ស្ថាបនិកម៉ាកយីហោការ៉េមថៃ Hawell’s កំពុងប្រកាសដាក់លក់អាជីវកម្មរបស់ខ្លួន នៅក្នុងតម្លៃ ១៦៥លានបាត (៥លានដុល្លារអាមេរិក) ដើម្បីសម្រេចគោលបំណងចុងក្រោយ ក្នុងការបួសជាព្រះសង្ឃ និងលះបង់ជីវិតលោកិយ។
លោក Siripong Akkarasriyuk ប្រធានក្រុមហ៊ុន Hawell’s (Thailand) Co Ltd បានប្រកាសដាក់លក់អាជីវកម្មរបស់ខ្លួន នៅលើបណ្តាញសង្គមហ្វេសប៊ុក ដោយនិយាយថាលោកកំពុងស្វែងរកអ្នកស្នងតំណែងថ្មី និងដាក់តម្លៃក្រុមហ៊ុនចំនួន ៥លានដុល្លារ។ នេះបើយោងតាមកាសែត Bangkok Post។
លោក Siripong ដែលបានបង្កើតហាងការ៉េម Hawell’s ក្នុងឆ្នាំ១៩៩៩ បាននិយាយនៅក្នុងសារនោះថា លោកបានចំណាយពេលពីរឆ្នាំកន្លងមកនេះក្នុងការចរចាយ៉ាងទូលំទូលាយជាមួយផ្សារទំនើបដើម្បីបើកសាខាថ្មី ប៉ុន្តែត្រូវបានខាងគេប្រាប់ម្តងហើយម្តងទៀតថាគ្មានកន្លែងទំនេរទេ ទោះបីជាមានទីតាំងទំនេរ ក៏ផ្សារទាំងនោះមិនផ្តល់ជូនកន្លែងឲ្យផងដែរ។
ទន្ទឹមនឹងនេះ ការបើកហាងដាច់ដោយឡែក នឹងតម្រូវឱ្យមានការវិនិយោគច្រើន។ ដូច្នេះ ការផ្តល់សិទ្ធិផ្តាច់មុខត្រូវបានចាត់ទុកថាជាជម្រើសដ៏ល្អមួយ ប៉ុន្តែបន្ទាប់ពីការពិចារណាយ៉ាងហ្មត់ចត់ លោក Siripong បានសន្និដ្ឋានថា វាអាចនឹងបង្កើតបញ្ហាបន្ថែមទៀត និងអាចបង្កការខូចខាតដល់ម៉ាកយីហោរបស់ខ្លួន ដូច្នេះជម្រើសចុងក្រោយគឺមានតែលក់អាជីវកម្មទាំងស្រុង ហើយទៅបួសជាព្រះសង្ឃវិញ។
គួរជម្រាបជូនថា ជុំវិញការលំបាកទាំងនេះ បានកើតឡើងនៅពេលដែលដៃគូប្រកួតប្រជែងធំៗបានចាប់ផ្តើមចរចាលើកុងត្រាប្រើប្រាស់សិទ្ធផ្តាច់មុខជាមួយផ្សារទំនើបដើម្បីការពារដៃគូប្រកួតប្រជែងផ្ទាល់ពីការបើកសាខា។ បញ្ហានេះ បានបង្ខំឱ្យសាខារបស់ Hawell’s ស្ទើរតែទាំងអស់ត្រូវបិទ៕
