លោក Alaeddin Boroujerdi សមាជិកសភានៃគណៈកម្មាធិការសន្តិសុខជាតិ និងគោលនយោបាយការបរទេសរបស់សភាអ៊ីរ៉ង់ បាននិយាយថា រដ្ឋាភិបាលទីក្រុងតេអេរ៉ង់ ចាប់ផ្តើមគិតថ្លៃសេវាលើនាវាមួយចំនួន នៅក្នុងតម្លៃ ២លានដុល្លារសម្រាប់ការឆ្លងកាត់ច្រកសមុទ្រ Hormuz។ នេះបើតាមការចុះផ្សាយពីសារព័ត៌មាន The Times។
លោក Boroujerdi បាននិយាយប្រាប់ទៅកាន់ប្រព័ន្ធផ្សព្វផ្សាយមួយរបស់អ៊ីរ៉ង់ថា៖” “ការប្រមូលថ្លៃសេវាចំនួន ២លានដុល្លារ សម្រាប់នាវាមួយចំនួនននេះ គឺដើម្បីធានាបានថាពួកគេអាចឆ្លងកាត់ច្រកសមុទ្រដ៏សំខាន់នេះ បានដោយសុវត្ថិភាព ជាមួយកងកម្លាំងដ៏អស្ចារ្យរបស់អ៊ីរ៉ង់”។
គួរឲ្យដឹងថា ចាប់តាំងពីដើមខែមីនាមក អ៊ីរ៉ង់បានបិទច្រកសមុទ្រ Hormuz យ៉ាងមានប្រសិទ្ធភាពចំពោះនាវាភាគច្រើន ដែលជាផ្លូវដឹកជញ្ជូនប្រេងដ៏សំខាន់មួយដែលជាធម្មតាគ្រប់គ្រងប្រហែល ២០ លានបារ៉ែលក្នុងមួយថ្ងៃ និងប្រហែល ២០% នៃការជួញដូរឧស្ម័នធម្មជាតិរាវទូទាំងពិភពលោក។
ការបិទនេះបានជំរុញឲ្យថ្លៃដឹកជញ្ជូន និងថ្លៃធានារ៉ាប់រងកើនឡើងយ៉ាងខ្លាំង ដែលធ្វើឲ្យតម្លៃប្រេងហក់ឡើងខ្ពស់ និងបង្កើនការព្រួយបារម្ភអំពីសេដ្ឋកិច្ចពិភពលោក។
ជម្រាបជូនថា ការកើនឡើងនៃជម្លោះក្នុងតំបន់បានបន្តកើនឡើងចាប់តាំងពីសហរដ្ឋអាមេរិក និងអ៊ីស្រាអែលបានបើកការវាយលុករួមគ្នាលើអ៊ីរ៉ង់កាលពីថ្ងៃទី២៨ ខែកុម្ភៈ មក ដោយក្នុងនោះបានសម្លាប់មនុស្សជាង ១ ៣០០ នាក់រហូតមកដល់ពេលនេះ រួមទាំងមេដឹកនាំកំពូលអ៊ីរ៉ង់ លោក Ali Khamenei ផងដែរ៕
