មិនទុកដីទំនេរចោល កសិករម្នាក់មានដីត្រឹមតែកន្លះហិកតា ដាំម្នាស់លក់ ចំណូលខ្ទង់ ៣ លាន ទៅ ៥ លានរៀល ក្នុងមួយរដូវ។
ស្ថិតក្នុងភូមិ របោះមង្គល ឃុំ របោះមង្គល ស្រុក មោងឬស្សី ខេត្ត បាត់ដំបង អ្នកស្រី នាង វួចលីន បានដាំម្នាស់នេះជាង ២ ឆ្នាំ មកហើយ ដែលពូជម្នាស់អ្នកស្រីជ្រើសរើសដាំជាប្រភេទម្នាស់ទឹកឃ្មុំ ស្រុកមោងឬស្សី ដែលពូជម្នាស់នេះដាំរយៈពេលចាប់ពី ៩ ទៅ ១០ ខែ អាចប្រមូលផលបាន ដោយក្នុងមួយឆ្នាំ ប្រមូលផលតែម្តង ហើយទុកដីរយៈពេល ២ ទៅ ៣ ខែទើបអាចភ្ជួរ រាស់ ដាំ បន្តទៀតបាន ។
អ្នកស្រី បានបន្តថា ចំពោះចំណូលដែលទទួលបានក្នុងមួយរដូវ ចន្លោះពី ២០០ ទៅ ៣០០ ឡូ ដោយមួយឡូមានតម្លៃ ១៨០០០ រៀល បើគិតជាទឹកលុយប្រមាណ ៣ ៦០ ០០០០ ទៅ ៥ ៤០ ០០០០ រៀល ។
ជាមួយគ្នានេះដែរ ហេតុផលដែលអ្នកស្រីដាំម្នាស់ពូជនេះ ដោយសារមើលឃើញថា វាមានភាពងាយស្រួលដាំ មិនពិបាកថែទាំ ដូចជា ការមិនចាំបាច់មានប្រព័ន្ធទឹក ដូចដំណាំដទៃឡើយ។ ចំណែកឯ ទីផ្សារវិញគឺមិនមានអ្វីចោទជាបញ្ហាទេ ព្រោះ ផ្លែម្នាស់ប្រភេទនេះសព្វថ្ងៃនៅមិនទាន់បំពេញតម្រូវការអតិថិជនគ្រប់គ្រាន់ទេ ពោលគឺ ងាយស្រួលក្នុងការលក់ចេញ ដល់ខែប្រមូលផល ឈ្មួញ អតិថិជន មកទិញដល់កន្លែង។
ទន្ទឹមនឹងនោះ កសិករវ័យក្មេងរូបនេះ មានការរំពឹង និង ជឿជាក់ថា ទៅអនាគតម្នាស់ទឹកឃ្មុំ ស្រុកមោងឬស្សី នៅតែមានទីផ្សារ មានតម្រូវការអតិថិជន ជានិរន្តរ ព្រោះ បច្ចុប្បន្ន គ្រប់បណ្តាខេត្ត ក្រុង មិនថាក្នុងផ្សារទំនើប ឬ ម៉ាត គឺតែងតែ ត្រូវការ ដោយទាំងផ្លែស្រស់ និង យកទៅកែច្នៃជាដើម មិនតែប៉ុណ្ណោះអតិថិជនដែលមានជីវភាព មិនសូវធូរធារ ក៏អាចទិញបាន នេះដោយសារតែផ្លែវាមានតម្លៃធូរថ្លៃជាងម្នាស់ដទៃ ៕
