សមាគមឧកញ៉ាកម្ពុជា ចេញញត្តិថ្កោលទោស ចំពោះសកម្មភាពបាញ់ប្រហាររបស់យោធាថៃ មកលើប្រជាពលរដ្ឋ​ស៊ីវិលស្លូតត្រង់កម្ពុជា

សមាគមឧកញ៉ាកម្ពុជា នៅថ្ងៃទី១៣ ខែវិច្ឆិកា ឆ្នាំ២០២៥ បានចេញញត្តិថ្កោលទោស ចំពោះសកម្មភាពបាញ់​ប្រហារ​របស់យោធាថៃ មកលើប្រជាពលរដ្ឋស៊ីវិលស្លូតត្រង់កម្ពុជា នៅថ្ងៃទី១២ ខែវិច្ឆិកា ឆ្នាំ២០២៥  ដែលបណ្តាល​ឱ្យបាត់បង់ជីវិតប្រជាពលរដ្ឋស្លូតត្រង់ខ្មែរម្នាក់ និងរបួស៣នាក់។

ទង្វើអមនុស្សធម៌ដ៏សាហាវឃោរឃៅនេះបង្ហាញយ៉ាងច្បាស់ថាភាគីថៃបានរំលោភបំពានលើ “សេចក្តីថ្លែងការណ៍រួម​ស្តីពីកិច្ចព្រមព្រៀងសន្តិភាពរវាងកម្ពុជា និងថៃ” កាលពីថ្ងៃទី២៦ ខែតុលា ឆ្នាំ២០២៥ ដែលចុះហត្ថលេខាដោយ​នាយករដ្ឋមន្ត្រី នៃប្រទេសកម្ពុជា និងថៃ ក្រោមសាក្សីរបស់ ឯកឧត្តម ដូណាល់ ចេ ត្រាំ ប្រធានាធិបតីសហរដ្ឋ-អាម៉េរិក និង ឯកឧត្តម អាន់វ៉ា អ៊ីប្រាហ៊ីម នាយករដ្ឋមន្ត្រីម៉ាឡេស៊ី និងជាប្រធានប្តូរវេនអាស៊ាន៕