនិយោជកកូរ៉េដែលត្រូវការកម្លាំងពលកម្មដែលមានជំនាញនិងសមត្ថភាពផងដែរ។

សូមជម្រាបជូនថា គម្រោងនេះចាប់ផ្តើមអនុវត្តពីឆ្នាំ ២០២៦ ដល់ឆ្នាំ ២០៣០ គ្របដណ្តប់សកម្មភាពសំខាន់ៗលើការពង្រីកឱកាស ក្នុងការទទួលបានការបណ្តុះបណ្តាលជំនាញ TVET នៅកម្ពុជា លើកកម្ពស់ការយល់ដឹងជាសាធារណៈពី TVET និងពង្រឹងយន្តការគាំទ្រដល់អ្នកសិក្សា។ បន្ថែមពីនេះ គម្រោងនេះក៏ជួយពង្រឹងសមត្ថភាពដល់វិទ្យាស្ថាន TVET ដែលត្រូវបានជ្រើសរើស ស្របតាមតម្រូវការទីផ្សារការងារទាំងនៅក្នុងប្រទេស និងក្រៅប្រទេស ដូចជា ការបង្កើត និងអនុវត្តយន្តការសហប្រតិបត្តិការរវាងឧស្សាហកម្ម និងស្ថាប័នអប់រំ ការធ្វើបច្ចុប្បន្នភាពព័ត៌មានតម្រូវការទីផ្សារការងារជាប្រចាំ ការអភិវឌ្ឍកម្មវិធីសិក្សា និងសម្ភារបង្រៀនផ្អែកលើតម្រូវការ ការពង្រឹងសមត្ថភាពបច្ចេកទេស និងវិធីសាស្ត្របង្រៀនរបស់គ្រូបង្រៀន TVET ការកែលម្អ និងធ្វើទំនើបកម្មបរិក្ខារសិក្សាសម្រាប់ការអនុវត្តជាក់ស្តែង៕

The post ក្រសួងការងារ និង KOICA ចុះហត្ថលេខាលើគម្រោងអភិវឌ្ឍកម្លាំងពលកម្មជំនាញ បំពេញតម្រូវការទីផ្សារការងារទាំងក្នុងនិងក្រៅប្រទេស appeared first on .

កម្មវិធីបណ្ដុះបណ្ដាលទាំងនោះរួមមាន៖(១)-ការកសាងសមត្ថភាពសម្រាប់ក្រសួងយុត្តិធម៌ស្ដីពីការប្រឆាំងការសម្អាតប្រាក់ដោយការអនុវត្តកោសល្យវិច្ច័យឌីជីថលក្នុងព្រះរាជាណាចក្រកម្ពុជា,(២)-ការកសាងសមត្ថភាពស្ដីពីការកាត់បន្ថយការបំភាយឧស្ម័នផ្ទះកញ្ចក់សម្រាប់វិស័យឧស្សាហកម្មនៅក្នុងប្រទេសនៅអាស៊ីបូព៌ា និង(៣)-ការពង្រឹងសមត្ថភាពសម្រាប់ការធ្វើផែនការ និងការអភិវឌ្ឍទីក្រុងប្រកបដោយនិរន្តរភាពនៅកម្ពុជា។

បើតាមKOICAគូសបញ្ជាក់ថាកម្មវិធីសម្រាប់ក្រសួងយុត្តិធម៌ ដោះស្រាយតម្រូវការបន្ទាន់របស់កម្ពុជា ក្នុងការពង្រឹងសមត្ថភាពរបស់ខ្លួនក្នុងការប្រយុទ្ធប្រឆាំងនឹងឧក្រិដ្ឋកម្មដែលកំពុងកើតមាន ដោយផ្តោតលើបច្ចេកទេសកោសល្យវិច្ច័យឌីជីថល ដើម្បីបង្កើនការស៊ើបអង្កេត ការកាត់ទោស និងកិច្ចសហប្រតិបត្តិការអន្តរជាតិ។

ទន្ទឹមនឹងនេះ កម្មវិធីកាត់បន្ថយឧស្ម័នផ្ទះកញ្ចក់សម្រាប់ប្រទេស កម្ពុជា ឡាវ មីយ៉ាន់ម៉ា វៀតណាម និងថៃ និងកម្មវិធីបណ្តុះបណ្តាលលើការរៀបចំផែនការទីក្រុងនិរន្តរភាព ត្រូវបានរៀបចំឡើងដើម្បីគាំទ្រចំនុចអាទិភាពរបស់កម្ពុជាក្នុងការគ្រប់គ្រងបរិស្ថាន និងការអភិវឌ្ឍប្រកបដោយនិរន្តរភាព ហើយត្រូវបានរំពឹងថានឹងរួមចំណែកដល់ការកសាងសមត្ថភាពស្ថាប័ននៅក្នុងវិស័យសំខាន់ៗទាំងនេះ។

លោក ហ៊ត ស្រ៊ឺ អ្នកជំនាញការជាន់ខ្ពស់ប្រចាំការិយាល័យកយកាប្រចាំនៅប្រទេសកម្ពុជាយល់ឃើញថាកម្មវិធីទាំងនេះឆ្លុះបញ្ចាំងពីចំណងមិត្តភាពដ៏យូរអង្វែងរវាងប្រទេសកូរ៉េ និងកម្ពុជា ព្រមទាំងគាំទ្រដល់កិច្ចខិតខំប្រឹងប្រែងអភិវឌ្ឍន៍ជាតិរបស់ប្រទេសកម្ពុជា៕

The post ទីភ្នាក់ងារ KOICA ពង្រីកកម្មវិធីកសាងសមត្ថភាពនៅកម្ពុជាលើវិស័យយុត្តិធម៌ បរិស្ថាន និងការអភិវឌ្ឍទីក្រុង appeared first on .

