Pony Ma

សហស្ថាបនិកក្រុមហ៊ុនហ្គេមខ្នាតយក្ស Tencent ឡើងគ្រងតំណែងជាអ្នកមានដាច់គេនៅចិន

ឧកញ៉ាសាមញ្ញ — Tue, 17 Sep 2024 09:55:00 +0000

សហស្ថាបនិកក្រុមហ៊ុនហ្គេមលំដាប់កំពូល Tencent Holdings លោក Pony Ma បានត្រលប់មកគ្រងតំណែងជាអ្នកមានដាច់គេម្តងទៀត នៅក្នុងប្រទេសចិន ដោយវ៉ាដាច់មហាសេដ្ឋីទឹកសុទ្ធ លោក Zhong Shanshan ជាមួយនឹងទ្រព្យសម្បត្តិសរុបប្រមាណ ៤៤ពាន់លានដុល្លារ។ នេះបើតាមការចុះផ្សាយពីសារព័ត៌មាន The Star។

គួរឲ្យដឹងថា Zhong បានធ្លាក់មកចំណាត់ថ្នាក់លេខ៣ ស្របពេលលោក Zhang Yiming ដែលជាស្ថាបនិកក្រុមហ៊ុន ByteDance ឡើងមកកាន់ចំណាត់ថ្នាក់លេខ២ ក្នុងនាមជាអ្នកមានបំផុត នៅក្នុងប្រទេសចិន។

ទ្រព្យសម្បត្តិរបស់លោក Ma បានកើនឡើងយ៉ាងខ្លាំង នាពេលថ្មីៗនេះ បន្ទាប់ពីភាគហ៊ុនរបស់ក្រុមហ៊ុន Tencent ហក់ឡើងខ្ពស់លើសក្រុមហ៊ុនគូប្រជែងផ្សេងទៀត ចំពេលទីផ្សារហ្គេមនៅក្នុងប្រទេសចិនមានកំពុងមានសន្ទុះខ្លាំង។

ជម្រាបជូនផងដែរថា ទ្រព្យសម្បត្តិរបស់លោក Ma នៅតែធ្លាក់ចុះប្រហែល ៤០% ពីកម្រិតកំពូលរបស់ខ្លួនដែលបានកត់ត្រាទុក នៅក្នុងខែមករា ឆ្នាំ២០២១ ។នេះបើយោងតាមសន្ទស្សន៍ទ្រព្យសម្បត្តិចេញផ្សាយដោយសារព័ត៌មាន Bloomberg ៕

The post សហស្ថាបនិកក្រុមហ៊ុនហ្គេមខ្នាតយក្ស Tencent ឡើងគ្រងតំណែងជាអ្នកមានដាច់គេនៅចិន appeared first on .

ល្បីចិនពូកែរកស៊ី តែមហាសេដ្ឋីមានបំផុតនៅអាស៊ីបែរជាជនជាតិឥណ្ឌាវិញ

ឧកញ៉ាសំពៅ — Thu, 14 Sep 2023 08:57:00 +0000

ទ្វីបអាស៊ី គឺប្រមូលផ្ដុំមហាសេដ្ឋីច្រើនបំផុតលើលោក ប្រមាណ ៩៥១នាក់ ដែលក្នុងនោះចិន និងឥណ្ឌាសំបូរមហាសេដ្ឋីច្រើនជាងគេ ពោលចិនមានប្រមាណ ៤៤០ នាក់ ខណៈឥណ្ឌាមាន ១៦១ នាក់ ដោយក្នុងនោះអ្នកមានបំផុតប្រចាំទ្វីបគឺលោក Mukesh Ambani ម្ចាស់ក្រុមហ៊ុន Reliance Industries Limited។

ខាងក្រោមនេះគឺជាបញ្ជីឈ្មោះមហាសេដ្ឋីមានបំផុតប្រចាំទ្វីបអាស៊ី ផ្អែកតាមការចុះផ្សាយពីទស្សនាវដ្ដី Forbes៖

