ប៉ូលិសនៅរដ្ឋ Florida សហរដ្ឋអាមេរិក បានដាក់បង្ហាញយានយន្តមួយប្រភេទ ដែលត្រូវបានក្រុមហ៊ុនផលិតហៅវាថាជាឡានហោះល្បាតអគ្គិសនីដំបូងគេលើពិភពលោក។ យាននេះអាចហោះហើរក្នុងល្បឿន ១០១ គីឡូម៉ែត្រក្នុងមួយម៉ោង និងអាចហោះបានរយៈពេល ២០នាទីសម្រាប់ការសាកថ្មពេញមួយដង។
យោងតាមសារព័ត៌មាន Fox News បានរាយការណ៍ថា នាយកដ្ឋានប៉ូលិសនៃសាកលវិទ្យាល័យ Florida Polytechnic ក្នុងទីក្រុង Lakeland បានបញ្ចេញឡានហោះនេះ ជាលើកដំបូងកាលពីខែមុន។ យានដែលមានឈ្មោះថា «Astro» ដែលមានតម្លៃ ១៤៨ ០០០ដុល្លារនេះ ត្រូវបានគ្រោងនឹងប្រើប្រាស់សម្រាប់ការត្រួតពិនិត្យតំបន់ធំៗ ការឆ្លើយតបនឹងគ្រាអាសន្ន និងការធ្វើដំណើរទៅកាន់ទីតាំងនានាដែលយានយន្តល្បាតធម្មតាមិនអាចទៅដល់បាន។
គួរឲ្យដឹងថា Astro ត្រូវបានបង្កើតឡើងដោយក្រុមហ៊ុនអាកាសចរណ៍ឯក Jetson ដែលមានមូលដ្ឋាននៅរដ្ឋ California ។ វាត្រូវបានអភិវឌ្ឍដោយផ្អែកលើគំរូរថយន្តហោះ Jetson ONE និងប្រើប្រាស់បច្ចេកវិទ្យាអគ្គិសនីសម្រាប់ការហោះឡើង និងចុះចតតាមទម្រង់បញ្ឈរ (eVTOL) ដែលអនុញ្ញាតឱ្យវាហោះឡើង និងចុះចតបានដោយមិនចាំបាច់មានផ្លូវរត់ (runway) ឡើយ។
ជម្រាបជូនថា នៅក្នុងសេចក្តីប្រកាសមួយកាលពីថ្ងៃទី២០ ខែតុលា ក្រុមហ៊ុន Jetson បានពណ៌នា Astro ថាជាឡានប៉ូលិសហោះល្បាតអគ្គិសនីដំបូងគេបំផុតនៅលើពិភពលោក។ ទន្ទឹមនឹងនេះ នាយកដ្ឋានប៉ូលិស Florida Polytechnic ក៏នឹងក្លាយជាស្ថាប័នអនុវត្តច្បាប់ដំបូងគេនៅសហរដ្ឋអាមេរិក ដែលបានទទួលយកឡានហោះប្រភេទនេះមកប្រើប្រាស់ផងដែរ៕