លោកស្រី Moonjung Choi នាយិកា KOICA ប្រចាំប្រទេសកម្ពុជា បានមានប្រសាសន៍ថា “KOICA ពិតជាមានមោទនភាពយ៉ាងខ្លាំងដែលបានចាប់ដៃគូជាមួយក្រសួងអប់រំ យុវជន និងកីឡា លើគម្រោងដ៏សំខាន់នេះ។ ការសាទរ និងទេពកោសល្យដែលបានបង្ហាញនៅក្នុងពិព័រណ៍បច្ចេកវិទ្យាព័ត៌មាន និងសារគមនាគមន៍ រួមជាមួយនឹងការប្តេជ្ញាចិត្តដែលឃើញនៅក្នុងសិក្ខាសាលាអភិវឌ្ឍន៍វិជ្ជាជីវៈជាប្រចាំនេះ ពិតជាបានគូសបញ្ជាក់ពីសក្តានុពលរបស់កម្ពុជានៅក្នុងយុគសម័យឌីជីថល។ យើងប្តេជ្ញាគាំទ្រការរីកចម្រើនប្រកបដោយនិរន្តរភាពនៃការអប់រំបច្ចេកវិទ្យាព័ត៌មាន និងសារគមនាគមន៍ ដើម្បីផ្តល់ឱកាសដល់ទាំងសិស្សានុសិស្ស និងលោកគ្រូ អ្នកគ្រូសម្រាប់អនាគតដ៏ភ្លឺស្វាង”។

លោក ហង់ ជួនណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានមានប្រសាសន៍ថា “ពិព័រណ៍បច្ចេកវិទ្យាព័ត៌មាន និងសារគមនាគមន៍ ព្រមទាំងសិក្ខាសាលាអភិវឌ្ឍន៍វិជ្ជាជីវៈជាប្រចាំនេះ គឺជាសក្ខីភាពនៃការប្តេជ្ញាចិត្តដ៏មុតមាំរបស់យើងក្នុងការលើកកម្ពស់ការអប់រំបច្ចេកវិទ្យាព័ត៌មាន និងសារគមនាគមន៍នៅទូទាំងប្រទេសកម្ពុជា។ ការបានឃើញភាពច្នៃប្រឌិត និងការប្តេជ្ញាចិត្តរបស់សិស្សានុសិស្ស និងអ្នកអប់រំវ័យក្មេងរបស់យើង ពិតជាជួយក្នុងការជំរុញទឹកចិត្តដល់យើងទាំងអស់គ្នាខ្លាំងណាស់។ គំនិតផ្តួចផ្តើមទាំងនេះមានសារៈសំខាន់ណាស់សម្រាប់ការបំពាក់ជំនាញសំខាន់ៗសម្រាប់សតវត្សរ៍ទី ២១ ដល់សិស្សានុសិស្សរបស់យើង ក៏ដូចជាធានាថាគ្រូបង្រៀនរបស់យើងនៅតែឈានមុខគេក្នុងឧត្តមភាពអប់រំ”។

គួរជម្រាបជូនផងដែរថា ពិព័រណ៍បច្ចេកវិទ្យាព័ត៌មាននិងសារគមនាគមន៍គឺជាចំណុចសំខាន់មួយនៅក្នុងគម្រោងការពង្រឹងសមត្ថភាពបច្ចេកវិទ្យាព័ត៌មាននិងសារគមនាគមន៍អោយកាន់តែទូលំទូលាយ ក្រោមការអនុវត្តរួមគ្នារវាង KOICA និងក្រសួងអប់រំ យុវជន និងកីឡា។ ចាប់តាំងពីការចាប់ផ្តើមគម្រោងនៅឆ្នាំ ២០២១មក គម្រោងនេះបានរួមចំណែកយ៉ាងសំខាន់ក្នុងការលើកកម្ពស់ការអប់រំឌីជីថលនៅទូទាំងប្រទេស។ រហូតមកដល់បច្ចុប្បន្នគម្រោងនេះបានបង្កើតបរិយាកាសសិក្សាឌីជីថលដែលកាន់តែមានភាពសកម្ម និងបរិយាប័ន្នតាមរយៈការបង្កើតបន្ទប់ ICT នៅមជ្ឈមណ្ឌលគរុកោសល្យភូមិភាគទាំង៤ និងសាលាឈានមុខបច្ចេកវិទ្យាព័ត៌មាន និងសារគមនាគមន៍ចំនួន២០៕

The post ក្រសួងអប់រំនិង KOICA រួមគ្នាលើកកម្ពស់ការអប់រំបច្ចេកវិទ្យាព័ត៌មាន និងសារគមនាគមន៍នៅទូទាំងកម្ពុជា appeared first on .

លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៍ថា “គម្រោងក្នុងភាពជាដៃគូ ជាមួយ ទីភ្នាក់ងារកយកា នេះនឹងផ្តល់ការពង្រឹងសមត្តិភាពដល់មន្ត្រីកសិកម្មឃុំរបស់យើងនូវជំនាញ និងចំណេះដឹងចាំបាច់ ដើម្បីគាំទ្រកសិករក្នុងការទទួលយកការអនុវត្តកសិកម្មក្នុងការប្រើប្រាស់ធាតុចូលកសិកម្មត្រឹមត្រូវតាមបច្ចេកទេស”។

លោកស្រី Choi Moonjung នាយិកាប្រចាំប្រទេសនៃការិយាល័យកយកា ប្រចាំកម្ពុជា បានសង្កត់ធ្ងន់លើការប្តេជ្ញាចិត្តរបស់ ទីភ្នាក់ងាកយកាក្នុងការគាំទ្រដល់គោលដៅអភិវឌ្ឍន៍ប្រកបដោយចីរភាពរបស់កម្ពុជា។ លោកស្រី មានប្រសាសន៍ថាទីភ្នាក់ងាកយកាប្តេជ្ញាចិត្តធ្វើការរួមគ្នាជាមួយរដ្ឋាភិបាលកម្ពុជា ដើម្បីកសាងវិស័យកសិកម្មដែលមានភាពធន់ និងវិបុលភាព។

ភាពជោគជ័យនៃការអនុវត្តគម្រោងនេះត្រូវបានគេរំពឹងថានឹងនាំទៅដល់ការបង្កើនផលិតភាពកសិកម្ម ការលើកកម្ពស់ជីវភាពប្រជាកសិករ និងការពង្រឹងភាពធន់នឹងផលប៉ះពាល់នៃការប្រែប្រួលអាកាសធាតុនៅកម្ពុជា។

គម្រោងសំខាន់នេះ ត្រូវបានផ្ថល់ដោយទីភ្នាក់ងារកយកាក្រោមជំនួយឥតសំណងប្រមាណ១២លានដុល្លា។ចាប់ពីឆ្នាំ២០២៥ ដល់ឆ្នាំ២០៣០ គម្រោងនេះមានគោលបំណងបង្កើតផ្នែកផ្សព្វផ្សាយកសិកម្មចម្រុះដោយមានការរួមគ្នារវាង ការអប់រំ ការស្រាវជ្រាវ និងការផ្សព្វផ្សាយដោយផ្តោតលើការបន្សាំទៅនឹងការប្រែប្រួលអាកាសធាតុ។

សមាសធាតុសំខាន់ៗនៃគម្រោងរួមមានការពង្រឹងសមត្ថភាពមន្ត្រីកសិកម្មឃុំ ដែលជាតួអង្គយ៉ាងសំខាន់ ដើរតួនាទីក្នុងការផ្សព្វផ្សាយចំណេះដឹង និងបច្ចេកទេសការអនុវត្តកសិកម្ម ទៅដល់កសិករនៅថ្នាក់មូលដ្ឋាន។ គម្រោងនេះ នឹងគាំទ្រសម្ភារៈបរិក្ខារអប់រំនៅសាកលវិទ្យាល័យភូមិន្ទកសិកម្ម រួមទាំងអគារសម្រាប់ការអប់រំកម្រិតឧត្តមសិក្សា និងអគារមួយផ្សេងទៀតសម្រាប់ការបង្កើនសមត្ថភាព មន្រ្តីកសិកម្មឃុំ ។

កម្មវិធីសិក្សា បរិក្ខារ ព្រមទាំងសម្ភារៈអប់រំ និងបណ្តុះបណ្តាលក៏នឹងត្រូវបានផ្តល់ជូនផងដែរ។ លើសពីនេះទៀត សមត្ថភាពរបស់សាស្ត្រាចារ្យនឹងត្រូវបានលើកកម្ពស់តាមរយៈកម្មវិធីបណ្តុះបណ្តាលក្រៅប្រទេស និងការបណ្តុះបណ្តាលនៅក្នុងប្រទេស៕SL

The post កម្ពុជា-កូរ៉េ បង្ហាញការប្តេជ្ញារួមគ្នាលើកកម្ពស់កសិកម្មដែលធន់នឹងអាកាសធាតុ appeared first on .

