នាព្រឹកថ្ងៃទី១ ខែវិច្ឆិកា ឆ្នាំ២០២៥នេះ លោកអ្នកឧកញ៉ា ទ្រី ភាព បេសកជនពិសេស សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានក្រុមការងារគណបក្សចុះមូលដ្ឋានស្រុកប្រាសាទបល្ល័ង្ក បានអញ្ជើញជាអធិបតី ក្នុងពិធីបើកបវេសនកាលឆ្នាំសិក្សា ២០២៥-២០២៦ ជានិមិត្តរូបនៅវិទ្យាល័យប្រាសាទបល្ល័ង្ក ដោយមានការចូលរួមពីគណៈប្រតិភូអមដំណើរ មន្ត្រីថ្នាក់ខេត្ត មន្ត្រីថ្នាក់ស្រុកមន្ត្រីថ្នាក់ឃុំ កងកម្លាំងនគរបាលស្រុក កងរាជអាវុធហត្ថស្រុក ផ្នែកសឹករងស្រុក ប្រជាពលរដ្ឋ គណៈគ្រប់គ្រងសាលារៀន លោកគ្រូ អ្នកគ្រូ និងសិស្សានុសិស្ស សរុបចំនួនប្រមាណ ១២០០នាក់។
ក្រុមហ៊ុន ទ្រីភាព គ្រុប បានឱ្យដឹងថា បន្ទាប់ពីស្តាប់សារលិខិតរបស់ សម្តេចមហាបវរធិបតី នាយករដ្ឋមន្ត្រី ក្នុងឱកាសបើកបវេសនកាលឆ្នាំសិក្សា ២០២៥-២០២៦ បានបញ្ចប់រួចមក លោកអ្នកឧកញ៉ា បានមានប្រសាសន៍សំណេះសំណាលសួរសុខទុក្ខជាមួយបងប្អូនប្រជាពលរដ្ឋ លោកគ្រូអ្នកគ្រូ និងក្មួយៗសិស្សានុសិស្សទាំងអស់ ដែលបានចូលរួមក្នុងកម្មវិធីបើកបវេសនកាលថ្មីនេះ។ បន្ថែមពីនេះទៀត លោកអ្នកឧកញ៉ា ក៏បានផ្ដាំផ្ញើដល់ក្មួយៗសិស្សនុសិស្សត្រូវគោរពដឹងគុណជានិច្ចចំពោះឪពុកម្ដាយ លោកគ្រូអ្នកគ្រូ និងជាពិសេស គណបក្សប្រជាជនកម្ពុជា ដែលមានសម្ដេចតេជោ ជាប្រធាន និងសម្ដេចធិបតី នាយករដ្ឋមន្ត្រី ដែលបាននាំមកនូវ “សន្ដិភាព” ដល់យើងទាំងអស់គ្នា។ ដូច្នេះ ក្មួយៗសិស្សានុសិស្សទាំងអស់ត្រូវបន្តខិតខំប្រឹងប្រែងរៀនសូត្រ អភិវឌ្ឍសមត្ថភាព និងជំនាញសម្រាប់អនាគតខ្លួនឯង គ្រួសារ និងសង្គមជាតិ។
ឆ្លៀតក្នុងឱកាសនេះដែរ លោកអ្នកឧកញ៉ា បានប្រគល់អំណោយដ៏ថ្លៃថ្លារបស់ សម្ដេចតេជោ និងសម្ដេចកិត្តិព្រឹទ្ធបណ្ឌិត ដល់សិស្សជ័យលាភីប្រឡងជាប់សញ្ញាបត្រមធ្យមសិក្សាទុតិយភូមិ និទ្ទេសA ទទួលបានម៉ូតូ Honda Dream 2026 ១គ្រឿង ថវិកា ៤០០.០០០រៀល សិស្សជ័យលាភីនិទ្ទេសB ៨ នាក់ក្នុងម្នាក់ទទួលបានកុំព្រូទ័រ១គ្រឿង និងថវិកា ៤០០.០០០ រៀល ព្រមទាំងថវិកា កុំព្យូទ័រ និងម៉ាស៊ីនព្រីន ឧបត្ថម្ភដល់រដ្ឋបាលស្រុក អធិការដ្ឋាននគរបាលស្រុក ប៉ុស្តិ៍នគរបាលស្រុក និងបក្សឃុំទាំង៧ ការិយាល័យអប់រំស្រុក វិទ្យាល័យប្រាសាទបល្ល័ង្ក ប្រជាការពារ កងរាជអាវុធហត្ថ សឹករងស្រុក លោកគ្រូអ្នកគ្រូចូលនិវត្តន៍ លោកគ្រូអ្នកគ្រូ ក្នុងម្នាក់ទទួលបានថវិកា ៥០.០០០ រៀល និងសិស្សានុសិស្ស ១០១០នាក់ ក្នុងម្នាក់ទទួលបានសៀវភៅ៥ក្បាល ប៊ិច៥ដើម និងថវិកា ១០.០០០ រៀល ដែលសរុបជាទឹកប្រាក់ប្រមាណ ២៣០.០០០.០០០ រៀល៕
