មកដឹងពីមុខម្ហូបពិសេសៗ ដែលប្រទេសចិន រៀបចំទទួលស្វាគមន៍មេដឹកនាំកំពូលៗ ក្នុងកិច្ចប្រជុំ APEC

អន្តរជាតិ

ប្រទេសចិន បានរៀបចំពិធីជប់លៀងអាហារយ៉ាងពិសេស ដើម្បីទទួលស្វាគមន៍មេដឹកនាំនៃបណ្តាប្រទេស និងតំបន់សេដ្ឋកិច្ចសមាជិក APEC ដោយមានការរៀបចំម្ហូបអាហារប្រពៃណីល្បីៗរបស់ខេត្តក្វាងទុង ដូចជា នំប៉ាវបែបចិន (Dimsum) ត្រីឆ្ពិនចំហុយជាមួយទឹកស៊ីអ៊ីវ រួមជាមួយម្ហូបបែបលោកខាងលិច និងស្រាទំពាំងបាយជូរផលិតក្នុងប្រទេសចិនផ្ទាល់ផងដែរ។

សូមចុច Subscribe Channel Telegram Oknha news គ្រប់សកម្មភាពឧកញ៉ា សេដ្ឋកិច្ច ពាណិជ្ជកម្ម និងសហគ្រិនភាព

ប្រធានាធិបតីចិន លោក ស៊ី ជិនពិង និងភរិយា លោកស្រី Peng Liyuan បានរៀបចំពិធីទទួលស្វាគមន៍មេដឹកនាំ APEC នៅល្ងាចថ្ងៃទី១៨ ខែវិច្ឆិកា នៅមជ្ឈមណ្ឌលទំនាក់ទំនងអន្តរជាតិទីក្រុង Shenzhen។ ម្ហូបអាហារនីមួយៗ និងកម្មវិធីតន្ត្រីដែលត្រូវបានជ្រើសរើស សុទ្ធតែមានអត្ថន័យ និងរឿងរ៉ាវរៀងៗខ្លួន។

ជាទូទៅ ពិធីជប់លៀងដែលប្រទេសចិនរៀបចំទទួលភ្ញៀវ តែងតែផ្តោតលើការបង្ហាញអត្តសញ្ញាណម្ហូបអាហារប្រពៃណីរបស់តំបន់នីមួយៗ។ សម្រាប់ពិធីជប់លៀងនៅទីក្រុង Shenzhen លើកនេះ មេដឹកនាំ APEC ត្រូវបានបម្រើអាហារសម្រន់ដំបូងដែលមានឈ្មោះថា «Pengcheng» ដែលជាឈ្មោះហៅក្រៅរបស់ទីក្រុង Shenzhen។

បន្ទាប់មក គឺមានមុខម្ហូបដូចខាងក្រោម៖

១. ស៊ុបក្រពះត្រីជាមួយផ្លែអូលីវបៃតង

២. បង្កងបំពងជាមួយទឹកជ្រលក់ខ្ទឹមបារាំង និងខ្ញី

៣. ត្រីឆ្ពិនចំហុយជាមួយទឹកស៊ីអ៊ីវ

៤. សាច់គោអាំងបែបស្តេក ជាមួយទឹកជ្រលក់ផ្សិត

៥. ផ្កាខាត់ណាខៀវឆាជាមួយផ្សិត និងទឹកជ្រលក់សាហ្វរ៉ុន (Saffron)

ម្ហូបទាំងនេះត្រូវបានបម្រើជាមួយស្រាទំពាំងបាយជូរផលិតនៅតំបន់ Ningxia ប្រទេសចិនផ្ទាល់។

ដោយឡែកសម្រាប់មុខម្ហូបចុងក្រោយ ភ្ញៀវកិត្តិយសត្រូវបានបម្រើដោយនំប៉ាវចិន Dimsum ចំនួន ៣ ប្រភេទ ដែលជាម្ហូបប្រពៃណីដ៏ល្បីរបស់ខេត្តក្វាងទុង។ ក្រៅពីនេះ ក៏មានបង្អែមសណ្តែកក្រហមជាមួយគ្រាប់ឈូក និងសំបកក្រូចស្ងួត ព្រមទាំងផ្លែឈើ ការ៉េម នំផ្អែម តែ និងកាហ្វេផងដែរ៕​