គម្រោងជំរុញកំណែទម្រង់អភិបាលកិច្ចនៅកម្ពុជាពីឆ្នាំ២០២៥ ដល់ឆ្នាំ២០២៩នេះមានគោលបំណងលើកកម្ពស់ប្រសិទ្ធភាព និងប្រសិទ្ធផលនៃរដ្ឋបាលសាធារណៈរបស់កម្ពុជាតាមរយៈការកសាងសេវាសាធារណៈប្រកបដោយវិជ្ជាជីវៈ គណនេយ្យភាព និងត្រៀមខ្លួនជាស្រេចនាពេលអនាគត។

គួររំលឹកថា៖ ថ្មីៗនេះទីភ្នាក់ងារទីភ្នាក់ងារសហប្រតិបត្តិការអន្តរជាតិកូរ៉េ និងក្រសួងមុខងារសាធារណៈនៃរាជ រដ្ឋាភិបាលកម្ពុជាបានផ្លាស់ប្តូរកំណត់ហេតុនៃកិច្ចពិភាក្សា(RD)ជាផ្លូវការសម្រាប់គម្រោងស្តីពីការពង្រឹងសមត្ថភាពសាលាភូមិន្ទរដ្ឋបាល(RSA)សម្រាប់កំណែទម្រង់អភិបាលកិច្ចនិងការពង្រឹងកម្ពុជា។

គម្រោងនេះត្រូវបានតម្រឹមជាយុទ្ធសាស្ត្រ ជាមួយនឹងយុទ្ធសាស្ត្របញ្ចកោណ ដំណាក់កាលទី ១ (២០២៤-២០២៨)និងចក្ខុវិស័យរយៈពេលវែង២០៥០ ជាពិសេស វារួមចំណែកដោយផ្ទាល់ដល់អាទិភាពជាតិនៃការអភិវឌ្ឍមូលធនមនុស្ស និងការអភិវឌ្ឍសេដ្ឋកិច្ចឌីជីថល និងសង្គម គាំទ្រដល់មហិច្ឆតារបស់រដ្ឋាភិបាលក្នុងការធ្វើទំនើបកម្ម ការផ្តល់សេវាសាធារណៈ និងជំរុញអភិបាលកិច្ចល្អ។

គំនិតផ្តួចផ្តើមគម្រោងនេះ រួមមាន ការបង្កើតកម្មវិធីសិក្សាជាតិសម្រាប់មន្ត្រីរាជការ ដែលគាំទ្រដោយការសាងសង់មជ្ឈមណ្ឌលសិក្សាថ្មី និងការបង្កើតវេទិកាអប់រំឌីជីថល ដែលអាចប្រើប្រាស់បានដល់មន្ត្រីរាជការទាំងអស់នៅទូទាំងប្រទេស។ គួរកត់សម្គាល់ថា គម្រោងនេះនឹងបង្កើតកម្មវិធីសិក្សា និងខ្លឹមសារបណ្តុះបណ្តាលលម្អិតសម្រាប់ការអប់រំបច្ចេកវិទ្យាគមនាគមន៍ ព័ត៌មានវិទ្យាICT សមស្របទៅនឹងតម្រូវការវិវត្តនៃរដ្ឋាភិបាលឌីជីថល។ កម្មវិធីនេះនឹងលើកកម្ពស់សមត្ថភាពរបស់មន្ត្រីរាជការក្នុងការប្រើប្រាស់ឧបករណ៍ និងប្រព័ន្ធឌីជីថលក្នុងការងារប្រចាំថ្ងៃរបស់ពួកគេ។

តាមរយៈវេទិកាអនឡាញមន្ត្រីសាធារណៈទូទាំងប្រទេស មិនថាទីតាំងរបស់ពួកគេនៅទីណាក៏ដោយ ពួកគេនឹងមានលទ្ធភាពទទួលបានមាតិកាបណ្តុះបណ្តាលដែលមានគុណភាពខ្ពស់។ តាមរយៈការជម្នះឧបសគ្គនៃហេដ្ឋារចនាសម្ព័ន្ធ រូបវន្ត និងធនធានគ្រូមានកម្រិត គម្រោងនេះធានានូវឱកាសសិក្សាដែលរួមបញ្ចូល និងបន្ត និងរួមចំណែកដល់ការពង្រឹងសមត្ថភាពរដ្ឋបាលជាតិរយៈពេលវែង៕

The post រដ្ឋាភិបាលកូរ៉េ ប្រកាសអនុវត្តគម្រោងជាង១១លានដុល្លារ ជំរុញកំណែទម្រង់អភិបាលកិច្ចនៅកម្ពុជា appeared first on .

លោកបណ្ឌិត ម៉ៅ ហាវណ្ណាល់ រដ្ឋមន្ត្រី ទទួលបន្ទុក រដ្ឋលេខាធិការដ្ឋានអាកាសចរណ៍ស៊ីវិលកម្ពុជា មានប្រសាសន៍ថា “ការពង្រឹងប្រព័ន្ធបណ្តុះបណ្តាលរបស់ NICA យើងបាននិងកំពុងវិនិយោគលើអនាគតនៃអ្នកជំនាញអាកាសចរណ៍របស់យើង និងធានាថាពួកគេត្រូវបានបំពាក់ដោយជំនាញចាំបាច់ដើម្បីឆ្លើយតបទៅនឹងបញ្ហាប្រឈមនានា។ យើងខ្ញុំសូមថ្លែងអំណរគុណយ៉ាងជ្រាលជ្រៅចំពោះការគាំទ្រ និងភាពជាដៃគូដ៏សប្បុរសរបស់ ទីភ្នាក់ងារ KOICA”។