1/ Mukesh Ambani

បុគ្គលឈរនៅកំពូលតារាងរូបនេះ គឺជាមហាសេដ្ឋីជនជាតិឥណ្ឌាដែលមានទំហំទ្រព្យសម្បត្តិប្រមាណ ៩៥,៧ពាន់លានដុល្លារ ហើយលោកគឺជាម្ចាស់ភាគហ៊ុនធំបំផុតនៃក្រុមហ៊ុនថាមពល និងទូរគមនាគមន៍ Reliance Industries ដែលក្ដោបក្ដាប់វិស័យផ្សេងៗដូចជា គីមីឥន្ធនៈ ប្រេង ឧស្ម័ន ទូរគមនាគមន៍ជាដើម។

2/ Zhong Shanshan

បុរសដែលមានរហស្សនាមថា “ស្ដេចទឹកបរិសុទ្ធ” Zhong Shanshan គឺជាស្ថាបនិកនៃក្រុមហ៊ុនផលិតទឹកបរិសុទ្ធ Nongfu Spring គឺជាមហាសេដ្ឋីមានបំផុតទី ២ ប្រចាំទ្វីបអាស៊ីដោយលោកមានដើមកំណើតជាជនជាតិចិន។

បច្ចុប្បន្ន លោកមានទ្រព្យសម្បត្តិប្រមាណ ៦២,២ពាន់លានដុល្លារ។

3/ Gautam Adani

មហាសេដ្ឋីឥណ្ឌាទី ២ គឺលោក Gautam Adani ដែលលោកគឺជា CEO នៃក្រុមហ៊ុន Adani Groups ដែលកាន់កាប់មុខជំនួញជាច្រើនដែលមានដូចជា កំពង់ផែ Mundra Port, Adani Enterprises, Adani Green, Adani Total Gas, Adani Power ជាដើម។

បច្ចុប្បន្ន Adani គឺជាមហាសេដ្ឋីមានបំផុតទី ២ នៅប្រទេសឥណ្ឌា ដែលមានទំហំទ្រព្យសម្បត្តិប្រមាណ ៥៦,៣ពាន់លានដុល្លារ។

4/ Zhang Yiming

សហស្ថាបនិក និងជាអតីត CEO ក្រុមហ៊ុន ByteDacne ដែលជាក្រុមហ៊ុនមេកម្មវិធីល្បីល្បាញ TikTok មានទ្រព្យសម្បត្តិប្រមាណ ៣៩,១ពាន់លានដុល្លារ។

5/ Li Ka-shing

បុរសដែលមានរហស្សនាមថា Superman និងជាមហាសេដ្ឋីហុងកុងតែម្នាក់គត់ក្នុងបញ្ជីមួយនេះ មានទ្រព្យសម្បត្តិប្រមាណ ៣៧,៨ពាន់លានដុល្លារ និងមានអាជីវកម្មជាច្រើននៅក្នុងដៃ។

6/ Tadashi Yanai

ជាជនជាតិជប៉ុនតែម្នាក់គត់ ក្នុងបញ្ជីឈ្មោះមួយនេះ ហើយលោកគឺជាស្ថាបនិក និងជា CEO ក្រុមហ៊ុន Fast Retailing ក្រុមហ៊ុនមេ Uniqlo ខណៈទ្រព្យសម្បត្តិរបស់លោកមានប្រមាណ ៣៥,៩ពាន់លានដុល្លារ។

7/ Pony Ma Huateng

ជានាយកប្រតិបត្តិក្រុមហ៊ុនយក្ស Tencent Holdings ដែលជាប់ឈ្មោះជាក្រុមហ៊ុនធំបំផុតប្រចាំប្រទេស បើផ្អែកតាមមូលធនទីផ្សារ។

បុរសរូបនេះមានដើមកំណើតជាជនជាតិចិន ដែលមានទំហំទ្រព្យសម្បត្តិសរុប ៣៥,២ពាន់លានដុល្លារ។

8/ Colin Zheng Huang

ស្ថាបនិកក្រុមហ៊ុន Pinduoduo ដែលឥឡូវនេះជាវេទិកាកសិកម្មដ៏ធំបំផុតនៅក្នុងប្រទេសចិន ខណៈបច្ចុប្បន្នទ្រព្យសម្បត្តិរបស់លោក មានប្រមាណ ៣៤,៦ពាន់លានដុល្លារ។

9/ William Lei Ding

ស្ថាបនិក និងជា CEO ក្រុមហ៊ុន NetEase ដែលជំនាញលើការផលិតហ្គេម ផ្គត់ផ្គង់សេវាកម្មអ៊ីនធឺណិត និងការធ្វើពាណិជ្ជកម្មអេឡិចត្រូនិច មានទ្រព្យសម្បត្តិប្រមាណ ៣២,១ឹពាន់លានដុល្លារ

