សំណុំរឿងការលួចនាំប្រេងចេញពីកម្ពុជា ហើយត្រូវអាជ្ញាធរឥណ្ឌូនេស៊ីឃាត់បាន ឥឡូវកំពុងមានចំណុចវិជ្ជមាន ក្នុងដំណើរការ នៃការនាំប្រេង ដែលបានបាត់បង់យកមកវិញ។ នេះបើយោងតាម លោក ជៀប សួរ អគ្គនាយក អគ្គនាយកដ្ឋានប្រេងកាត នៃក្រសួងរ៉ែ និងថាមពល ក្នុងសន្និសីទសារព័ត៌មានស្តីពី «សមិទ្ធផលសម្រេចរយ:ពេល៥ឆ្នាំរបស់ក្រសួងរ៉ែ និងថាមពល ថ្ងៃទី៩ ខែសីហានេះ៕
គួរជម្រាបជូនថា យោធាជើងទឹកឥណ្ឌូណេស៊ីចាប់បាននាវាដឹកប្រេង និងឃាត់ខ្លួនមនុស្សជិត២០នាក់ ដែលត្រូវបានកម្ពុជាអះអាងថាបានលួចនាំប្រេងប្រមាណ៣០ម៉ឺនបារ៉ែលចេញពីកម្ពុជា នៅក្នុងសំណុំរឿងក្រុមហ៊ុន Kris Energy ដែលប្រកាសក្ស័យធន។
បើយោងទៅតាមទីភ្នាក់ងារព័ត៌មាន Reuters នាវាឈ្មោះ MT Strovolosនេះបានដឹកប្រេងឆៅប្រមាណ៣០ម៉ឺនបារ៉ែល ដែលមានតម្លៃប្រហែល២០លានដុល្លារនោះ ចេញពីប្លុកបូមប្រេងឈ្មោះអប្សរាក្នុងតំបន់ឈូងសមុទ្រថៃ កាលពីថ្ងៃទី២១ ខែឧសភា ២០២១ ដោយផ្អែកលើការយល់ស្របថាប្រេងនេះជាកម្មសិទ្ធិរបស់ក្រុមហ៊ុន Kris Energy ដែលបានជួលនាវា៕
