សាលាវេស្ទើនអន្តរជាតិ (Western International School) របស់ឧកញ៉ា តែ ឡូរិន បានបង្ហាញពីមោទនភាពយ៉ាងខ្លាំង បន្ទាប់ពីសិស្សានុសិស្សឆ្នើមថ្នាក់ទី១២ ចំនួន ៤៩ នាក់ ទទួលបាន និទ្ទេស “A” ក្នុងការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ឆ្នាំសិក្សា២០២៥–២០២៦ ទាំងការប្រឡងជាភាសាខ្មែរ និងភាសាអង់គ្លេស។
អ្វីដែលកាន់តែគួរឱ្យមោទនភាពនោះគឺ សិស្សានុសិស្សថ្នាក់ទី១២ របស់សាលាវេស្ទើនអន្តរជាតិ ចំនួន ៨៨% បានជ្រើសរើសប្រឡងផ្នែកវិទ្យាសាស្ត្រ ដែលជាផ្នែកមានកម្រិតប្រកួតប្រជែងខ្ពស់ និងទាមទារការខិតខំប្រឹងប្រែងខ្លាំង។
សមិទ្ធផលដ៏ឆ្នើមនេះ គឺជាផ្លែផ្កានៃ ការខិតខំប្រឹងប្រែង ការតស៊ូ វិន័យ និងការប្តេជ្ញាចិត្ត របស់ប្អូនៗ ព្រមទាំងការយកចិត្តទុកដាក់ពីលោកគ្រូ អ្នកគ្រូ និងការគាំទ្រយ៉ាងរឹងមាំពីមាតាបិតា និងអ្នកអាណាព្យាបាល។ សមិទ្ធផលដ៏គួរឱ្យមោទនភាពនេះ នឹងក្លាយជាមូលដ្ឋានដ៏រឹងមាំសម្រាប់ប្អូនៗ ក្នុងការបន្តក្តីស្រមៃ និងកសាងអនាគតដ៏ភ្លឺស្វាង និងជោគជ័យ។
សាលាវេស្ទើនអន្តរជាតិ បានបញ្ជាក់ថា លទ្ធផលឆ្នាំនេះ គឺជាសមិទ្ធផលដ៏អស្ចារ្យបំផុតមួយក្នុងប្រវត្តិសាស្ត្រ ២៣ឆ្នាំរបស់សាលា ដែលឆ្លុះបញ្ចាំងយ៉ាងច្បាស់ពីការខិតខំប្រឹងប្រែងរបស់សិស្សានុសិស្ស ការយកចិត្តទុកដាក់របស់លោកគ្រូ អ្នកគ្រូ ការគាំទ្ររបស់មាតាបិតា និងការបន្តពង្រឹងគុណភាពអប់រំរបស់សាលាឥតឈប់ឈរ។
លទ្ធផលដ៏គួរឱ្យមោទនភាពនេះ ក៏ជាសក្ខីភាពបញ្ជាក់ពី គុណភាព និងប្រសិទ្ធភាពនៃការអប់រំរបស់សាលាវេស្ទើនអន្តរជាតិ ដែលបានបង្កើតឡើងរយៈពេល ២៣ឆ្នាំ ហើយតែងតែបន្តអភិវឌ្ឍ និងលើកកម្ពស់ស្តង់ដារអប់រំ ដើម្បីផ្តល់ឱ្យសិស្សានុសិស្សនូវចំណេះដឹង សមត្ថភាព និងការត្រៀមខ្លួនដ៏រឹងមាំសម្រាប់អនាគត។
សូមជម្រាបថា សាលាវេស្ទើនអន្តរជាតិ (Western International School) គឺជាគ្រឹះស្ថានអប់រំឯកជនមួយដែលត្រូវបានបង្កើតឡើងដោយឧកញ៉ា តែ ឡូរិន នៅថ្ងៃទី ១ ខែកញ្ញា ឆ្នាំ២០០៣។ សាលានេះមានពាក្យស្លោកថា «ផ្តើមអនាគតរបស់អ្នកពីថ្ងៃនេះទៅ (Start Your Future Today)» ហើយបច្ចុប្បន្នប្រើប្រាស់កម្មវិធីសិក្សាតាមស្តង់ដារអាមេរិក ដែលបង្រៀនជាភាសាខ្មែរ និងភាសាអង់គ្លេស។ សាលាវេស្ទើនអន្តរជាតិ ផ្តល់ការអប់រំចាប់ពីថ្នាក់ទារកដ្ឋានរហូតដល់ថ្នាក់ទី១២។ ក្រៅពីសាលាវេស្ទើនអន្តរជាតិ ក៏មាន សាកលវិទ្យាល័យវេស្ទើន (Western University Cambodia) ដែលត្រូវបានបង្កើតឡើងក្នុងឆ្នាំ ២០០៣ ជាមួយគ្នា ខណៈដែលបច្ចុប្បន្ន មានសាខាជាច្រើននៅរាជធានីភ្នំពេញ និងបណ្តាខេត្តមួយចំនួនផងដែរ។