10/ Robin Zeng

ជាស្ថាបនិកក្រុមហ៊ុន CATL ដែលជាអ្នកផលិតអាគុយលីចូម – អ៊ីយ៉ុងសម្រាប់រថយន្តអគ្គិសនី ធំបំផុតមួយលើពិភពលោក ហើយទ្រព្យសម្បត្តិរបស់លោកមានប្រមាណ ៣៤ពាន់លានដុល្លារ។

សូមជម្រាបដែរថា ចំណែកឯមហាសេដ្ឋីនៅតំបន់អាស៊ីអាគ្នេយ៍វិញមានសរុប ១១៤ នាក់ តៃវ៉ាន់មាន ៤៥ នាក់ កូរ៉េខាងត្បូងមាន ២៨ នាក់ និងជប៉ុនមាន ២៧ នាក់។ នេះបើតាមការចុះផ្សាយពីសារព័ត៌មាន Nikkei Asia៕

The post ល្បីចិនពូកែរកស៊ី តែមហាសេដ្ឋីមានបំផុតនៅអាស៊ីបែរជាជនជាតិឥណ្ឌាវិញ appeared first on .

មហាសេដ្ឋីចិនម្នាក់ សរសើរចំណាត់ការគាំទ្រវិស័យឯកជនរបស់ចិន

ឧកញ៉ាសំពៅ — Thu, 20 Jul 2023 07:45:50 +0000

កាលពីពេលថ្មីៗនេះ ស្ថាបនិកក្រុមហ៊ុន Tencent លោក Pony Ma បានពោលសរសើរដល់ចំណាត់ការរបស់រដ្ឋាភិបាលចិន ដែលគាំទ្រដល់វិស័យឯកជនឡើងវិញ។ នេះបើតាមការចុះផ្សាយពីសារព័ត៌មាន CNA។

ដោយឡែកប៉ុស្តិ៍ទូរទស្សន៍រដ្ឋ CCTV ក៏បានដកស្រង់សម្ដីរបស់លោក Ma ដែលមានអត្ថន័យថា ក្រុមហ៊ុន Tencent ពិតជាមានអារម្មណ៍រំភើបរីករាយ និងទទួលបានការលើកទឹកចិត្តខ្លាំង ចំពោះចំណាត់ការរបស់រដ្ឋាភិបាលថ្មីនេះ។

បន្ថែមពីនោះ មហាសេដ្ឋីចិនរូបនេះសង្កត់ធ្ងន់ទៀតថា ក្រុមហ៊ុនប្រព័ន្ធផ្សព្វផ្សាយ និងបង្កើតហ្គេមមួយនេះ នឹងព្យាយាមបង្កើតកម្មវិធីថ្មីៗ ដើម្បីដើរតាមការលើកទឹកចិត្តពីរដ្ឋាភិបាល។

សូមជម្រាបដែរថា រដ្ឋាភិបាលចិនចាប់ផ្ដើមប្រើវិធីសាស្ត្រត្រជាក់វិញ ដោយព្យាយាមលើកកម្ពស់ និងលើកទឹកចិត្តដល់វិស័យឯកជន ដើម្បីជួយបង្កើនកំណើនសេដ្ឋកិច្ចក្នុងស្រុក បន្ទាប់ពីធ្វើការបង្ក្រាបអំពើពុករលួយទ្រង់ទ្រាយធំ ពាក់ព័ន្ធជាមួយវិស័យបច្ចេកវិទ្យានាពេលកន្លង ដែលបណ្ដាលឲ្យមានការខាតបង់រាប់រយពាន់លានដុល្លារ៕

The post មហាសេដ្ឋីចិនម្នាក់ សរសើរចំណាត់ការគាំទ្រវិស័យឯកជនរបស់ចិន appeared first on .