គម្រោងដែលមានថវិកាសរុបចំនួន១២លានដុល្លារដែលជាជំនួយឥតសំណងរបស់កូរ៉េ នឹងត្រូវបានអនុវត្តចាប់ពីឆ្នាំ២០២៥ដល់ឆ្នាំ ២០២៩ដោយមានធាតុផ្សំសំខាន់ៗដូចជា ៖១) ការអភិវឌ្ឍន៍កម្មវិធីសិក្សា, ការធ្វើទំនើបកម្ម និងធ្វើបច្ចុប្បន្នភាពកម្មវិធីសិក្សាបណ្តុះបណ្តាលឱ្យស្របតាមស្តង់ដារអន្តរជាតិ និងការអនុវត្តល្អបំផុត។ ២) ការបណ្តុះបណ្តាលគ្រូ, ពង្រឹងជំនាញបច្ចេកទេសរបស់គ្រូនៅ NICA ។ ៣)ការកែលម្អហេដ្ឋារចនាសម្ព័ន្ធ, ការធ្វើឱ្យប្រសើរឡើងនូវកន្លែងបណ្តុះបណ្តាល និងការផ្តល់ឧបករណ៍ទំនើបៗ។ ៤) ការកសាងសមត្ថភាព, ការពង្រឹងសមត្ថភាពស្ថាប័នរបស់ NICA ក្នុងការគ្រប់គ្រង និងផ្តល់កម្មវិធីបណ្តុះបណ្តាលប្រកបដោយប្រសិទ្ធភាពនិង ៥) ការផ្តល់អ្នកជំនាញ, អ្នកជំនាញកូរ៉េនឹងត្រូវបានបញ្ជូនដើម្បីជួយសម្រួលដល់ការអភិវឌ្ឍន៍ប្រព័ន្ធបណ្តុះបណ្តាល នឹងចែករំលែកចំណេះដឹង និងបទពិសោធន៍។

លោកស្រី Choi Moonjung នាយិកាប្រចាំប្រទេសនៃការិយាល័យ KOICA ប្រចាំកម្ពុជាបានមានប្រសាសន៍គូសបញ្ជាក់ថា “គម្រោងនេះនឹងដើរតួយ៉ាងសំខាន់ក្នុងការអភិវឌ្ឍកម្លាំងពលកម្មជំនាញសម្រាប់វិស័យអាកាសចរណ៍ស៊ីវិល ដែលរួមចំណែកដល់កំណើន និងវិបុលភាពនៃប្រទេសកម្ពុជាទាំងមូល។ យើងមានមោទនភាពក្នុងការធ្វើជាដៃគូជាមួយ SSCA និង NICA លើគំនិតផ្តួចផ្តើមដ៏សំខាន់នេះ។

គម្រោងនេះត្រូវបានគេរំពឹងថានឹងមានឥទ្ធិពលយ៉ាងសំខាន់ទៅលើសុវត្ថិភាព ប្រសិទ្ធភាព និងនិរន្តរភាពនៃវិស័យអាកាសចរណ៍ស៊ីវិលរបស់កម្ពុជា។ តាមរយៈការវិនិយោគលើការអភិវឌ្ឍន៍ធនធានមនុស្ស គម្រោងនេះនឹងរួមចំណែកដល់កំណើនរយៈពេលវែងនៃឧស្សាហកម្មនេះ និងលើកកំពស់កម្ពុជាឲ្យក្លាយជាមជ្ឈមណ្ឌលអាកាសចរណ៍ក្នុងតំបន់”៕SL

The post រដ្ឋលេខាធិការដ្ឋានអាកាសចរស៊ីវិលចុះ MOUជាមួយ KOICA ដើម្បីពង្រឹងវិស័យអាកាសចរណ៍នៅកម្ពុជា appeared first on .

ការប្រកាសនេះធ្វើឡើងក្នុងអំឡុងពេលកិច្ចប្រជុំបូកសរុប សម្រាប់ការសិក្សាស៊ីជម្រៅនៃគម្រោងដែលធ្វើឡើងនៅសាលាភូមិន្ទរដ្ឋបាល រវាងលោកស្រី Shin Jungyeon នាយកស្តីទីនៃការិយាល័យ KOICAកម្ពុជា និងឯកឧត្តម ហ៊ុនម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈកាលថ្មីៗនេះ។

ក្នុងឱកាសនោះដែរ, ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ  បានលើកឡើងពីវិធានការសំខាន់ៗនៃកំណែទម្រង់រដ្ឋបាលសាធារណៈរបស់កម្ពុជា រួមមាន ការអនុវត្តប្រព័ន្ធជ្រើសរើសមន្ត្រីរាជការ ការកសាងសមត្ថភាពស្ថាប័ន និងប្រព័ន្ធលើកទឹកចិត្ត។

