អ្នកឧកញ៉ា ទៀ វិចិត្រ អគ្គនាយកក្រុមហ៊ុន ជីធីវីសុី គ្រុប និងជាសហស្ថាបនិកក្រុមហ៊ុន ភីស ភេត្រូលៀម (ខេមបូឌា) (PEACE Petroleum Cambodia ) នៅថ្ងៃទី១២ ខែវិច្ឆិកា ឆ្នាំ២០២៥ បានប្រកាសថា ក្រុមហ៊ុន ភីស ភេត្រូលៀម (ខេមបូឌា) នឹងពហិការគ្រប់ផលិតផលរបស់ប្រទេសថៃ ដើម្បីឆ្លើយតបទៅនឹងអំពើអមនុស្សធម៌ពីប្រទេសថៃ។
កាលពីរសៀលថ្ងៃទី១២ ខែវិច្ឆិកា យោធាថៃបានប្រើប្រាស់អំពើហិង្សា ដោយប្រើកាំភ្លើងបាញ់ប្រហារមកលើប្រជាពលរដ្ឋស៊ីវិលស្លូតត្រង់កម្ពុជា នៅភូមិព្រៃចាន់ ដែលបណ្តាលឱ្យប្រជាពលរដ្ឋស៊ីវិលស្លូតត្រង់កម្ពុជារបួស ៣នាក់ និងស្លាប់បាត់បង់ជីវិត ១នាក់។
ក្រោយហេតុការណ៍ខាងលើនេះ តាមរយៈបណ្តាញសង្គម អ្នកឧកញ៉ា ទៀ វិចិត្រ បានលើកឡើងបែបនេះថា៖ “ឆ្លើយតបទៅនឹងអំពើអមនុស្សធម៌ពីប្រទេសថៃ ដែលរំលោភបំពានមកលើប្រទេសកម្ពុជា ជាបន្តបន្ទាប់ ក្រុមហ៊ុន ភីស ភេត្រូលៀម (ខេមបូឌា) សូមជម្រាបជូនដល់សាធារណជនឱ្យបានជ្រាបថា ក្រុមហ៊ុននឹងពហិការគ្រប់ផលិតផលរបស់ប្រទេសថៃ”។
សូមជម្រាបថា ក្រុមហ៊ុន PEACE Petroleum Cambodia ត្រូវបានបង្កើតឡើងដោយកូនខ្មែរគឺ លោក ទៀ ស្យាម និងអ្នកឧកញ៉ា ទៀ វិចិត្រ ជាសហស្ថាបនិក។ បច្ចុប្បន្នក្រុមហ៊ុនស្ថានីយប្រេងមួយនេះ មានចំនួនជាង ៣០កន្លែង ហើយក្រុមហ៊ុន មានទស្សនវិស័យច្បាស់លាស់ ក្នុងការពង្រីកវិសាលភាពនៃស្ថានីយ ភីស ឱ្យគ្របដណ្តប់បានគ្រប់ ២៥ រាជធានី ខេត្ត តាមផែនការនិងយុទ្ធសាស្រ្តរបស់ក្រុមហ៊ុន នាពេលឆាប់ៗខាងមុខនេះ៕
