កម្ពុជា-ចិន បានកំពុងជំរុញកិច្ចសហប្រតិបត្តិការតភ្ជាប់ជើងហោះហើរត្រង់រវាងរាជធានីភ្នំពេញ និងទីក្រុងហៃគូ និងការសិក្សាបន្ថែមលើផ្លូវហោះហើររវាងខេត្តសៀមរាប និងទីក្រុងហៃគូ សំដៅទាក់ទាញកំណើនទេសចរណ៍។នេះបើយោងតាមជំនួបពិភាក្សាការងាររវាងថ្នាក់ដឹកនាំខេត្តសៀមរាប លោក សុខ ថុល អភិបាលរងខេត្តសៀមរាប ជាមួយគណៈប្រតិភូចិន ដឹកនាំដោយ លោក Li Guo Hong អ្នកគ្រប់គ្រង់ទូទៅក្រុមហ៊ុនHainan Development Holdings Co., Ltd កាលថ្ងៃទី៩ ខែមិថុនា ឆ្នាំ២០២៦។
ជំនួបពិភាក្សានេះ ក្នុងគោលបំណងដើម្បីស្វែងយល់អំពីកិច្ចសហប្រតិបត្តិការតភ្ជាប់ជើងហោះហើរត្រង់រវាងរាជធានីភ្នំពេញ និងទីក្រុងហៃគូ និងការសិក្សាបន្ថែមលើផ្លូវហោះហើររវាងខេត្តសៀមរាប និងទីក្រុងហៃគូ តាមរយៈការចុះហត្ថលេខាលើអនុស្សរណៈ នៃការយោគយល់គ្នា រវាងក្រុមហ៊ុនអាកាសចរណ៍ Air Cambodia និងអាកាសយានដ្ឋានអន្តរជាតិហៃណាន (Hainan Airport) ដើម្បីជំរុញការផ្លាស់ប្ដូរទេសចរណ៍រវាងព្រះរាជាណាចក្រកម្ពុជា និងខេត្តហៃណាន នៃសាធារណរដ្ឋប្រជាមានិតចិន។
ក្នុងឱកាសនៃកិច្ចពិភាក្សានោះដែរ លោក សុខ ថុល អភិបាលរងខេត្ត ក៏បានថ្លែងអំណរគុណយ៉ាងជ្រាលជ្រៅចំពោះគណៈប្រតិភូក្រុមហ៊ុន Hainan Development Holdings Co., Ltd ដែលបានចំណាយពេលវេលាក៏មានតម្លៃសម្រាប់ជំនួបសម្តែងការគួរសម និងពិភាក្សាការងារដ៏មានសារៈសំខាន់នេះ ហើយក៏សូមស្វាគមន៍ និងគាំទ្រជានិច្ចនូវរាល់កិច្ចសហប្រតិបត្តិការលើការអនុវត្តគម្រោងទាំងអស់របស់ក្រុមហ៊ុននាពេលអនាគត។
សូមរម្លឹកដែរថា បើគិតត្រឹមរយៈពេល៤ខែ ឆ្នាំ២០២៦នេះ កម្ពុជាទទួលបានអ្នកដំណើរតាមផ្លូវអាកាសជាង ២លាននាក់ ថយចុះ៤% បើធៀបទៅនឹងរយៈពេល ៤ខែដូចគ្នា ឆ្នាំ២០២៥។ នេះបើតាមការបញ្ជាក់ឲ្យដឹងពីលោក ស៊ីន ចាន់សិរីវុត្ថា រដ្ឋលេខាធិការ និងជាអ្នកនាំពាក្យអាកាសចរស៊ីវិល កាលពីពេលថ្មីៗនេះ៕
