លោក ត្រាំ​ បញ្ជាក់ច្បាស់ៗថានឹងគ្មានការពន្យារពេលពន្ធគយទៀតឡើយ

ប្រធានាធិបតីអាមេរិក លោក ដូណាល់ ត្រាំ បាននិយាយថា លោកនឹងមិនព្យាពេលសម្រាប់ការដាក់ពន្ធគយខ្ពស់ ដែលនឹងត្រូវដល់ថ្ងៃកំណត់នៅថ្ងៃស្អែកនេះ សារជាថ្មីម្តងទៀតឡើយ។ នេះបើតាមការចុះផ្សាយពីសារព័ត៌មាន CNBC។

ដោយបានសរសេរបង្ហោះនៅលើបណ្តាញសង្គម Truth Social កាលពីថ្ងៃពុធ លោក ត្រាំ បានលើកឡើងថា ៖” កាលកំណត់ នៅថ្ងៃទី១ ខែសីហា គឺនៅថ្ងៃទី១ ខែសីហា វានៅតែដដែល​ ហើយនឹងគ្មានការពន្យារពេលទៀតនោះឡើយ។ វានឹងក្លាយជាថ្ងៃដ៏ធំមួយសម្រាប់អាមេរិក”។

យ៉ាងណាមិញជុំវិញការប្រកាសនេះ ត្រូវបានធ្វើឡើង ស្របពេលលោក ត្រាំ ក៏បានប្រកាសថា​ សហរដ្ឋអាមេរិក នឹងដាក់ពន្ធ ២៥% ទៅលើទំនិញរបស់ប្រទេសឥណ្ឌា បូករួមទៅនឹងការពិន័យលើប្រទេសនេះ​ ដែលបានទិញឧបករណ៍យោធា និងថាមពលពីរុស្ស៊ី ផងដែរ។

ជម្រាបជូនផងដែរថា កាលពីដើមខែមេសា លោក ត្រាំ បានប្រកាសថា សហរដ្ឋអាមេរិក បានដាក់ពន្ធនៅក្នុងអត្រា ១០% លើប្រទេសជាច្រើន នឹងពន្ធខ្លះដល់ទៅ ៥០% លើប្រទេសដៃគូពាណិជ្ជកម្មមួយចំនួន នៅទូទាំងពិភពលោក។ ប៉ុន្តែពន្ធគយនេះ បានធ្វើឲ្យមានភាពច្របូកច្របល់ខ្លាំង​ ដោយធ្វើឲ្យលោក ត្រាំ​ សម្រេច​ពន្យារពេល ៩០ថ្ងៃ ដើម្បីទុកពេលចរចា។

លុះដល់ថ្ងៃកំណត់ដែលពន្ធគយនឹងត្រូវចូលជាធរមាននៅថ្ងៃទី៩ ខែកក្កដា លោក ត្រាំ ក៏បានបន្តប្រកាសពន្យារពេលបន្ថែមទៀត រហូតដល់ថ្ងៃទី១ ខែសីហា ស្អែកនេះ៕​