រដ្ឋាភិបាលរបស់ប្រទេសប្រេស៊ីល បានស្នើសុំការពិគ្រោះយោបល់ជាមួយសហរដ្ឋអាមេរិកក្រោមប្រព័ន្ធដោះស្រាយវិវាទរបស់អង្គការពាណិជ្ជកម្មពិភពលោក (WTO) ជុំវិញពន្ធគយថ្មីដែលបានប្រកាសដោយរដ្ឋបាលប្រធានាធិបតី លោក ដូណាល់ ត្រាំ ក្នុងខែនេះ។ នេះបើតាមការចុះផ្សាយពីសារព័ត៌មាន Reuters។
សំណើនេះទាក់ទងនឹងពន្ធគយថ្មីចំនួន ២៥% ដែលដាក់ដោយសហរដ្ឋអាមេរិក លើការនាំចូលទំនិញប្រេស៊ីលមួយចំនួនសម្រាប់ការចោទប្រកាន់ពីការអនុវត្តពាណិជ្ជកម្មមិនយុត្តិធម៌ និងពន្ធគយរហូតដល់ ១២,៥% លើទំនិញពីប្រទេសរាប់សិប រួមទាំងប្រេស៊ីលផងដែរ ដែលជាប់ទាក់ទងនឹងការចោទប្រកាន់ពីការអនុវត្តច្បាប់ហាមឃាត់ការងារដោយបង្ខំ។
ប្រេស៊ីលបាននិយាយថា វិធានការទាំងនេះគឺ “មិនសមហេតុផល និងមិនស៊ីសង្វាក់គ្នា” ជាមួយនឹងកាតព្វកិច្ចរបស់សហរដ្ឋអាមេរិក ក្រោម “កិច្ចព្រមព្រៀងទូទៅស្តីពីពន្ធគយ និងពាណិជ្ជកម្មឆ្នាំ១៩៩៤” របស់អង្គការពាណិជ្ជកម្មពិភពលោក និង “ការយល់ដឹងអំពីច្បាប់ និងនីតិវិធីគ្រប់គ្រងការដោះស្រាយវិវាទ”។
មិនតែប៉ុណ្ណោះ រដ្ឋាភិបាលរបស់ប្រធានាធិបតី លោក Luiz Inacio Lula da Silva បាននិយាយរួចហើយថា ខ្លួននឹងលើកយកបញ្ហានេះទៅអង្គការ WTO។ ប្រេស៊ីលធ្លាប់បានចាត់វិធានការស្រដៀងគ្នានេះរួចហើយ កាលពីឆ្នាំមុន បន្ទាប់ពីមានការដាក់ចេញពន្ធគយជុំដំបូងរបស់លោក ត្រាំ ដែលក្រោយមកត្រូវបានលុបចោលវិញ ដោយតុលាការកំពូលសហរដ្ឋអាមេរិក៕
