ប្រធានាធិបតីកូរ៉េខាងត្បូង លោក Yoon Suk Yeol និងភរិយា លោកស្រី Kim Keon Hee បានអញ្ជើញកុមារកម្ពុជា ឈ្មោះ អោក រដ្ឋា ដែលទទួលបានការវះកាត់បេះដូងជោគជ័យ នៅក្នុងប្រទេសកូរ៉េ ទៅកាន់ការិយាល័យប្រធានាធិបតី កាលពីថ្ងៃអង្គារ។
![](https://www.oknha.news/wp-content/uploads/2023/02/12.jpg)
បើតាមលោក Kim Eun-hye ប្រធានផ្នែកទំនាក់ទំនងសាធារណ:របស់ការិយាល័យប្រធានាធិបតី បាននិយាយនៅក្នុងសន្និសីទសារព័ត៌មាននាថ្ងៃនោះថា លោក Yoon និងជំទាវទីមួយរបស់កូរ៉េខាងត្បូង លោកស្រី Kim បានផ្តល់កិត្តិយស ដើម្បីជួបសំណេះសំណាលជាមួយកុមារា រដ្ឋា ដែលកំពុងរៀបចំធ្វើដំណើរត្រលប់ទៅផ្ទះ នៅប្រទេសកម្ពុជាវិញ បន្ទាប់ពីបញ្ចប់ការវះកាត់ជំងឺបេះដូងដោយជោគជ័យ ។
គួរឱ្យដឹងផងដែរថា លោកស្រី Kim បានជួបជាមួយ រដ្ឋា ជាលើកដំបូង នៅក្នុងប្រទេសកម្ពុជា កាលពីខែវិច្ឆិកា ឆ្នាំ ២០២២ កន្លងទៅ ក្នុងឱកាសដែលលោក Yoon បានធ្វើដំណើរមកកាន់តំបន់អាស៊ីអាគ្នេយ៍ ដើម្បីចូលរួមកិច្ចប្រជុំកំពូលអាស៊ាន និងកិច្ចប្រជុំកំពូល G20 ។
![](https://www.oknha.news/wp-content/uploads/2023/02/4.jpg)
រដ្ឋា ដែលកើតជំងឺបេះដូងពីកំណើត បានទទួលការវះកាត់រួចម្តងហើយ នៅប្រទេសកម្ពុជា ក្នុងឆ្នាំ ២០១៨ ប៉ុន្តែគេមិនបានបន្តទទួលបានការព្យាបាលទៀតនោះឡើយ ដោយសារស្ថានភាពគ្រួសារលំបាក ហើយត្រូវការវះកាត់បន្ថែម។
ដោយក្តីអាណិត លោកស្រី Kim ក៏បានសម្រេចចិត្តជួយ រដ្ឋា ឱ្យទទួលបានការវះកាត់ និងសម្រាកព្យាលបាល នៅមជ្ឈមណ្ឌលវេជ្ជសាស្រ្ត Asan ក្នុងទីក្រុងសេអ៊ូល ចាប់តាំងពីដើមខែធ្នូមក ។
យ៉ាងណាមិញ ជំនួបនៅក្នុងការិយាល័យប្រធានាធិបតី កាលពីថ្ងៃអង្គារកន្លងទៅនេះ គឺជាការសាទរចំពោះការវះកាត់ដោយជោគជ័យរបស់រដ្ឋា ដោយលោកស្រី Kim ក៏បានសម្តែងការដឹងគុណ និងកោតសរសើរចំពោះបុគ្គលិកពេទ្យ នៅមជ្ឈមណ្ឌលវេជ្ជសាស្ត្រ Asan ដែលបានខិតខំជួយកុមារកម្ពុជារូបនេះ ឱ្យជាសះស្បើយ។
ជាងនេះទៅទៀត មុនពេលវិលត្រលប់ទៅកាន់ប្រទេសកម្ពុជាវិញ លោក Yoon និងភរិយាក៏បានផ្តល់សម្ភារ:មួយចំនួន ទៅកាន់ រដ្ឋា ខណ:លោក Yoon ថែមទាំងបានឆ្លៀតចំណាយពេលលេងបាល់ទាត់ជាមួយរដ្ឋា នៅក្នុងបន្ទប់ការិយាល័យថែមទៀតផង៕
![](https://www.oknha.news/wp-content/uploads/2023/02/02012.jpg)
![](https://www.oknha.news/wp-content/uploads/2023/02/restmb_idxmake_a.jpg)