នាព្រឹកថ្ងៃអង្គារ ទី២៥ ខែវិច្ឆិកា ឆ្នាំ២០២៥ អ្នកឧកញ៉ា សៀ ឬទ្ធី អនុប្រធានសមាគមឧកញ៉ាកម្ពុជា និងជាប្រធានគណៈកម្មការទំនាក់ទំនងសាធារណៈ អន្តរជាតិ និងទេសចរណ៍ បានដឹកនាំ «កិច្ចប្រជុំអនុគណៈកម្មការទំនាក់ទំនង និងធុរកិច្ច (អទធ) លើកទី១ ឆ្នាំ២០២៥»។
កិច្ចប្រជុំនេះមានការចូលរួមពី អ្នកឧកញ៉ា គួន ធីតា អនុប្រធានសមាគម និងជាប្រធានអនុគណៈកម្មការ, អ្នកឧកញ៉ា ហ៊ុន ឡាក់ អគ្គលេខាធិការ និងជាអនុប្រធានអនុគណៈកម្មការ, ឧកញ៉ា សូ សុខប៊ុនលីម អនុប្រធានអនុគណៈកម្មការ, ឧកញ៉ា ជា ដាណា និងឧកញ៉ា ស៊ន សុទ្ធី ដែលជាសមាជិកអនុគណៈកម្មការ។ កិច្ចប្រជុំបានប្រពឹ្រត្តទៅនៅទីស្នាក់ការសមាគមឧកញ៉ាកម្ពុជា ដើម្បីពិភាក្សា និងផ្ដល់ធាតុចូលលើរបៀបវារៈសំខាន់ៗដូចខាងក្រោម៖
១. ការរៀបចំ «សន្និបាតលើកទី៣» របស់សមាគមឧកញ៉ាកម្ពុជា និង «ការរៀបចំវេទិកាធុរកិច្ចរវាងសមាគមឧកញ៉ាកម្ពុជា, សភាពាណិជ្ជកម្មចិននៅហុងកុង និងធុរជនចិន»។
២. ការរៀបចំផែនការសកម្មភាពទំនាក់ទំនង និងធុរកិច្ចសម្រាប់ឆ្នាំ២០២៦។
៣. ការរៀបចំពិធីជួបជុំ និងពិសាភោជនាហារសាមគ្គីនៃគ្រួសារសមាគមឧកញ៉ាកម្ពុជា។
កិច្ចប្រជុំនេះបានប្រព្រឹត្តទៅដោយរលូន ដោយមានការផ្លាស់ប្ដូរមតិយោបល់យ៉ាងផុសផុលពីសមាជិក និងសម្រេចបានលទ្ធផលវិជ្ជមាន សម្រាប់ជាផែនការសកម្មភាពអនុវត្តក្នុងឆ្នាំ២០២៦ ខាងមុខនេះ៕