Zhong Shanshan នៅតែជាមហាសេដ្ឋីមានបំផុតប្រចាំចិន ខណៈ Jack Ma ខ្ទាតមកដល់លេខ ៧

ឧកញ៉ាសំពៅ — Mon, 09 Jan 2023 06:51:00 +0000

កាលពីខែវិច្ឆិកា ២០២២ សហស្ថាបនិក Alibaba មហាសេដ្ឋី Jack Ma ធ្លាប់ជាអ្នកមានបំផុតមួយរូបប្រចាំប្រទេសចិន ជាមួយនឹងតំណែងលេខ ៤ ប៉ុន្តែនៅដើមខែមករានេះ តំណែងរបស់លោកត្រូវបានដណ្ដើម ទាំងនៅក្នុងបញ្ជីមហាសេដ្ឋី និងក្រុមហ៊ុន Ant Group។

រំលឹកបន្តិចថា កាលពីប៉ុន្មានថ្ងៃមុន Jack Ma លែងក្លាយជាអ្នកសម្រេចចិត្តធំបំផុតប្រចាំក្រុមហ៊ុន Fintech ធំបំផុតប្រចាំចិន បន្ទាប់ពីក្រុមប្រឹក្សាភិបាលបានជំនុំគ្នា កែប្រែសិទ្ធសម្រេចចិត្តដោយសេរីវិញ។

ការសម្រេចចិត្តនេះបានធ្វើឲ្យ Jack Ma ខាតបង់ទ្រព្យសម្បត្តិច្រើនគួរសម រហូតលោកខ្ទាតមកដល់តំណែងលេខ ៧ នៃបញ្ជីមហាសេដ្ឋីមានបំផុតនៅចិន ខណៈ Zhong Shanshan នៅតែជាស្ដេចត្រាញ់កំពូលប្រចាំមហាអំណាចសេដ្ឋកិច្ចធំបំផុតទី ២ លើលោក។

ខាងក្រោមនេះគឺជាបញ្ជីឈ្មោះមហាសេដ្ឋីមានបំផុត ១០ រូប ប្រចាំប្រទេសចិន គិតត្រឹមថ្ងៃទី ០៩ មករា ២០២៣ ផ្អែកតាមរបាយការណ៍ចេញផ្សាយដោយ Forbes៖

១/ លោក Zhong Shanshan មានទ្រព្យសរុប ៦៣,១ ពាន់លានដុល្លារ បានមកពីមុខជំនួញលក់ទឹកសុទ្ធ និងភេសជ្ជៈ

២/ លោក Zhang Yiming មានទ្រព្យសរុប ៤៩,៥ ពាន់លានដុល្លារ បានមកពីក្រុមហ៊ុន Tik-Tok

៣/ លោក Ma Huateng មានទ្រព្យសរុប ៣៨,៨ ពាន់លានដុល្លារ បានមកពីមុខជំនួញបង្កើតបណ្តាញផ្សព្វផ្សាយលើអ៊ីនថឺណិត

៤/ លោក Colin Zheng Huang មានទ្រព្យសរុប ៣៣,៨ ពាន់លានដុល្លារ បានមកពីពាណិជ្ជកម្ម E-Commerce

៥/ លោក William Lei Ding មានទ្រព្យសរុប ២៦,៣ ពាន់លានដុល្លារ បានមកពីការបង្កើតល្បែងលើអ៊ីនថឺណិត

៦/ លោក He Xiangjian មានទ្រព្យសរុប ២៥ ពាន់លានដុល្លារ បានមកពីការលក់ផលិតផលប្រើប្រាស់ក្នុងផ្ទះ

៧/ លោក Jack Ma មានទ្រព្យសរុប ២៤,៩ ពាន់លានដុល្លារ បានពីពាណិជ្ជកម្ម E-Commerce

៨/ លោក Wang Wei មានទ្រព្យ ២៤,១ ពាន់លានដុល្លារ បានមកពីក្រុមហ៊ុនវេចខ្ចប់និងដឹកជញ្ជូន

៩/ លោក Wang Chuanfu មានទ្រព្យសរុប ២០,៦ បានមកពីការផលិតអាគុយ និងរថយន្ត

១០/ លោក Li Shufu មានទ្រព្យសរុប ២០,១ ពាន់លានដុល្លារ បានមកពីក្រុមហ៊ុនលក់រថយន្ត

គួរបញ្ជក់ថា ចំនួនកំពូលអ្នកមានរបស់ប្រទេសចិនខាងលើនេះ មិនបានរាប់បញ្ចូលមហាសេដ្ឋីគ្រាក់ៗនៅក្រុងម៉ាកាវ និងក្រុងហុងកុងទេ៕

The post Zhong Shanshan នៅតែជាមហាសេដ្ឋីមានបំផុតប្រចាំចិន ខណៈ Jack Ma ខ្ទាតមកដល់លេខ ៧ appeared first on .

