អ្នកឧកញ៉ា ម៉ុង ឫទ្ធី អគ្គនាយកក្រុមហ៊ុន ម៉ុងឫទ្ធី គ្រុប បានបង្ហើបឱ្យដឹងថា នៅថ្ងៃទី១ ឆ្លងឆ្នាំថ្មី២០២៦ ម្សិលមិញនេះ មានភ្ញៀវទេសចរណ៍ជាតិ និងអន្តរជាតិ ចូលលេងកម្សាន្តនៅតំបន់រមណីយដ្ឋានអភិវឌ្ឍន៍កសិទេសចរណ៍ ម៉ុង ឫទ្ធី សែនជ័យ របស់លោកប្រមាណជិត ៨,០០០នាក់។
តាមរយៈសារលើបណ្តាញសង្គម អ្នកឧកញ៉ាអគ្គនាយក បានគូសបញ្ជាក់បែបនេះថា៖ “ថ្ងៃព្រហស្បតិ៍ ១៣កើត ខែបុស្ស ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី១ ខែមករា ឆ្នាំ២០២៦ ថ្ងៃទី១ឆ្លងឆ្នាំចាស់ផ្លាស់ចូលឆ្នាំថ្មីនេះ មានភ្ញៀវទេសចរណ៍ជាតិអន្តរជាតិចំនួន ៧,៨៧៧នាក់ បាននាំគ្នាមកចូលលេងកម្សាន្ត នៅក្នុងតំបន់រមណីយដ្ឋានអភិវឌ្ឍន៍កសិទេសចរណ៍ ម៉ុង ឫទ្ធី សែនជ័យ ជាពិសេសពួកគាត់សំដៅមកជិះឡូរីតែម្តង”។
សូមជម្រាបថា តំបន់កសិទេសចរណ៍ ម៉ុង ឫទ្ធី សែនជ័យ ជាកន្លែងទេសចរណ៍បង្កើតឡើងដោយ អ្នកឧកញ៉ា ម៉ុង ឫទ្ធី មានផ្ទៃដីសរុបប្រមាណ ៥០០ហិកតា ដោយដាំដុះដំណាំចម្រុះប្រភេទ មានទាំងឈើហូប ព្រៃឈើធម្មជាតិ បន្លែបង្ការ សួនសត្វ មានសត្វព្រៃ សត្វស្រុក និងធនធានធម្មជាតិផ្សេងៗទៀត ព្រមទាំងមានទីលានប្រណាំងរថយន្ត និងកន្លែងជិះឡូរីកម្សាន្តផងដែរ៕
