ពូទីន អូសនាវាកម្សាន្តតម្លៃជាង ១០០លានដុល្លារ ទៅទុកនៅកំពង់ផែភាគខាងជើងប្រទេស ព្រោះខ្លាចអ៊ុយក្រែនបាញ់ឆេះ

នាវាកម្សាន្តដ៏ប្រណីតបំផុតមួយដែលត្រូវបានគេស្គាល់ថាជារបស់ប្រធានាធិបតីរុស្ស៊ី លោក វ្លាឌីមៀ ពូទីន ត្រូវបានគេប្រទះឃើញនៅកំពង់ផែ Severomorsk ជិតទីក្រុង Murmansk ភាគខាងជើងនៃប្រទេស។ នេះបើតាមការចុះផ្សាយពីសារព័ត៌មាន DR របស់ដាណឺម៉ាក។

យោងតាមប្រភពដដែលបានបង្ហាញឲ្យដឹងទៀតថា យោងតាមរូបភាពពីផ្កាយរណបបានបង្ហាញថា នាវាកម្សាន្តដ៏ប្រណីតឈ្មោះថា Graceful នេះ ត្រូវបានអមដំណើរដោយនាវាចម្បាំង Voyevoda ជាមួយនឹងការដំណើរដោយបិទឧបករណ៍បញ្ជូនសញ្ញា ក្នុងគោលបំណងការពារពីការវាយប្រហាររបស់សត្រូវ។

យ៉ាងណាមិញ ក្បួននាវានេះត្រូវបានគេប្រទះឃើញនៅឯឆ្នេរសមុទ្រដាណឺម៉ាកនៅចុងខែមិថុនា ដោយការបញ្ជូនសារមួយដែលបង្ហាញថាវាត្រូវបានគេឃើញកំពុងធ្វើដំណើរទៅកាន់ទីក្រុងអ៊ីស្តង់ប៊ុល និងបន្ទាប់មកបានឆ្លងកាត់តាមឆ្នេរសមុទ្រន័រវេស ហើយចូលទៅក្នុងដែនទឹករុស្ស៊ីរបស់វិញ។

ទន្ទឹមនឹងនេះ យោងតាមអ្នកជំនាញជឿជាក់ថា នាវា Graceful ដែលត្រូវបានប្តូរឈ្មោះទៅជា Kosatka បន្ទាប់ពីការចាប់ផ្តើមនៃសង្គ្រាមនេះ ត្រូវបានបញ្ជូនទៅកំពង់ផែ Severomorsk ដើម្បីការពារវាពីការវាយប្រហារដោយយន្តហោះគ្មានមនុស្សបើករបស់អ៊ុយក្រែន។

ជម្រាបជូនថា នាវា Graceful ដែលមានប្រវែង ៨២ ម៉ែត្រ ត្រូវបានចាត់ទុកថាជានាវាធំជាងគេទីពីរ (បន្ទាប់ពីនាវា Scheherazade ដែលមានប្រវែង ១៤០ ម៉ែត្រ) ដែលប្រើប្រាស់ដោយប្រធានាធិបតីរុស្ស៊ី។ ពីមុនវាត្រូវបានគេប្រទះឃើញញឹកញាប់នៅទីក្រុង Sochi នៅពេលដែលលោក ពូទីន សម្រាកនៅទីនោះ។ តម្លៃរបស់នាវានេះត្រូវបានប៉ាន់ប្រមាណថា ចន្លោះពី ១០០-១២០លានដុល្លារ៕​