មេធំ Tencent កោះហៅបុគ្គលិកមកដុះក្អែលចេញ ស្របពេលក្រុមហ៊ុនចាប់ផ្ដើមមានបញ្ហា

ឧកញ៉ាសំពៅ — Fri, 23 Dec 2022 08:56:00 +0000

កាលពីពេលថ្មីៗនេះ មេធំក្រុមហ៊ុន Tencent Holdings មហាសេដ្ឋី Pony Ma បានប្រកាសហៅបុគ្គលិកជាន់ខ្ពស់ជាច្រើននាក់មកដុះក្អែលចេញម្ដង ក្រោយក្រុមហ៊ុនកំពុងប្រឈមនឹងបញ្ហាជាច្រើន។

បុគ្គលិកម្នាក់ដែលបានចូលរួមកិច្ចប្រជុំមានរយៈពេលជាង ១០ នាទី បានទម្លាយថា សហស្ថាបនិកក្រុមហ៊ុនមានការខឹងសម្បារជាខ្លាំង ជាមួយបុគ្គលិកជាន់ខ្ពស់ជាច្រើនរូប ដែលមិនគោរពតួនាទី និងលួចកិបកេងផលប្រយោជន៍ ស្របពេលផ្នែកខ្លះនៃ Tencent កំពុងប្រឈមនឹងការបិទទ្វារ។ នេះបើតាមការចុះផ្សាយពី The Business Times។

ប្រភពដដែលថែមទាំងបានដកស្រង់សម្ដីដែលមហាសេដ្ឋី Pony Ma និយាយថា៖ “អ្នកឯងមិនទាំងដឹងច្បាស់ថា អាជីវកម្មមួយនេះអាចដើរបានដល់ពេលណាផង ប៉ុន្តែបែរជាមានពេលទៅទាត់បាល់នៅចុងសប្ដាហ៍យ៉ាងរំភើយ”។

សូមជម្រាបដែរថា ក្រុមហ៊ុន Tencent កំពុងមានបញ្ហាផ្ទៃក្នុង ខណៈចំណូលរបស់ក្រុមហ៊ុនក៏កំពុងថយចុះឥតស្រាកស្រាន្តមួយរយៈកាលចុងក្រោយ បន្ទាប់ពីមានការបង្ក្រាបការធ្វើពាណិជ្ជកម្មអនឡាញ ពីសំណាក់រដ្ឋាភិបាល ស្របពេលសេដ្ឋកិច្ចសកលក៏រាងយ៉ាប់យ៉ឹន គួបផ្សំនឹងការផ្ទុះកូវីដ ១៩ នៅចិនជាថ្មីទៀត។

កត្តានេះបានជម្រុញឲ្យ Tencent បង្ខំចិត្តបញ្ឈប់បុគ្គលិករាប់ពាន់នាក់ក្នុងឆ្នាំនេះ ដែលធ្វើឲ្យកម្លាំងពលកម្មរបស់ក្រុមហ៊ុនធ្លាក់ចុះមិនធ្លាប់មានក្នុងរយៈពេលជិត ១ ទសវត្សចុងក្រោយ៕

The post មេធំ Tencent កោះហៅបុគ្គលិកមកដុះក្អែលចេញ ស្របពេលក្រុមហ៊ុនចាប់ផ្ដើមមានបញ្ហា appeared first on .

ចាយពេល ៦ ខែ Jack Ma រំកិលខ្លួនពីបាតតារាង មកកាន់តំណែង Top 4 នៃបញ្ជីមហាសេដ្ឋីចិន

ឧកញ៉ាសំពៅ — Tue, 01 Nov 2022 23:34:00 +0000

កាលពីដើមខែមេសាកន្លងទៅ គេហទំព័រ Forbes បានបញ្ចេញតារាងឈ្មោះមហាសេដ្ឋីប្រចាំតំបន់លើកទី ៣៦ របស់ខ្លួន ហើយសម្រាប់បញ្ជីឈ្មោះស្ដេចត្រាញ់នៅចិនវិញ គេសង្កេតឃើញថា ស្ថាបនិក Alibaba លោក Jack Ma ស្ថិតនៅលេខរៀងទី ៩ ជាមួយទ្រព្យសម្បត្តិ ២២,៨ ពាន់លានដុល្លារ។

