នាព្រឹកថ្ងៃចន្ទទី ២៨ ខែកក្កដា ឆ្នាំ ២០២៥នេះ ក្រុមហ៊ុន PICG ទទួលសិទ្ធផ្ដាច់មុខផ្គត់ផ្គង់និងចែកចាយសំបកកង់ឡានខ្មែរ និងប្រេងរំអិលម៉ាក ប៉េត្រូណាស់ បានប្រកាសចូលរួមបរិច្ចាគថវិកា ១ម៉ឺនដុល្លារ ដល់វីរកងទ័ពខ្មែរ ព្រមទាំងបានបង្កើត «មូលនិធិជួយដល់កងទ័ពខ្មែរជួរមុខដ៏អង់អាច» ដើម្បីជួយទ្រទ្រង់ដល់វីរកងទ័ពកម្ពុជា កំពុងឈរជើងយ៉ាងស្វាហាប់ក្នុងការពារដែនអធិបតេយ្យភាពនិងជនភៀសសឹកកម្ពុជាផងដែរ។
លោក គឹន ឧត្តមមុនីស៊ីណាត នាយកប្រតិបត្តិនៃក្រុមហ៊ុន PICG ដែលជាក្រុមហ៊ុនទទួលសិទិ្ធចែកចាយផ្តាច់មុខនូវផលិតផលសំបកកង់ឡានខ្មែរ និងប្រេងរំអិល ប៉េត្រូណាស់ នៅកម្ពុជា បញ្ជាក់ប្រាប់សារព័ត៌មាន ឧកញ៉ាញូស៍ថា៖ “នៅថ្ងៃនេះក្រុមហ៊ុន PICG សម្រេចប្រកាសជាសាធារៈបង្កើតមូលនិធិជួយដល់កងទ័ពខ្មែរជួរមុខដ៏អង់អាច។ ជាមួយគ្នានោះដែរ ក្រុមហ៊ុន PICG ជាម្ចាស់មូលនិធិ ក៏បានបរិច្ចាគជាទឹកប្រាក់ចំនួន 10,000 ដុល្លារអាមេរិក (១ម៉ឺនដុល្លារ) មុនរួចជាស្រេច។”
ការចូលរួមឧបត្ថម្ភថវិការបស់ក្រុមហ៊ុន PICG ទទួលសិទិ្ធចែកចាយផ្តាច់មុខនូវផលិតផលសំបកកង់ឡានខ្មែរ ក្នុងគ្រាដ៏លំបាកនេះជាការចូលរួមចំណែកលើកទឹកចិត្តដល់កងទ័ពកម្ពុជាដ៏អង់អាចក្លាហានរបស់កម្ពុជា ដែលកំពុងឈរជើងជាប់ជាប្រចាំដើម្បីការពារបូរណភាពទឹកដីនៅតាមបណ្តោយព្រំដែនកម្ពុជា-ថៃ៕
