ការផ្តល់ទឹកស្អាត និងការលើកកម្ពស់អនាម័យនៅតាមសាលារៀន នៅតែជាសសរស្ដម្ភដ៏សំខាន់ក្នុងការជំរុញគុណភាពអប់រំ និងសុខភាពរបស់ទំពាំងស្នងឫស្សីកម្ពុជា។ នៅក្នុងឱកាសដ៏វិសេសវិសាលនៃពិធីអបអរសាទរខួបអនុស្សាវរីយ៍គម្រប់ ២១ឆ្នាំ នៃការបង្កើតអង្គការទឹកស្អាត១០០១ ប្រចាំនៅកម្ពុជា ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានសម្តែងនូវការវាយតម្លៃខ្ពស់បំផុត ចំពោះសមិទ្ធផលគួរឱ្យមោទនៈ និងកិច្ចសហប្រតិបត្តិការដ៏ស្អិតរមួតរវាងអង្គការ ជាមួយក្រុមការងារក្រោមឱវាទក្រសួង ក៏ដូចជាសាលារៀននៅតាមបណ្តាខេត្តនានា។
ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានគូសបញ្ជាក់ចំពោះមុខលោកស្រី Meas Depuis Anne Sarinn ប្រធានក្រុមប្រឹក្សាភិបាល អង្គការទឹកស្អាត១០០១ នាថ្ងៃទី៨មិថុនាយ៉ាងច្បាស់ពីសារៈសំខាន់មិនអាចខ្វះបាន និងភាពចាំបាច់បំផុតនៃការប្រើប្រាស់ទឹកស្អាត ទាំងសម្រាប់ការបរិភោគប្រចាំថ្ងៃ និងសម្រាប់កិច្ចការអនាម័យ។ ការទទួលបានទឹកស្អាតប្រើប្រាស់គ្រប់គ្រាន់ គឺជាគន្លឹះក្នុងការកសាងសុខភាពរឹងមាំសម្រាប់កុមារ និងសហគមន៍ ហើយទន្ទឹមនឹងនេះ វាក៏បានចូលរួមចំណែកយ៉ាងធំធេងក្នុងការកាត់បន្ថយ និងសម្រាលបន្ទុកចំណាយប្រចាំថ្ងៃរបស់ក្រុមគ្រួសារនៅតាមជនបទផងដែរ។
ឈរលើស្មារតីយោគយល់ និងទស្សនវិស័យវែងឆ្ងាយនេះ ឯកឧត្តមបណ្ឌិតសភាចារ្យ បានប្រកាសគាំទ្រយ៉ាងពេញទំហឹងចំពោះការបន្តអនុស្សរណៈនៃការយោគយល់គ្នា (MoU) រវាងក្រសួងអប់រំ យុវជន និងកីឡា និងអង្គការទឹកស្អាត១០០១។ ការបន្តកិច្ចព្រមព្រៀងនេះ ធ្វើឡើងក្នុងគោលបំណងពង្រឹង និងពង្រីកវិសាលភាពនៃការអនុវត្តកម្មវិធីស្នូលចំនួនបី រួមមាន ទីមួយ គម្រោង «ទឹកស្អាតសម្រាប់សាលារៀន» (Water for Schools) ទីពីរ ការលើកកម្ពស់ការយល់ដឹងពីអនាម័យ និងទឹកស្អាត (WASH Education) និងទីបី ការចូលរួមចំណែកយ៉ាងសកម្មក្នុងផែនការសកម្មភាពជាតិស្តីពីការផ្គត់ផ្គង់ទឹក និងការសម្អាត។
ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានគូសបញ្ជាក់ថា ផ្លែផ្កានៃកិច្ចសហប្រតិបត្តិការប្រកបដោយផ្លែផ្ការវាងស្ថាប័នទាំងពីរក្នុងរយៈពេលកន្លងមកនេះ ពិតជាបានចូលរួមចំណែកយ៉ាងពិតប្រាកដក្នុងការកាត់បន្ថយអត្រាអវត្តមានរបស់សិស្សានុសិស្សនៅតាមសាលារៀន និងបានលើកកម្ពស់សុខុមាលភាពកុមារ តាមរយៈការផ្តល់ទឹកស្អាតដែលជាតម្រូវការមូលដ្ឋានគ្រឹះនៃជីវិត ព្រមទាំងការអប់រំដាស់តឿនស្មារតី «អនាម័យ» នៅតាមសាលារៀនក្នុងខេត្តគោលដៅជាច្រើននៅទូទាំងប្រទេសកម្ពុជា៕
