មួយរយៈកាលចុងក្រោយនេះ ក្រុមហ៊ុន TikTok បុត្រសម្ព័ន្ធក្រុមហ៊ុនខ្នាតយក្សនៅចិន ByteDance កំពុងទទួលរងព្យុះភ្លៀងពីបណ្ដាប្រទេសជាច្រើន ជាពិសេសនៅសហភាពអឺរ៉ុប និងនៅលោកខាងលិចតែម្ដង។
ថ្មីៗនេះ សហរដ្ឋអាមេរិកបានបើកកិច្ចប្រជុំជាបន្ទាន់ និងកោះហៅលោក Shou Zi Chew មកបកស្រាយ និងផ្ដល់ភស្តុតាងជុំវិញការសង្ស័យថា TikTok បានលួចទិន្នន័យអ្នកប្រើប្រាស់នៅអាមេរិក ១៥០លាននាក់ ទៅឲ្យរដ្ឋាភិបាលចិន។
យ៉ាងណា មកទល់ពេលនេះសេចក្ដីសម្រេចចុងក្រោយ ចំពោះការចង់បិទក្រុមហ៊ុន TikTok ទាំងស្រុងនៅអាមេរិក នៅមិនទាន់ចេញជាផ្លូវការឡើយ ប៉ុន្តែរដ្ឋាភិបាលបញ្ជាឲ្យមន្ត្រីរាជការទាំងអស់ត្រូវលុបកម្មវិធីមួយនេះ ចេញពីទូរស័ព្ទដៃពួកគេក្នុងរយៈពេល ៣០ថ្ងៃ។
ក្រៅពីអាមេរិកក៏នៅមានប្រទេសជាច្រើនទៀត សរុបច្រើនជាង ១០ប្រទេសដែលកំពុងបិទ TikTok ក្នុងមូលហេតុស្រដៀងៗគ្នានឹងអាមេរិក ពោលហាមមិនឲ្យមន្ត្រីរាជការប្រើប្រាស់កម្មវិធីចិន ដោយសារបារម្ភខ្លាចមានការលួចទិន្នន័យផ្ទាល់ខ្លួន។
ខាងក្រោមនេះគឺជាបញ្ជីឈ្មោះប្រទេស ដែល TikTokត្រូវបានហាមមិនឲ្យប្រើប្រាស់ ផ្អែកតាមការចុះផ្សាយពី Euronews៖
1/ចក្រភពអង់គ្លេស
2/ស្ថាប័នកំពូលទាំង ៣ នៃសហភាពអឺរ៉ុប (សភាអឺរ៉ុប គណៈកម្មការអឺរ៉ុប និងក្រុមប្រឹក្សាសហភាពអឺរ៉ុប)
3/ប្រទេសបារាំង
4/ប្រទេសហូឡង់
5/ប្រទេសន័រវែស
6/ប្រទេសនូវែលហ្សេឡង់
7/ប្រទេសប៊ែលហ្ស៉ិក
8/ប្រទេសដាណឺម៉ាក
9/សហរដ្ឋអាមេរិក
10/ប្រទេសកាណាដា
11/ប្រទេសឥណ្ឌា
12/កោះតៃវ៉ាន់
13/ប្រទេសប៉ាគីស្ថាន
14/ប្រទេសអាហ្វហ្គានីស្ថាន៕
