ឧកញ៉ា ហ៊ួត ជា អគ្គនាយកក្រុមហ៊ុនសំណង់ ហ៊ួត ជា គ្រុប នៅព្រឹកថ្ងៃទី៣១ ខែមីនា ឆ្នាំ២០២៦នេះ បានចែករំលែកបទពិសោធន៍ផ្ទាល់ខ្លួនទាក់ទងនឹងការរស់នៅប្រចាំថ្ងៃ ដើម្បីជួយឱ្យមានសុខភាពល្អ រួមមានទាំងការថែទាំសុខភាពផ្លូវចិត្ត និងរាងកាយ។
តាមរយៈវីដេអូឃ្លីបលើបណ្តាញសង្គម លោកឧកញ៉ាអគ្គនាយក បានលើកឡើងថា មកដល់ពេលនេះយើងបានឆ្លងកាត់ឧបសគ្គជាច្រើន ហើយឧបសគ្គទាំងអស់នេះបានបង្រៀនលោកយ៉ាងជោគជាំ ដូចជាព្រឹត្តិការណ៍កើតមានជំងឺកូវីដ-១៩ វិបត្តិសេដ្ឋកិច្ចសកល សង្គ្រាមរុស្សី-អ៊ុយក្រែន សង្គ្រាមកម្ពុជា-ថៃ និងសង្គ្រាមនៅតំបន់មជ្ឈឹមបូព៌ា។ ទោះបីឆ្លងកាត់រឿងរ៉ាវជាច្រើននេះ លោកឧកញ៉ាបានថែទាំផ្លូវចិត្ត និងបានថែទាំសុខភាពផ្លូវកាយបានយ៉ាងល្អ។
លោកឧកញ៉ា បានបន្តថា ចំពោះសុខភាពផ្លូវកាយ រួមមានការសមាធិ ហាត់ប្រាណ ញ៉ាំអាហារល្អៗ គិតអ្វីវិជ្ជមាន និងមានគោលដៅច្បាស់លាស់ ហើយជារៀងរាល់ព្រឹក លោកឧកញ៉ា បានដើរហាត់ប្រាណជាង ១ម៉ោង ឬស្មើ ៧,២គីឡូម៉ែត្រ។ លោកឧកញ៉ា បានបន្ថែមថា ដូច្នេះមុនធ្វើអ្វីក៏ដោយ យើងត្រូវគិតបារម្ភពីកត្តាសុខភាពរបស់ខ្លួនជាមុនសិន។
សូមជម្រាបថា លោកឧកញ៉ា ហ៊ួត ជា គឺជាអគ្គនាយកក្រុមហ៊ុនសំណង់ ហ៊ួត ជា គ្រុប, ប្រធានសមាគមជាងសំណង់កម្ពុជា និងជាសមាជិកសមាគមឧកញ៉ាកម្ពុជា។ លោកឧកញ៉ា បានបង្កើតក្រុមហ៊ុន ហ៊ួត ជា គ្រុប រយៈពេលប្រមាណ ១៦ឆ្នាំមកហើយ។ បច្ចុប្បន្ន ក្រុមហ៊ុនផ្គត់ផ្គង់គ្រឿងសំណង់មួយនេះ កំពុងទទួលបានការគាំទ្រពីសំណាក់អតិថិជនយ៉ាងច្រើន ដោយសារកត្តាគុណភាព និងតម្លៃសមរម្យ ជាពិសេសមានការនាំចូលពីក្រៅប្រទេសយ៉ាងប្រណីតៗផងដែរ៕