យ៉ាងណា ដោយសារវិបត្តិសេដ្ឋកិច្ចកំពុងកើតមាន ចំពេលវិស័យអចលនទ្រព្យក្នុងស្រុកក៏ធ្វើទុក្ខបុកម្នេញទៀត បណ្ដាលឲ្យបញ្ជីឈ្មោះមហាសេដ្ឋីមានបំផុតនៅចិនគិតត្រឹមខែវិច្ឆិកា មានការប្រែប្រួល។

យោងតាមរបាយការណ៍ចេញផ្សាយដោយ Forbes គិតត្រឹមថ្ងៃទី ០១ វិច្ឆិកា ២០២២ បានបង្ហាញថា បច្ចុប្បន្ន Jack Ma កំពុងអង្គុយកៅអីលេខ ៤ ក្នុងបញ្ជីមហាសេដ្ឋីមានបំផុតនៅចិន ជាមួយទំហំទឹកប្រាក់តិចជាងមុនតែ ២០,៥ ពាន់លានដុល្លារប៉ុណ្ណោះ។

ខាងក្រោមនេះគឺជាបញ្ជីឈ្មោះមហាសេដ្ឋីចិនមានបំផុត ១០ រូប គិតត្រឹមថ្ងៃទី ០១ វិច្ឆិកា ២០២២៖

២/ លោក Zhang Yiming មានទ្រព្យសរុប ៤៩,៥ ពាន់លានដុល្លារ បានមកពីក្រុមហ៊ុន Tik-Tok

៣/ លោក Ma Huateng មានទ្រព្យសរុប ២៥,៨ ពាន់លានដុល្លារ បានមកពីមុខជំនួញបង្កើតបណ្តាញផ្សព្វផ្សាយលើអ៊ីនថឺណិត

៤/ លោក Jack Ma មានទ្រព្យសរុប ២០,៥ ពាន់លានដុល្លារ បានពីពាណិជ្ជកម្ម E-Commerce

៥/ លោក Wang Wei មានទ្រព្យ ១៩,៥ ពាន់លានដុល្លារ បានមកពីក្រុមហ៊ុនវេចខ្ចប់និងដឹកជញ្ជូន

៦/ លោក Colin Zheng Huang មានទ្រព្យសរុប ១៩,៣ ពាន់លានដុល្លារ បានមកពីពាណិជ្ជកម្ម E-Commerce

៧/ លោក Wang Chuanfu មានទ្រព្យសរុប ១៩,៣ បានមកពីការផលិតអាគុយ និងរថយន្ត

៨/ លោក He Xiangjian មានទ្រព្យសរុប ១៩,១ ពាន់លានដុល្លារ បានមកពីការលក់ផលិតផលប្រើប្រាស់ក្នុងផ្ទះ

៩/ លោក William Lei Ding មានទ្រព្យសរុប ១៨,៨ ពាន់លានដុល្លារ បានមកពីការបង្កើតល្បែងលើអ៊ីនថឺណិត

១០/ លោក Qin Yinglin មានទ្រព្យសរុប ១៨,៧ ពាន់លានដុល្លារ បានមកពីពាណិជ្ជកម្មបង្កាត់ពូជជ្រូក

The post ចាយពេល ៦ ខែ Jack Ma រំកិលខ្លួនពីបាតតារាង មកកាន់តំណែង Top 4 នៃបញ្ជីមហាសេដ្ឋីចិន appeared first on .

ជិត ៧ខែចុងក្រោយ ទ្រព្យសម្បត្តិមហាសេដ្ឋីមានបំផុត ៥ រូបនៅចិន របូតអស់ជាង ២០ ពាន់លានដុល្លារ

ឧកញ៉ាសំពៅ — Tue, 01 Nov 2022 09:57:00 +0000

ទ្រព្យសម្បត្តិសរុបមហាសេដ្ឋីមានបំផុតនៅចិន ៥ រូបបានរបូតពី ២០០ ពាន់លានដុល្លារ មកនៅត្រឹម ១៧៧,៥ ពាន់លានដុល្លារ គិតពីខែមេសា រហូតដល់ថ្ងៃទី ២៧ តុលា ២០២២។ នេះបើតាមទិន្នន័យចេញផ្សាយដោយ Forbes។

