ឥណ្ឌូណេស៊ី កំពុងរៀបចំផែនការសម្រាប់កម្មវិធីអភិវឌ្ឍថាមពលពន្លឺព្រះអាទិត្យដ៏ធំបំផុតរបស់ពិភពលោក ដែលមានសមត្ថភាពកំណត់គោលដៅរហូតដល់ ១០០ ជីហ្គាវ៉ាត់ (GW) ជាមួយនឹងទុនវិនិយោគសរុបប្រមាណ ៧១,៣ពាន់លានដុល្លារ។ នេះបើតាមនការចុះផ្សាុយពីសារព័ត៌មាន VNA។
ក្រសួងថាមពល និងធនធានរ៉ែឥណ្ឌូណេស៊ី (ESDM) បាននិយាយថា ខ្លួនបានសម្របសម្រួលជាមួយក្រសួងកិច្ចការកសិកម្ម និងផែនការលំហ ដើម្បីរៀបចំដីប្រហែល ២៤ ០០០ ហិកតានៅលើកោះជ្វា សម្រាប់គម្រោងថាមពលព្រះអាទិត្យទ្រង់ទ្រាយធំ។
អនុរដ្ឋមន្ត្រីក្រសួងថាមពល និងធនធានរ៉ែ លោក Yuliot Tanjung បាននិយាយថា អាជ្ញាធរបានបញ្ចប់ការវាយតម្លៃដីធ្លី និងបានកំណត់តំបន់គ្រប់គ្រាន់សម្រាប់កម្មវិធីអភិវឌ្ឍថាមពលព្រះអាទិត្យរួចរាល់ហើយ។ ដោយនៅដំណាក់កាលដំបូង រដ្ឋាភិបាល នឹងផ្តល់អាទិភាពដល់គម្រោងដែលមានសមត្ថភាពរួមប្រហែល ១៧ ជីហ្គាវ៉ាត់។
គួរជម្រាបជូនផងដែរថា គម្រោងនេះគឺជាផ្នែកមួយនៃយុទ្ធសាស្ត្រផ្លាស់ប្តូរថាមពលដ៏ទូលំទូលាយរបស់ប្រទេសឥណ្ឌូណេស៊ី។ ដោយមុននេះ ប្រធានាធិបតី លោក Prabowo Subianto បានកំណត់គោលដៅនៃការអភិវឌ្ឍថាមពលពន្លឺព្រះអាទិត្យឲ្យបានចំនួន ១០០ GW នៅចន្លោះឆ្នាំ២០២៦ ដល់ឆ្នាំ២០២៨៕
