ឧកញ៉ា ទៀ វិចិត្រ ប្តេជ្ញាអនុវត្តន៍ឱ្យបានល្អលើការដឹកជញ្ជូនភ្ញៀវទេសចរណ៍តាមផ្លូវទឹក

កម្សាន្ត

រដ្ឋបាលខេត្តព្រះសីហនុ បើកកិច្ចប្រជុំ ជាមួយសមាគមភ្នាក់ងារដឹកជញ្ជូនទេសចរណ៍ជលយានខេត្តព្រះសីហនុ ដើម្បីពិភាក្សា អំពីផែនការអភិវឌ្ឍន៍ទិសដៅទេសចរណ៍ផ្លូវទឹក នៅថ្ងៃទី២៦ ខែមីនាម្សិលមិញ។

សូមចុច Subscribe Channel Telegram Oknha news គ្រប់សកម្មភាពឧកញ៉ា សេដ្ឋកិច្ច ពាណិជ្ជកម្ម និងសហគ្រិនភាព

លោក ម៉ាង ស៊ីណេត អភិបាលរងខេត្តព្រះសីហនុ បានបង្ហាញអំពីគោលបំណងសំខាន់របស់រដ្ឋបាលខេត្ត ដែលកំពុងជំរុញទិសដៅក្នុងការអភិវឌ្ឍន៍លេីវិស័យទេសចរណ៍ ក្នុងខេត្តព្រះសីហនុ ដើម្បីទាក់ទាញភ្ញៀវទេសចរណ៍ជាតិ និងអន្តរជាតិឱ្យធ្វេីដំណេីរកំសាន្តមកខេត្តព្រះសីហនុកាន់តែច្រើនឡើង ពិសេសការពង្រីកវិសាលភាពតំបន់ទេសចរណ៍តាមកោះនានាក្នុងខេត្តព្រះសីហនុ។

ជុំវិញទិសដៅនិងផែនការអភិវឌ្ឍន៍វិសយ័ទេសចរណ៍ផ្លូវទឹកក្នុងខេត្តព្រះសីហនុ ដែលរដ្ឋបាលខេត្តដាក់ចេញ ឧកញ៉ា ទៀ វិចិត្រ ប្រធានសមាគមភ្នាក់ងារដឹកជញ្ជូនទេសចរណ៍ជលយានខេត្តព្រះសីហនុ បានលើកឡើងថា ប្រតិបត្តិករទាំងអស់ក្នុងសមាគមភ្នាក់ងារដឹកជញ្ជូនទេសចរណ៍ជលយានខេត្តព្រះសីហនុ នឹងចូលរួមអនុវត្តន៍ឱ្យបានល្អ ពិសេសលើការដឹកជញ្ជូនភ្ញៀវ ទាំងសុវត្ថិភាពនិងការផ្តល់សេវាល្អ ដើម្បីឱ្យទីផ្សារទេសចរណ៍ក្នុងខេត្តព្រះសីហនុកាន់តែប្រសើរឡើង បន្ទាប់ពីវិបត្តិជំងឺកូវីដ១៩នៅកម្ពុជាបានធូរស្រាល តាមរយៈការខិតខំពីប្រមុខរាជរដ្ឋាភិបាលកម្ពុជា ពិសេសការស្វែងរកវ៉ាក់សាំងមកចាក់ជូនពលរដ្ឋទូទាំងប្រទេស។

គួររំលឹកផងដែរថា ក្នុងរយៈពេល ៣ថ្ងៃ នៃពីធីបុណ្យចូលឆ្នាំថ្មីប្រពៃណីចិន (២៤-២៥-២៦) ខេត្តព្រះសីហនុទាំងមូលទទួលបានភ្ញៀវទេសចរសរុបចំនួន ៨៧,៧៦៥នាក់ កើនឡើង ២៤.៥២% ក្នុងនោះមានភ្ញៀវជាតិ ៧៤,៤៩៥នាក់ និងភ្ញៀវអន្តរជាតិ ១៣,២៧០នាក់ (ថយចុះ ៤៨.៨០%)។

លើសពីនេះ វិស័យ​ទេសចរណ៍​ខេត្ត​ព្រះសីហនុ​នឹងមាន​ការប្រែប្រួល​មុខមាត់​ថ្មី ខណៈ​អាជ្ញាធរ និង​វិស័យ​ឯកជន​កំពុង​រួមគ្នា​ជំរុញ​ការអនុវត្ត​ផែនការ​អភិវឌ្ឍន៍​ទេសចរណ៍​ខេត្ត​ព្រះសីហនុ ២០២១-២០២៥ តាមរយៈ​ការដាក់ចេញ​នូវ​ផែនការ​អភិវឌ្ឍន៍​វិស័យ​ទេសចរណ៍​ជា​បន្តបន្ទាប់​៕