ឯកឧត្តម បានកត់សម្គាល់ថា ការដាក់ឱ្យដំណើរការទាន់ពេលវេលារបស់គម្រោង KOICA ឆ្លុះបញ្ចាំងពីសារៈសំខាន់របស់ខ្លួនក្នុងការគាំទ្រដល់គោលដៅយុទ្ធសាស្ត្ររបស់រដ្ឋាភិបាល។ គម្រោងនេះ ផ្តោតសំខាន់លើការពង្រឹងសមត្ថភាពប្រតិបត្តិការ តាមរយៈការផ្តល់សេវាពិគ្រោះយោបល់លើប្រព័ន្ធជ្រើសរើសមន្ត្រីរាជការ និងប្រព័ន្ធបណ្តុះបណ្តាល ដោយផ្តោតជាពិសេសលើការគាំទ្រដល់ការកសាងសមត្ថភាពសម្រាប់ការប្រើបច្ចេកវិទ្យាព័ត៌មាន និងសារគមនាគមន៍  ក្នុងវិស័យអប់រំ។ លើសពីនេះទៀត ការបង្កើតវេទិកាអប់រំតាមប្រព័ន្ធអ៊ីនធឺណែត នឹងធ្វើឱ្យមន្ត្រីរាជការអាចទទួលបានការបណ្តុះបណ្តាលទាំងតាមប្រព័ន្ធអ៊ីនធឺណិត និងក្រៅប្រព័ន្ធដែលរួមចំណែកដល់គោលដៅរបស់ សាលាភូមិន្ទរដ្ឋបាល ក្នុងការបង្កើនចំនួនមន្ត្រីរាជការដែលបានទទួលការបណ្តុះបណ្តាលប្រចាំឆ្នាំ។

តាមរយៈការបង្កើតវេទិកាអប់រំតាមអ៊ីនធឺណិត និងការពង្រឹងការប្រើបច្ចេកវិទ្យាព័ត៌មាន និងសារគមនាគមន៍ ក្នុងវិស័យអប់រំសម្រាប់មន្ត្រីរាជការគម្រោងនេះក៏នឹងគាំទ្រដល់វិស័យអាទិភាពរបស់រដ្ឋាភិបាលកម្ពុជានៃការធ្វើបរិវត្តកម្មឌីជីថល ឬ Digital Transformationក្នុងការគ្រប់គ្រងសាធារណៈ។ គំនិតផ្តួចផ្តើមនេះស្របតាមកិច្ចខិតខំប្រឹងប្រែងរបស់រដ្ឋាភិបាលក្នុងការធ្វើទំនើបកម្មប្រតិបត្តិការ និងបង្កើតសេវាសាធារណៈ ដែលដំណើរការដោយបច្ចេកវិទ្យាកាន់តែមានប្រសិទ្ធភាព។

គួរកត់សម្គាល់ថា KOICA បានធ្វើការសិក្សាលទ្ធភាពដំបូងសម្រាប់គម្រោងដែលបានរៀបរាប់ខាងលើ ក្នុងខែធ្នូ ឆ្នាំ២០២៣។ ការសិក្សាលទ្ធភាពទទួលបានលទ្ធផលវិជ្ជមាន ដែលនាំឱ្យ KOICA អនុម័តលើការអភិវឌ្ឍន៍គម្រោងចំនួន១១,៧ លានដុល្លារសម្រាប់រយៈពេល៥ឆ្នាំ ចាប់ពីឆ្នាំ២០២៥ដល់ឆ្នាំ២០២៩៕ SL

The post KOICA សន្យាផ្តល់ហិរញ្ញប្បទានជាង ១១លានដុល្លារសម្រាប់កំណែទម្រង់អភិបាលកិច្ច និងការកសាងសមត្ថភាពនៅសាលាភូមិន្ទរដ្ឋបាលកម្ពុជា appeared first on .

បើតាម (កយកា-KOICA) បញ្ជាក់ថា«បន្ទាប់ពីការបង្កើតឡើងដំបូងក្នុងឆ្នាំ១៩៩១ ក្រោមក្រសួងការបរទេស KOICA បានចាប់ផ្តើមកម្មវិធីកិច្ចសហប្រតិបត្តិការជាមួយនឹងការផ្តល់ឧបករណ៍នៅក្នុងប្រទេសកម្ពុជា។ KOICA បានពង្រីក និងធ្វើពិពិធកម្មទម្រង់ជំនួយដល់កម្មវិធីពង្រឹងសមត្ថភាព កម្មវិធីភាពជាដៃគូសាធារណៈ និងឯកជន គម្រោងភាពជាដៃគូប្រទេស និងកម្មវិធីបញ្ជូនអ្នកស្ម័គ្រចិត្ត។ ជាច្រើនឆ្នាំមកនេះ KOICA បានជួយគាំទ្រដល់រាជរដ្ឋាភិបាលកម្ពុជា និងប្រជាជនតាមរយៈកម្មវិធីផ្សេងៗ ដែលមានតម្លៃប្រហែល ៣៦៦,៥ លានដុល្លារអាមេរិក»។