ប្រភពដដែលអះអាងថា ក្នុងចំណោមទ្រព្យសម្បត្តិដែលខាតបង់ប្រហែល ២២,៥ ពាន់លានដុល្លារនោះ ស្ថាបនិកក្រុមហ៊ុន Tencent Holdings លោក Pony Ma គឺរ៉ាប់រងការខាតបង់ជាងពាក់កណ្ដាលតែឯង ពោលគឺបានរបូតទ្រព្យសម្បត្តិប្រមាណ ១២,៥ ពាន់លានដុល្លារ។

ដោយឡែក អ្នកដែលខាតបង់ធ្ងន់ធ្ងរបន្ទាប់គឺលោក Wang Wei របូតលុយប្រមាណ ៤,៥ ពាន់លានដុល្លារ ខណៈមហាសេដ្ឋីមានបំផុតនៅចិន Zhong Shanshan ខាតបង់ទ្រព្យសម្បត្តិប្រហែល ៣,២ ពាន់លានដុល្លារ។

រីឯសហស្ថាបនិក Alibaba មហាសេដ្ឋី Jack Ma វិញ របូតលុយខ្ទង់ ១,៨ ពាន់លានដុល្លារ ហើយអ្នកដែលខាតបង់តិចបំផុត គឺមហាសេដ្ឋីលំដាប់លេខ ២ Zhang Yiming ដែលរបូតលុយតែ ៥០០ លានដុល្លារប៉ុណ្ណោះ៕

The post ជិត ៧ខែចុងក្រោយ ទ្រព្យសម្បត្តិមហាសេដ្ឋីមានបំផុត ៥ រូបនៅចិន របូតអស់ជាង ២០ ពាន់លានដុល្លារ appeared first on .

មហាសេដ្ឋីចិន របូតលុយរាប់ពាន់លានដុល្លារ ក្រោយរដ្ឋាភិបាលរឹតបន្តឹងគោលនយោបាយ

ឧកញ៉ាសំពៅ — Tue, 25 Oct 2022 05:18:00 +0000

ប្រធានាធិបតីចិន Xi Jinping នៅតែបន្តរឹតបន្តឹងគោលនយោបាយថ្មី ដែលបានធ្វើឲ្យមហាសេដ្ឋីស្រុកចិនជាច្រើនរូប របូតលុយអស់រាប់ពាន់លានដុល្លារ។ នេះបើតាមការចុះផ្សាយពី Bloomberg។

ប្រភពដដែលបានបន្ថែមថា មេធំក្រុមហ៊ុន Tencent Holdings លោក Pony Ma និងមហាសេដ្ឋីមានបំផុតនៅចិន Zhong Shanshan បានរបូតលុយអស់ម្នាក់ ប្រហែល ២ ពាន់លានដុល្លារ បន្ទាប់ពីតម្លៃហ៊ុនរបស់ពួកគេធ្លាក់ចុះ ក្រោយការរឹតបន្តឹងគោលនយោបាយរដ្ឋាភិបាល។

សូមជម្រាបដែរថា ឆ្នាំនេះហាក់ដូចជាឆ្នាំអាក្រក់បំផុតរបស់មហាសេដ្ឋីចិន ពោលដោយសារការរឹតបន្តឹងវិធានការកូវីដ ១៩ ធ្វើឲ្យសេដ្ឋកិច្ច និងទំហំទ្រព្យសម្បត្តិមហាសេដ្ឋីក្នុងស្រុកខាតបង់ស្ទើរគ្រប់គ្នា។

ទ្រព្យសម្បត្តិមហាសេដ្ឋីចិន ៧៦ នាក់ក្នុងចំណោមមហាសេដ្ឋីមានបំផុតលើលោក ៥០០ នាក់ គឺមានប្រមាណ ៧៨៣ ពាន់លានដុល្លារ តិចជាងឆ្នាំទៅដែលចិនមានមហាសេដ្ឋី ៧៩ នាក់មានទ្រព្យសម្បត្តិសរុប ១,១ ទ្រីលានដុល្លារ៕

The post មហាសេដ្ឋីចិន របូតលុយរាប់ពាន់លានដុល្លារ ក្រោយរដ្ឋាភិបាលរឹតបន្តឹងគោលនយោបាយ appeared first on .