ក្រសួងសាធារណការ និងដឹកជញ្ជូន កាលថ្ងៃទី២៣ ខែមិថុនា ឆ្នាំ២០២២ បានចុះទស្សនកិច្ចសិក្សានៅទីស្នាក់ការ ក្រុមហ៊ុន Huawei Technologies (Cambodia) Co., LTD ស្ថិតនៅក្នុងអគារ Exchange Square ដើម្បីធ្វើការឈ្វេងយល់ពីបច្ចេកវិទ្យាថ្មីៗ និងផ្លាស់ប្តូរបទពិសោធន៍ការងារ ដើម្បីអភិវឌ្ឍន៍វិស័យដឹកជញ្ជូនកម្ពុជាឲ្យកាន់តែប្រសើរឡើង។
លោក ហ៊ាង សុទ្ធាយុត្តិ ដែលបានដឹកនាំទស្សនកិច្ចនេះ បានឲ្យដឹងថា ការជួបពិភាក្សា និងទស្សនកិច្ចនេះ មានគោលបំណង ដើម្បីធ្វើការឈ្វេងយល់ពីបច្ចេកវិទ្យាថ្មីៗ ផ្លាស់ប្តូរបទពិសោធន៍ ការងារផ្នែកបច្ចេកវិទ្យា ក្នុងវិស័យសាធារណការ និងដឹកជញ្ជូន និងពិនិត្យលទ្ធភាពធ្វើសហប្រតិបត្តិការ រវាងក្រសួង និងក្រុមហ៊ុន សំដៅជំរុញការផ្តល់សេវាសាធារណៈជូនប្រជាពលរដ្ឋ និងការគ្រប់គ្រងការងារកាន់តែប្រសើរ តាមការចង្អុលបង្ហាញរបស់ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន។
គួរបញ្ជាក់ថា តាមរយៈសកម្មភាពចុះទស្សនកិច្ចសិក្សាខាងលើនេះ តំណាងក្រុមហ៊ុន Huawei Technologies ក៏បានបញ្ជូនអ្នកជំនាញបច្ចេកទេសរបស់ខ្លួនចុះមកសិក្សាអំពីស្ថានភាព និងកត្តាកំពុងប្រឈមនានា ជុំវិញការប្រើប្រាស់ប្រព័ន្ធបច្ចេកវិទ្យា របស់ក្រសួងសាធារណការ និងដឹកជញ្ជូន ដើម្បីជាធាតុចូលក្នុងការផ្តល់រៀបចំជាចំណោះស្រាយដោយប្រើប្រាស់បច្ចេកវិទ្យាថ្មីៗនៅក្នុងវិស័យដឹកជញ្ជូនរបស់កម្ពុជាផងដែរ៕ ដោយ៖ពិសី
