នាយករដ្ឋមន្ត្រីអង់គ្លេស លោក បូរីស ចនសុន បានបន្តបដិសេធមិនចុះចេញពីកៅអីនាយករដ្ឋមន្រ្តីទេនៅពេលនេះ ទោះបីរដ្ឋមន្រ្តីទាំង ៣ ក្រសួងរបស់លោកលាចុះពីតំណែងជាបន្តបន្ទាប់ក៏ដោយ។
រដ្ឋមន្ត្រីទាំង ៣ក្រសួងនោះ គឺរដ្ឋមន្រ្តីក្រសួងសុខាភិបាល និងរដ្ឋមន្រ្តីក្រសួងហិរញ្ញវត្ថុបានលាចុះពីតំណែងគួរឲ្យភ្ញាក់ផ្អើលនាយប់ថ្ងៃអង្គារ ទី៥ កក្កដា រដ្ឋលេខាធិការទទួលបន្ទុកកុមារ និងគ្រួសារបានលាចុះពីតំណែងក្នុងថ្ងៃពុធ ទី៦ កក្កដា ម្សិលមិញ។
បើតាមសារព័ត៌មានអន្តរជាតិជាច្រើនបានចុះផ្សាយថា មូលហេតុសំខាន់ដែលបានធ្វើឲ្យសមាជិករដ្ឋាភិបាលទាំង ៣រូបសម្រេចចិត្តលាចុះពីតំណែងពេលនេះ គឺមិនពេញចិត្តនឹងការដឹកនាំរបស់លោក បូរីស ចនសុន។
ទោះជាយ៉ាងនេះក្តី លោកចនសុន បានបន្តបដិសេធមិនលាចុះពីតំណែង ក្នុងថ្ងៃពុធ ទី៦ កក្កដានេះ។
គួរបញ្ជាក់ថា នាយករដ្ឋមន្រ្តី បូរីស ចនសុន កំពុងរួមរឹតដោយរឿងអាស្រូវជាច្រើនឡើងល្វីងមុខទៅហើយ។ ទី១ រឿងអាស្រូវដែលលោកបានរៀបចំពិធីជប់លៀងនៅក្នុងគេហដ្ឋាននាយករដ្ឋមន្រ្តី ខណៈដែលប្រទេសកំពុងស្ថិតក្នុងការបិទខ្ទប់ដោយកូវីដ១៩ កាលពីឆ្នាំ ២០២១។ ទី២ រឿងអាស្រូវផ្លូវភេទជាច្រើននៅក្នុងសភា ក្នុងនោះ មានតំណាងរាស្រ្តម្នាក់ដែលជាប់ចោទពីបទចាប់រំលោភត្រូវបានចាប់ខ្លួន រួចត្រូវបានដោះលែងបណ្តោះអាសន្ននៅពាក់កណ្តាលខែឧសភា និងតំណាងរាស្រ្តម្នាក់ទៀតបានលាចុះពីតំណែងក្នុងខែមេសា ក្រោយពីបានមើលកុនអាសអាភាសលើទូរស័ព្ទដៃនៅក្នុងសភា៕
