កាលពីពេលថ្មីៗនេះ ក្រុមហ៊ុន CheckinMe ដែលជាក្រុមហ៊ុនបច្ចេកវិទ្យាគ្រប់គ្រងបុគ្គលិកដ៏ទំនើបក្នុងស្រុក និងក្រុមហ៊ុន Smart ដែលជាប្រតិបត្តិករទូរស័ព្ទចល័តឈានមុខគេរបស់កម្ពុជា បានចាប់ដៃគ្នាក្នុងភាពជាដៃគូក្នុងគោលបំណងធ្វើបដិវត្តន៍ និងឌីជីថលនីយកម្មលើប្រព័ន្ធធនធានមនុស្សនៅកម្ពុជា។
![](https://www.oknha.news/wp-content/uploads/2024/02/DSC_0958-1024x684.jpg)
ក្រុមហ៊ុនទាំងពីរបានសហការរៀបចំសិក្ខាសាលា “HR Go Digital” ដែលបានប្រព្រឹត្តទៅដោយជោគជ័យនៅថ្ងៃទី ២ ខែធ្នូ ឆ្នាំ ២០២៣ នៅភោជនីយដ្ឋាន ទន្លេបាសាក់ II ដោយមានការអញ្ជើញចូលរួមជាអធិបតីភាពពីអ្នកឧកញ៉ា វេជ្ជបណ្ឌិត គួច ម៉េងលី និងវាគ្មិនល្បីៗជាច្រើនរូប ។
![](https://www.oknha.news/wp-content/uploads/2024/02/DSC_0811-1024x684.jpg)
សិក្ខាសាលា “HR Go Digital” មានការចូលរួមយ៉ាងច្រើនលើសលប់នៃអ្នកចូលរួមជាង ១០០ នាក់ ដែលមានតួនាទីជាច្រើនដូចជា អ្នកគ្រប់គ្រងធនធានមនុស្ស ម្ចាស់អាជីវកម្ម និងអ្នកគ្រប់គ្រងផ្នែកលក់។ ព្រឹត្តិការណ៍នេះមិនត្រឹមតែបានទាក់ទាញអ្នកជំនាញក្នុងឧស្សាហកម្មប៉ុណ្តោះទេ ថែមទាំងផ្តល់នូវការយល់ដឹងដ៏មានតម្លៃខាងផ្នែកឌីជីថលនីយកម្មនៃការគ្រប់គ្រងធនធានមនុស្សផងដែរ។
ក្នុងអំឡុងពេលព្រឹត្តិការណ៍នេះ ក្រុមហ៊ុន Smart និង CheckinMe បានបង្កើតភាពជាដៃគូជាផ្លូវការ ជាមួយនឹងការចុះហត្ថលេខាលើអនុស្សរណៈនៃការយោគយល់គ្នា។ MoU នេះត្រូវបានចុះហត្ថលេខាដោយលោកស្រី Mila ប្រធានផ្នែកទីផ្សារនៃក្រុមហ៊ុន Smart និងលោក ឡី កំថូង ប្រធាននាយកប្រតិបត្តិ និងជាសហស្ថាបនិកនៃក្រុមហ៊ុន CheckinMe។
![](https://www.oknha.news/wp-content/uploads/2024/02/DSC_0954-1024x684.jpg)
តាមរយៈការសហការជាមួយក្រុមហ៊ុន Smart ដែលជាប្រតិបត្តិករទូរស័ព្ទចល័តឈានមុខគេរបស់កម្ពុជា។ ក្រុមហ៊ុន CheckinMe មានគោលបំណងពន្លឿនការទទួលយកការអនុវត្តធនធានមនុស្សបែបឌីជីថលនៅទូទាំងប្រទេសដោយជំរុញឱ្យមានផលិតភាព និងការប្រកួតប្រជែងកាន់តែខ្ពស់សម្រាប់អាជីវកម្មកម្ពុជា ដោយផ្តល់នូវបច្ចេកវិទ្យាទំនើប សម្រាប់ផ្នែកធនធានមនុស្សប្រកបដោយប្រសិទ្ធភាព និងងាយស្រួលប្រើប្រាស់ ។
លោកស្រី Mila ប្រធានផ្នែកទីផ្សារនៃក្រុមហ៊ុន Smart មានប្រសាសន៍ថា “យើងមានសេចក្តីរំភើបរីករាយដែលបានសហការជាមួយ CheckinMe ដោយសារយើងជឿជាក់យ៉ាងមុតមាំលើឥទ្ធិពលវិជ្ជមាន នៃដំណោះស្រាយបែបឌីជីថល។ សិក្ខាសាលានេះបង្ហាញពីការបើកទំព័រថ្មី សម្រាប់វិស័យធនធានមនុស្សនៅកម្ពុជាតាមរយៈបច្ចេកវិទ្យាដែលជំរុញប្រសិទ្ធភាពសម្រួលដល់ដំណើរការគ្រប់គ្រង និងជួយជំរុញអាជីវកម្មឱ្យកាន់តែមានភាពរីកចម្រើនក្នុងយុគសម័យឌីជីថល។
