នាថ្ងៃទី០៦ ខែវិច្ឆិកា ឆ្នាំ២០២៦ អ្នកឧកញ៉ា ភួ វាសនា ប្រធានសភាពាណិជ្ជកម្មខេត្តបាត់ដំបង សហការជាមួយសមាគមទាំង៨ ក្នុងខេត្តបាត់ដំបង បានរៀបចំកម្មវិធី «ជំនួបអាជីវករ សហគ្រិន» ក្រោមអធិបតីភាព លោក លាង វាសនា អភិបាលក្រុងបាត់ដំបង និងលោក គឹម ហួត ប្រធានមន្ទីរពាណិជ្ជកម្មខេត្តបាត់ដំបង។
ពិធីនេះក៏មានការអញ្ជើញចូលរួមពី ឧកញ៉ា អ៊ឹង វណ្ណម៉ៅ ប្រធានសភាពាណិជ្ជកម្មខេត្តបន្ទាយមានជ័យ, តំណាងសភាពាណិជ្ជកម្មខេត្តប៉ៃលិន, លោកប្រធានមន្ទីរវប្បធម៌ និងវិចិត្រសិល្ប: , លោកស្រី អនុប្រធានមន្ទីរ ឧ.វ.ប.ន ,លោកអនុប្រធានមន្ទីរទេសចរណ៍, លោកនាយកវិទ្យាស្ថាន, លោកអធិការក្រុង តំណាងសមាគមទាំង៧ អាជីវករ ពាណិជ្ជករ សហគ្រិន និងភ្ញៀវកិត្តិយស សរុបជាង១៧០នាក់ ក្នុងបរិយាកាសស្និទ្ធស្នាល និងពោរពេញដោយស្មារតីសាមគ្គីភាព។
បើតាមសភាពាណិជ្ជកម្មកម្ពុជា កម្មវិធីនេះមានគោលបំណងបង្កើត និងពង្រឹងបណ្តាញទំនាក់ទំនងរវាងអ្នកប្រកបអាជីវកម្ម លើកកម្ពស់ការចែករំលែកចំណេះដឹង បទពិសោធន៍ និងស្វែងរកឱកាសសហការអាជីវកម្មថ្មីៗ ព្រមទាំងជំរុញការចូលរួមពីវិស័យឯកជនក្នុងការអភិវឌ្ឍសេដ្ឋកិច្ចខេត្តបាត់ដំបង។
ជាពិសេស កម្មវិធីនេះក៏ជាវេទិកាដ៏មានសារៈសំខាន់សម្រាប់ការតភ្ជាប់ទំនាក់ទំនងរវាងសមាគម និងសហគ្រិន ព្រមទាំងបង្កើនភាពជាដៃគូរវាងអាជីវករ ដើម្បីរួមគ្នាបង្កើតឱកាសអាជីវកម្ម និងជំរុញការរីកចម្រើនប្រកបដោយចីរភាព។
សភាពាណិជ្ជកម្មខេត្តបាត់ដំបង បានសម្តែងសេចក្តីថ្លែងអំណរគុណយ៉ាងជ្រាលជ្រៅចំពោះគណៈអធិបតី សមាគមទាំង៨ អាជីវករ ពាណិជ្ជករ សហគ្រិន និងភ្ញៀវកិត្តិយសទាំងអស់ ដែលបានចូលរួម និងគាំទ្រឱ្យកម្មវិធីនេះប្រព្រឹត្តទៅដោយរលូន និងទទួលបានបរិយាកាសដ៏ល្អប្រសើរ។ សភាពាណិជ្ជកម្មខេត្តបាត់ដំបង រំពឹងថាកម្មវិធី «ជំនួបអាជីវករ សហគ្រិន» នឹងក្លាយជាវេទិកាដ៏មានតម្លៃសម្រាប់ការពង្រឹងសាមគ្គីភាព និងពង្រីកបណ្តាញអាជីវកម្ម ក៏ដូចជារួមគ្នាជំរុញសេដ្ឋកិច្ចក្នុងខេត្តបាត់ដំបង៕
