កំណើនសេដ្ឋកិច្ចក្នុងប្រទេសចិនមានការងើបឡើងជាខ្លាំងក្នុងខែមីនា បើធៀបនឹង ២ខែតំបូងនៃឆ្នាំ ២០២៣ ហើយមហាអំណាចសេដ្ឋកិច្ចទី២ លើលោក នឹងព្យាយាមពង្រីងតម្រូវការក្នុងស្រុកបន្ថែម និងពង្រឹងលើការងើបឡើងវិញចំពោះសេដ្ឋកិច្ចក្នុងស្រុក។ នេះបើតាមការអះអាងពីនាយករដ្ឋមន្ត្រីចិន Li Qiang។
ថ្លែងនៅក្នុងវេទិកា Boao Forum សម្រាប់អាស៊ី នាយករដ្ឋមន្ត្រីថ្មីបានទម្លាយថា មិនថាស្ថានភាពពិភពលោកមានការវិវឌ្ឍន៍យ៉ាងណានោះទេ ប្រទេសចិននឹងនៅតែប្តេជ្ញាចិត្តក្នុងការធ្វើកំណែទម្រង់ និងការបើកចំហរ។ នេះបើតាមការចុះផ្សាយពី Kelo។
លោក Li Qiang បាននិយាយថា៖ “បើមើលតាមស្ថានការណ៍សេដ្ឋកិច្ចក្នុងខែមីនា មានភាពល្អប្រសើរជាងកាលពីខែមករា និងកុម្ភៈ ជាពិសេស សូចនាករសេដ្ឋកិច្ចសំខាន់ៗ ដូចជាការប្រើប្រាស់ និងការវិនិយោគបន្តមានភាពប្រសើរឡើង ខណៈដែលការងារ និងតម្លៃជាទូទៅមានស្ថិរភាព”។
“ជំហានបន្ទាប់ យើងនឹងបន្តប្រកាន់ខ្ជាប់នូវគោលការណ៍ស្ថិរភាព ស្វែងរកវឌ្ឍនភាព ខណៈពេលដែលរក្សាបាននូវស្ថិរភាព បង្រួបបង្រួម និងពង្រីកសន្ទុះនៃការងើបឡើងវិញនៃសេដ្ឋកិច្ច និងជំរុញការធ្វើឱ្យប្រសើរឡើងជាបន្តនៃដំណើរការសេដ្ឋកិច្ចរបស់ប្រទេសចិន”។
សូមជម្រាបដែរថា ប្រទេសចិនដែលជាមហាអំណាចសេដ្ឋកិច្ចធំបំផុតទី២ គឺកំពុងមានសន្ទុះងើបឡើងវិញ បន្ទាប់ពីសេដ្ឋកិច្ចប្រទេសមួយនេះជួបវិបត្តិរ៉ាំរ៉ៃអស់រយៈពេលរាប់ឆ្នាំ ដោយសារជំងឹរាតត្បាតកូវីដ ១៩ និងបានកំណត់គោលដៅ បង្កើនកំណើនសេដ្ឋកិច្ចឲ្យបាន ៥% នៅក្នុងឆ្នាំនេះ៕