![](https://www.oknha.news/wp-content/uploads/2024/02/DSC9828-1024x684.jpg)
លោក ឡី កំថូង ប្រធាននាយកប្រតិបត្តិ និងជាសហស្ថាបនិកនៃក្រុមហ៊ុន CheckinMe បានសម្តែងនូវក្តីរីករាយដោយមានប្រសាសន៍ថា “យើងពិតជារំភើបក្នុងការចាប់ដៃគូជាមួយក្រុមហ៊ុន Smart និងរួមបញ្ចូលគ្នានូវជំនាញរបស់យើងដើម្បីធ្វើបដិវត្តន៍លើផ្នែកធនធានមនុស្សនៅកម្ពុជា។ ដំណោះស្រាយដ៏ទំនើបរបស់យើងនឹងជួយឱ្យអាជីវកម្មមានភាពប្រសើរឡើងលើដំណើរការធនធានមនុស្ស ធ្វើឱ្យមានភាពប្រសើរឡើងនូវការគ្រប់គ្រងបុគ្គលិក បង្កើនប្រសិទ្ធភាព និងផលិតភាពការងាររបស់អង្គភាពទាំងមូល។”
![](https://www.oknha.news/wp-content/uploads/2024/02/DSC9839-1024x684.jpg)
អ្នកឧកញ៉ា វេជ្ជបណ្ឌិត គួច ម៉េងលី ក៏បានថ្លែងថា “ពិតណាស់ ការចេះជំនាញឌីជីថល គឺជាកត្តាមួយសំខាន់ និង ជួយសម្រួលដល់កិច្ចការងារប្រចាំថ្ងៃ ចំណេញពេលវេលា ជាងការធ្វើតាមបែបបុរាណ។ អ្នកឧកញ៉ា បន្តថា ចំពោះម្ចាស់អាជីវកម្ម និងបុគ្គលិកគ្រប់ជាន់ថ្នាក់ គួរបង្កើនលើជំនាញ វិទ្យាសាស្រ្ត ឌីជីថល ដែលជាជំនាញមួយត្រូវនឹងបរិបទក្នុងសម័យកាលឌីជីថលនេះ។”
ភាពជាដៃគូរបស់ក្រុមហ៊ុន Smart និងក្រុមហ៊ុន CheckinMe បង្ហាញតាមរយៈភាពជោគជ័យនៃសិក្ខាសាលា “HR Go Digital” ដែលត្រួសត្រាយផ្លូវវិស័យធនធានមនុស្សទៅកាន់ឌីជីថលនៅកម្ពុជា។ ជាមួយនឹងចក្ខុវិស័យរួមគ្នានៃការផ្តល់ភាពងាយស្រួលដល់អាជីវកម្មតាមរយៈបច្ចេកវិទ្យាធនធានមនុស្សប្រកបដោយភាពច្នៃប្រឌិត កិច្ចសហការនេះចង្អុលបង្ហាញផ្លូវដល់អង្គភាពអំពីដំណើរការ និងការរីកចម្រើនលើផ្នែកធនធានមនុស្សក្នុងយុគសម័យឌីជីថល។
កុំភ្លេច ចូលរួមលើកម្ពស់អាជីវកម្មកម្ពុជា ជំរុញសេដ្ឋកិច្ចឌីជីថលនៅក្នុងប្រទេស “បច្ចេកវិទ្យាគ្រប់គ្រងបុគ្គលិក ឆែកអ៊ីនមី”។
![](https://www.oknha.news/wp-content/uploads/2024/02/DSC_1014-870x1024.jpg)
![](https://www.oknha.news/wp-content/uploads/2024/02/DSC_0996-820x1024.jpg)
![](https://www.oknha.news/wp-content/uploads/2024/02/DSC_0815-1024x684.jpg)
![](https://www.oknha.news/wp-content/uploads/2024/02/DSC_1021-1024x684.jpg)
![](https://www.oknha.news/wp-content/uploads/2024/02/DSC_0683-1024x684.jpg)
![](https://www.oknha.news/wp-content/uploads/2024/02/DSC_1073-1024x647.jpg)
![](https://www.oknha.news/wp-content/uploads/2024/02/DSC_1037-1024x684.jpg)