ក្រុមហ៊ុនអូស៊ីអាយស៊ី (OCIC) នៅព្រឹកថ្ងៃទី៨ ខែមករា ឆ្នាំ២០២៦នេះ បានលើកបង្ហាញពីការដឹកនាំ និងចក្ខុវិស័យរបស់ លោកអ្នកឧកញ៉ា ពុង ឃាវសែ ក្នុងឱកាសគម្រប់ខួប ៣៥ឆ្នាំ នៃកាណាឌីយ៉ា គ្រុប (Canadia Group)។
ក្រុមហ៊ុន OCIC បានឱ្យដឹងថា ក្នុងនាមជាសហគ្រិនដែលមានអាជីវកម្មចម្រុះ លោកអ្នកឧកញ៉ា ពុង ឃាវសែ ស្ថាបនិក និងប្រធានក្រុមប្រឹក្សាភិបាលនៃកាណាឌីយ៉ាគ្រុប និងក្រុមហ៊ុនអូស៊ីអាយស៊ី បានចំណាយពេលជាងបីទសវត្សរ៍ ចូលរួមចំណែកយ៉ាងសកម្មក្នុងការអភិវឌ្ឍគម្រោងជាច្រើន ដោយផ្អែកលើចក្ខុវិស័យរយៈពេលវែង។
ក្នុងឱកាសគម្រប់ខួប ៣៥ ឆ្នាំ នៃកាណាឌីយ៉ា គ្រុប (Canadia Group) ក្រុមហ៊ុនសូមលើកបង្ហាញពីការដឹកនាំ និងចក្ខុវិស័យដ៏ជាប់លាប់របស់លោក ដែលបានចូលរួមជាផ្នែកសំខាន់មួយក្នុងការអភិវឌ្ឍកម្ពុជា តាមរយៈវិស័យហិរញ្ញវត្ថុ ការអភិវឌ្ឍសហគមន៍ និងហេដ្ឋារចនាសម្ព័ន្ធនានា។
ចាប់ផ្តើមពីការបង្កើត ធនាគារកាណាឌីយ៉ា (Canadia Bank) ក្នុងទសវត្សរ៍ឆ្នាំ ១៩៩០ លោកអ្នកឧកញ៉ា បានខឹតខំប្រឹងប្រែងពង្រឹងប្រព័ន្ធធនាគារនៅកម្ពុជា និងបានភ្ជាប់ទំនាក់ទំនងឱ្យប្រសើរវិញទៅកាន់ទីផ្សារក្នុងតំតំបន់ និងអន្តរជាតិ។ ជាមួយនឹងជំនាញ និងបទពិសោធន៍ដ៏ច្រើនក្នុងវិស័យធនាគារ និងហិរញ្ញវត្ថុ លោកបានអភិវឌ្ឍបន្តនូវរចនាសម្ព័ន្ធរបស់ Canadia Group ដោយមាន Canadia Investment Holding ដែលជាក្រុមហ៊ុនបុត្រសម្ព័ន្ធហិរញ្ញវត្ថុ និង OCIC ក្រុមហ៊ុនអភិវឌ្ឍលើវិស័យហេដ្ឋារចនាសម្ព័ន្ធ អចលនទ្រព្យ សុខាភិបាល និងអប់រំ ដោយផ្តោតសំខាន់លើអតិថិជន និងសហគមន៍ទាំងមូល។
បច្ចុប្បន្ននេះ OCIC បន្តដើរតួនាទីសំខាន់ក្នុងការកសាងហេដ្ឋារចនាសម្ព័ន្ធរួមមាន អាកាសយានដ្ឋានអន្តរជាតិតេជោ (Techo International Airport) ដែលជាគម្រោងដ៏ធំបំផុតរបស់ក្រុមហ៊ុន ដែលត្រូវបានសាងសង់ឡើងដើម្បីគាំទ្រដល់ការតភ្ជាប់អន្តរជាតិ និងជម្រុញសកម្មភាពសេដ្ឋកិច្ចរយៈពេលវែងនៃកម្ពុជា។
ក្រុមហ៊ុន OCIC បានបញ្ជាក់បន្ថែមថា ក្នុងរយៈពេលជាច្រើនទស្សវត្សរ៍មកនេះ លោកអ្នកឧកញ៉ា បានចូលរួមយ៉ាងជិតស្និទ្ធក្នុងការអភិវឌ្ឍប្រទេស ដោយជម្រុញការសាងសង់ប្រកបដោយទំនួលខុសត្រូវ ការវិនិយោគឡើងវិញក្នុងមូលដ្ឋាន និងការគិតរយៈពេលវែងលើវិស័យសំណង់ វិស្វកម្ម និងការអភិវឌ្ឍអចលនទ្រព្យ ដើម្បីបង្កើតកន្លែង និងឱកាសដែលលើកកម្ពស់គុណភាពជីវិតសម្រាប់បច្ចុប្បន្ន និងអនាគត។ ដោយផ្តោតយ៉ាងខ្លាំងលើការអភិវឌ្ឍធនធានមនុស្ស និងមានចំណង់ចំណូលចិត្តពិតប្រាកដចំពោះការសាងសង់ លោកអ្នកឧកញ៉ានៅតែចូលរួមយ៉ាងជិតស្និទ្ធក្នុងការរចនា និងអនុវត្តគម្រោង លើកទឹកចិត្តក្រុមការងារ ឱ្យមានគោលដៅខ្ពស់ កែលម្អជាបន្តបន្ទាប់ និងបម្រើអតិថិជនឱ្យកាន់តែប្រសើរ៕