គម្រោងដែលលេចធ្លោជាងគេនៅក្នុងរាជធានីនៃប្រទេសកម្ពុជា គឺមន្ទីរពេទ្យព្រះអង្គឌួង។ កយកា-KOICA បានសាងសង់ទាំងមជ្ឈមណ្ឌលចក្ខុរោគមិត្តភាពកម្ពុជា-កូរ៉េ និង អគារមជ្ឈមណ្ឌលត្រចៀក ច្រមុះ បំពង់ក ក្នុងមន្ទីរពេទ្យព្រះអង្គឌួង។ ប្រជាជនកម្ពុជាហៅ មន្ទីរពេទ្យព្រះអង្គឌួងថាជា មន្ទីរពេទ្យកូរ៉េ។ ជាមួយនឹងអគារថ្មី និងបរិក្ខារពេទ្យទំនើបៗ ឥឡូវនេះមន្ទីរពេទ្យព្រះអង្គឌួង អាចធ្វើរោគវិនិច្ឆ័យ និងព្យាបាលអ្នកជំងឺដែលមកពីគ្រប់ខេត្តបានប្រសើរជាងមុន រួមទាំងប្រតិបត្តិការវះកាត់ដែលពិបាករកបាន មុនពេលមានគម្រោងរបស់កយកា។

មានមន្ត្រីរដ្ឋាភិបាលកម្ពុជាជាង ៣៥២៩នាក់ ដែលត្រូវបានអញ្ជើញទៅប្រទេសកូរ៉េ និងចូលរួមក្នុងកម្មវិធីបណ្តុះបណ្តាល រួមទាំងកម្មវិធីអាហារូបករណ៍ដែលផ្តល់មូលនិធិពេញលេញផងដែរ។ អតីតនិស្សិត និងកម្មសិក្សាការី នៃកម្មវិធីបណ្តុះបណ្តាលរបស់កយកា-KOICA ដែលហៅថា សមាគមអតីតកម្មសិក្សាការីកម្ពុជា-កូរ៉េ (CAMKAA) មានភាពសកម្មក្នុងការផ្សព្វផ្សាយចំណេះដឹងដែលទទួលបានពីការបណ្តុះបណ្តាល និងក្នុងការអនុវត្តសកម្មភាពសង្គមនៅតាមបណ្តាខេត្ត។ ក្រៅពីនេះ KOICA បានបញ្ជូនអ្នកស្ម័គ្រចិត្ត និងអ្នកជំនាញជាង ៨៩២នាក់ ទៅកាន់បណ្តាខេត្តនានា ក្នុងវិស័យដូចជា សុខាភិបាល និងការអប់រំ ជាពិសេសសម្រាប់ភាសា(កូរ៉េ)/បច្ចេកវិទ្យាព័ត៌មាន និងទូរគមនាគមន៍ (ICT) /កុមារតូច(មត្តេយ្យ)/តន្ត្រី/ការអប់រំកាយ រួមទាំងការបណ្តុះបណ្តាលតេក្វាន់ដូផងដែរ។ ពីរាជធានីទៅគ្រប់ខេត្តទាំងអស់ មានស្លាកសញ្ញា និងកេរ្តិ៍ដំណែលអ្នកស្ម័គ្រចិត្ដរបស់កយកា-KOICAនៅគ្រប់ទីកន្លែង។

សម្រាប់ការអភិវឌ្ឍន៍សេដ្ឋកិច្ចសង្គមរបស់កម្ពុជា កយកាបានសហការជាដៃគូយុទ្ធសាស្ត្រជាមួយសហគ្រាសកូរ៉េ និងអង្គការក្រៅរដ្ឋាភិបាលដែលមានមូលដ្ឋាននៅក្នុងប្រទេសកម្ពុជាផងដែរ។ ក្រុមហ៊ុន Hesed Agriculture Trading Co., Ltd. ដែលជាសហគ្រាសសង្គមអាជីវកម្មកសិកម្ម គាំទ្រកសិករក្នុងខេត្តកំពង់ស្ពឺ និងកំពង់ឆ្នាំង ដើម្បីផលិតផលិតផលស្ករត្នោតធម្មជាតិ។ Good Neighbours ដែលជាអង្គការក្រៅរដ្ឋាភិបាលដ៏សកម្មនៅទូទាំងប្រទេសកម្ពុជា បានធ្វើការបណ្តុះបណ្តាលអ្នករត់រ៉ឺម៉កកង់បីក្នុងខណ្ឌដង្កោ ឱ្យមានស្ថិរភាពហិរញ្ញវត្ថុ និងឯករាជ្យ ព្រមទាំងគាំទ្រវិទ្យាស្ថានអប់រំបណ្តុះបណ្តាលបច្ចេកទេស និងវិជ្ជាជីវៈ ក្នុងខេត្តបាត់ដំបង ឱ្យមានបរិយាកាសសិក្សាកាន់តែប្រសើរឡើង ដើម្បីឱ្យសិស្សានុសិស្សអាចរៀនដើម្បីក្លាយជាអ្នកបច្ចេកទេស ផ្នែកអេឡិចត្រូនិច និងវិស្វកម្មអគ្គិសនី។
កយកាអះអាងថា«តាងនាមឱ្យរដ្ឋាភិបាលនៃសាធារណរដ្ឋកូរ៉េ កយកា បានប្តេជ្ញាប្រគល់ភារកិច្ចទទួលខុសត្រូវ ក្នុងការពង្រឹងភាពជាដៃគូរវាងប្រទេសទាំងពីរ និងធ្វើឱ្យប្រជាជនកាន់តែមានភាពជិតស្និទ្ធ។ ដូចសុភាសិតខ្មែរពោលថា «ចង្កឹះមួយបាច់កាច់មិនបាក់» កិច្ចខិតខំប្រឹងប្រែងរួមពីរដ្ឋាភិបាលទាំងពីរដោយឈរលើភាពជាដៃគូល្អនិងដ៏រឹងមាំ នឹងត្រូវបានបន្តដូចដែលមានអស់រយៈពេល២០ឆ្នាំចុងក្រោយនេះ»៕ អត្ថបទ៖សារេត

