ក្រសួងការងារ និងបណ្តុះបណ្តាលវិជ្ជាជីវៈ សហការជាមួយទីភ្នាក់ងារជាតិមុខរបរ និងការងារ (NEA), បេឡាជាតិសន្តិសុខសង្គម (ប.ស.ស.) និងដៃគូពាក់ព័ន្ធ នឹងរៀបចំ «វេទិកាការងារ សន្តិសុខសង្គម និងបណ្តុះបណ្តាលវិជ្ជាជីវៈ» រយៈពេល ៣ថ្ងៃ ចាប់ពីថ្ងៃទី១៣ ដល់ថ្ងៃទី១៥ ខែវិច្ឆិកា ឆ្នាំ២០២៦ នៅខេត្តត្បូងឃ្មុំ ដោយនាំយកឱកាសការងារសរុបចំនួន ៩០,៨២៤ កន្លែង ជូនដល់ប្រជាពលរដ្ឋ យុវជន និងជាពិសេសអតីតពលករដែលទើបវិលត្រឡប់មកកម្ពុជាវិញ។
វេទិកាការងារនេះ នឹងបើកទទួលពាក្យ និងរៀបចំការសម្ភាសការងារផ្ទាល់ជាមួយតំណាងក្រុមហ៊ុន-សហគ្រាស ចាប់ពីម៉ោង ៨:០០ព្រឹក ដល់ម៉ោង ២:០០រសៀល នៅតាមទីតាំងគោលដៅចំនួន ៣ រួមមាន៖ ថ្ងៃសុក្រ ទី១៣ វិច្ឆិកា៖ នៅបរិវេណអាហារដ្ឋាន ក្សត្រា, ថ្ងៃសៅរ៍ ទី១៤ វិច្ឆិកា៖ នៅបរិវេណសាលាស្រុកពញាក្រែក, ថ្ងៃអាទិត្យ ទី១៥ វិច្ឆិកា៖ នៅបរិវេណសាលាស្រុកត្បូងឃ្មុំ។
ក្រោមស្មារតី «ខ្មែរជួយរកការងារ និងផ្តល់ការងារឱ្យខ្មែរ» បងប្អូនអតីតពលករ និងអ្នកស្វែងរកការងារដែលចូលរួមក្នុងកម្មវិធី នឹងទទួលបាននូវការសម្របសម្រួល និងគាំទ្រយ៉ាងយកចិត្តទុកដាក់ រួមមាន៖ សេវារថយន្តក្រុងដឹកជញ្ជូនទៅមក អាហារសម្រន់ និងភេសជ្ជៈ ដោយឥតគិតថ្លៃ ។
សាធារណជន និងបងប្អូនអតីតពលករដែលមានបំណងស្វែងរកការងារធ្វើ ឬមានចម្ងល់ផ្សេងៗ អាចទាក់ទងមកកាន់លេខទូរស័ព្ទទាន់ហេតុការណ៍ឥតគិតថ្លៃ ១២៩៧ (NEA) ឬ ១២៨៦ (ប.ស.ស.) ដើម្បីទទួលបានព័ត៌មានលម្អិតបន្ថែម៕
