ឧកញ៉ា តុង ហុកសេង ឪពុករបស់ស្ដ្រីអ្នកបើករថយន្ដបង្កឈ្មោះ សាម ម៉ីជូ បានព្រមព្រៀងប្រគល់ថវិកាចំនួន ៦ម៉ឺនដុល្លារអាមេរិក ជូនទៅឈ្មោះ គឿន ប៉ុន្នី ប្រពន្ធជនរងគ្រោះដែលស្លាប់ក្នុងគ្រោះថ្នាក់ចរាចរណ៍ និងបានព្រមព្រៀងសម្របសម្រួលបញ្ចប់វិវាទដោយស្មារតីគោរពរាប់អាន និងយោគយល់គ្នា នៅថ្ងៃទី៦ ខែសីហា ឆ្នាំ២០២៦ ម្សិលមិញនេះ។
ការសម្របសម្រួលនេះបានធ្វើឡើងនៅរសៀលថ្ងៃទី៦ ខែសីហា នៅសាលាឃុំខ្ចៅ ស្រុកកងមាស ខេត្តកំពង់ចាម ដោយមានការចូលរួមពីមន្រ្តីសាលាឃុំ និងមេធាវីផងដែរ។ គួរបញ្ជាក់ថានេះគ្រាន់តែជា សំណងផ្នែករដ្ឋប្បវេណីជូនក្រុមគ្រួសារជនរងគ្រោះតែប៉ុណ្ណោះ។ ដោយឡែកឈ្មោះ សាម ម៉ីជូ ជនបង្ករដែលកំពុងជាប់ឃុំនៅក្នុង ពន្ធនាគាររាជធានីភ្នំពេញ (PJ) នៅតែបន្តផ្ដន្ទាទោសផ្នែកព្រហ្មទណ្ឌតាមច្បាប់ដដែល។
គួររំឭកថា កាលពីយប់ថ្ងៃទី២៨ ខែកក្កដា ឆ្នាំ២០២៦ ករណីគ្រោះថ្នាក់ចរាចរណ៍មួយបានកើតឡើង នៅមុខផ្សារអីអន២ ដោយរថយន្តម៉ាក AVATR 11 បានបុកម៉ូតូបណ្ដាលឱ្យអ្នកបើកបរម៉ូតូស្លាប់។ ជនបង្កឈ្មោះ សាម ម៉ីជូ ភេទស្រី អាយុ ២៧ឆ្នាំ ត្រូវបានចោទប្រកាន់ពីបទបើកបរបង្កគ្រោះថ្នាក់ចរាចរណ៍បណ្ដាលឱ្យស្លាប់អ្នកដទៃ។ បន្ទាប់មក តំណាងអយ្យការ បានចោទប្រកាន់ឈ្មោះ សាម ម៉ីជូ ពីបទបើកបរបង្កគ្រោះថ្នាក់ចរាចរណ៍បណ្តាលឱ្យស្លាប់អ្នកដទៃ និងរត់គេចខ្លួន ហើយត្រូវតុលាការសម្រេចឃុំខ្លួននៅក្នុងពន្ធនាគារបណ្តោះអាសន្ន៕
