ក្រសួងសេដ្ឋកិច្ច និងហិរញ្ញវត្ថុ ព្រមទាំងភាគីពាក់ព័ន្ធ បានបើកកិច្ចប្រជុំពិភាក្សាគ្នា ដើម្បីស្វែងរកវិធានការគាំទ្រក្រុមហ៊ុនអាកាសចរណ៍ជាតិកម្ពុជាឱ្យកាន់តែប្រសើរថែមទៀត។
កិច្ចប្រជុំនេះបានធ្វើឡើងនារសៀលថ្ងៃទី២ ខែកក្កដា ឆ្នាំ ២០២៦ នៅទីស្តីការក្រសួងសេដ្ឋកិច្ច និងហិរញ្ញវត្ថុ ក្រោមការដឹកនាំដោយ លោក ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ ដោយមានការអញ្ជើញចូលរួមពីតំណាងក្រសួងស្ថាប័នពាក់ព័ន្ធ និងក្រុមហ៊ុនវិនិយោគព្រលានយន្តហោះកម្ពុជា ។
នាឱកាសនោះ លោក ហ៊ាន សាហ៊ីប បានបញ្ជាក់ជូនអង្គប្រជុំអំពីវឌ្ឍនភាពសំខាន់ៗ របស់ក្រុមហ៊ុនអាកាសចរណ៍ជាតិកម្ពុជា ក្នុងនោះ ក្រុមហ៊ុនបានរៀបចំផែនការអភិវឌ្ឍន៍ ដោយផ្តោតសំខាន់លើការបណ្តុះបណ្តាលជំនាញ ទន្ទឹមនឹងការអភិវឌ្ឍជើងហោះហើរថ្មីៗ និងការបញ្ជាទិញយន្តហោះថ្មីៗបន្ថែម សម្រាប់ប្រតិបត្តិការហោះហើររបស់ក្រុមហ៊ុន។
អង្គប្រជុំនេះ ក៏បានយល់ស្របគ្នាលើវិធានការសំខាន់ៗ ក្នុងការអនុវត្តរយៈពេលខ្លី សម្រាប់ស្នើសុំការសម្រេចពីថ្នាក់ដឹកនាំ ដើម្បីគាំទ្រដល់ប្រតិបត្តិការរបស់ក្រុមហ៊ុន ក្នុងការឆ្លើយតបនឹងស្ថានភាពសេដ្ឋកិច្ច និង វិស័យទេសចរណ៍ ក្នុងពិភពលោក តំបន់ និងកម្ពុជា។
សូមជម្រាបដែរថា រដ្ឋលេខាធិការដ្ឋានអាកាសចរណ៍ស៊ីវិលកម្ពុជា កាលពីថ្ងៃទី ១៩ ឧសភា ធ្លាប់បានបញ្ជាក់ថា រដ្ឋលេខាធិការដ្ឋានអាកាសចរណ៍ស៊ីវិលកម្ពុជាបានដាក់ផែនការជំរុញការអនុវត្តគោលនយោបាយជាតិ ២០២៥-២០៣៥ ដើម្បីដឹកអ្នកដំណើរតាមផ្លូវអាកាសឱ្យបាន ៨ លាននាក់ និងទំនិញចំនួន ១១២ ពាន់តោន នៅឆ្នាំ ២០២៦ ដោយសារមានតម្រូវការពាណិជ្ជកម្ម ទេសចរណ៍។ នេះបើតាមការបញ្ជាក់ពី លោកបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិលនៅថ្ងៃទី ១៩ ឧសភា ឆ្នាំ២០២៦៕ អត្ថបទ៖ហ្សាលីន