The post ២០ឆ្នំា KOICA ចំណាយថវិកាជាង៣៦៦លានដុលា្លរអាមេរិកចូលរួមអភិវឌ្ឍន៍សង្គមសេដ្ឋកិច្ចកម្ពុជា appeared first on .

លោក នោ ហ្យន់ជូន (Rho Hyunjun) ប្រធានតំណាងទីភ្នាក់ងារសហប្រតិបត្តិការអន្តរជាតិកូរ៉េ KOICA ប្រចំាប្រទេសកម្ពុជាបាន​ឲ្យ​ដឹង​ថា ចាប់តាំងពីឆ្នាំ១៩៩១ ដល់ឆ្នាំ២០២១ កយកា-KOICA បានផ្តល់ជំនួយឥតសំណងប្រហែល ៣១០លានដុល្លារអាមេរិក ដល់ប្រទេសកម្ពុជា។ វិស័យ​អាទិភាពសំខាន់ៗរបស់​គម្រោង​ជំនួយ​ KOICA រួមមាន​ដូចជា​ វិស័យសុខាភិបាល អភិវឌ្ឍន៍ជនបទ ឌីជីថល និងបរិស្ថាន/ការប្រែប្រួលអាកាសធាតុ។

ជាមួយគ្នា​នេះ លោក នោ ហ្យន់ជូន ក៏បានលើកឡើងអំពីជំហានបន្ទាប់ នៃការធ្វើការជាមួយក្រសួងពាក់ព័ន្ធរបស់ប្រទេសកម្ពុជា ដើម្បើរៀបចំឯកសារទស្សនទានគម្រោង (Project Concept Paper -PCP) សម្រាប់ការស្នើសុំសំណើគម្រោងថ្មីសម្រាប់ឆ្នាំ២០២៤។

លោក​បានលើកឡើង​បន្ថែម​ថា សម្រាប់ឆ្នាំ២០២២នេះវិញ ជំនួយឥតសំណងរបស់ KOICA សម្រាប់ប្រទេសកម្ពុជា ត្រូវបានគេរំពឹងថានឹងមានចំនួនប្រហែល ២០,៧ លានដុល្លារអាមេរិក។

ជាការ​ឆ្លើយតប​ លោក ឈៀង យ៉ាណារ៉ា រដ្ឋមន្ត្រីប្រតិភូអមនាយករដ្ឋមន្ត្រី អគ្គលេខាធិការគណៈកម្មាធិការនីតិសម្បទា និងអភិវឌ្ឍន៍កម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្តែងការពេញចិត្តយ៉ាងខ្លាំងចំពោះគំនិតផ្តួចផ្តើមនេះ។ លោកបានលើកទឹកចិត្ត KOICA ឲ្យពិភាក្សាលម្អិតអំពីបច្ចេកទេសនៃកិច្ចសហប្រតិបត្តិការជាមួយក្រសួងពាក់ព័ន្ធ ដើម្បើរៀបចំឯកសារទស្សនទានគម្រោង (Project Concept Paper -PCP) សម្រាប់ការស្នើសុំសំណើគម្រោងថ្មី ។

លោក​ក៏​បានថ្លែងអំណរគុណចំពោះកយកា និងប្រជាជន ព្រមទាំងរដ្ឋាភិបាលកូរ៉េចំពោះកិច្ចសហប្រតិបត្តិការ និងភាពជាដៃគូដ៏រឹងមាំ ដែលបានរួមចំណែកជួយដល់ការអភិវឌ្ឍន៍សេដ្ឋកិច្ចសង្គមកម្ពុជា៕

The post ៣០ ឆ្នាំ​នេះ ទីភ្នាក់ងារកូរ៉េ (កយកា) ​ផ្តល់​ជំនួយ​ឥត​សំណងជាង ៣០០ លាន​ដុល្លារ​ ចូលរួមអភិវឌ្ឍ​សេដ្ឋកិច្ច​សង្គម​​កម្ពុជា appeared first on .