ប្រធានាធិបតីអាមេរិក ចូ បៃដិន នឹងប្រកាសពីគម្រោងបង្កើនកញ្ចប់មូលនិធិ ដើម្បីគាំទ្រដល់ប្រទេសកំពុងអភិវឌ្ឍន៍ក្នុងការប្រយុទ្ធប្រឆាំង នឹងបម្រែបម្រួលអាកាសធាតុ និងទប់ស្កាត់ការកាប់បំផ្លាញព្រៃឈើនៅក្នុងព្រៃអាម៉ាហ្សូនរបស់ប្រទេសប្រេស៊ីល អំឡុងពេលកិច្ចប្រជុំមួយកាលពីថ្ងៃព្រហស្បតិ៍ជាមួយមេដឹកនាំមកពីប្រទេសសេដ្ឋកិច្ចធំបំផុតរបស់ពិភពលោក។
យោងតាមការចុះផ្សាយពី Kelo បានបង្ហាញថា លោក បៃដិន នឹងបើកកិច្ចប្រជុំតាមរយៈប្រព័ន្ធអនឡាញសម្រាប់វេទិកាមហាអំណាចសេដ្ឋកិច្ចធំៗ លើប្រធានបទថាមពល និងអាកាសធាតុ ដែលជាផ្នែកមួយនៃកិច្ចខិតខំប្រឹងប្រែងរបស់លោកក្នុងការពង្រឹងការគាំទ្រ សម្រាប់វិធានការប្រយុទ្ធប្រឆាំងនឹងការឡើងកំដៅផែនដី ខណៈវាក៏ជាកិច្ចប្រជុំលើកទី ៤ ក្រោមការដឹកនាំរបស់លោកផងដែរ។
ដោយឡែក សម្រាប់ប្រទេសដែលចូលរួមកិច្ចប្រជុំមួយនេះគឺ គ្រប់គ្រងលើការបំភាយឧស្ម័នផ្ទះកញ្ចក់ប្រហែល ៨០% និង GDP សរុបទូទាំងពិភពលោក។ នេះបើតាមការចុះផ្សាយពីសេតវិមាន។
ដោយឡែក ប្រធានាធិបតីអាមេរិកនឹងប្រកាសពីការចូលរួមថវិកាប្រមាណ ១ពាន់លានដុល្លារ ទៅលើមូលនិធិ Green Climate Fund ដែលផ្ដោតលើគម្រោងថាមពលស្អាត និងភាពធន់នឹងបម្រែបម្រួលអាកាសធាតុក្នុងប្រទេសកំពុងអភិវឌ្ឍន៍ ដែលបង្កើនការរួមចំណែករបស់សហរដ្ឋអាមេរិកទ្វេដង។
បន្ថែមពីនោះ ថ្នាក់ដឹកនាំលោកខាងលិចក៏នឹងប្រកាសពីការចូលរួមទឹកប្រាក់ប្រមាណ ៥០០លានដុល្លារក្នុងរយៈពេល ៥ឆ្នាំ សម្រាប់មូលនិធិ Amazon Fundដែលធ្វើការដើម្បីប្រយុទ្ធប្រឆាំងនឹងការកាប់បំផ្លាញព្រៃឈើនៅអាម៉ាហ្សូនប្រេស៊ីល និងសកម្មភាពពាក់ព័ន្ធ។
សូមជម្រាបដែរថា ប្រទេស និងស្ថាប័នដែលចូលរួមវេទិកាសេដ្ឋកិច្ចសំខាន់ៗរួមមាន អាហ្សង់ទីន អូស្ត្រាលី កាណាដា ឈីលី ចិន អេហ្ស៊ីប គណៈកម្មការអឺរ៉ុប បារាំង អាឡឺម៉ង់ ឥណ្ឌា ឥណ្ឌូនេស៊ី អ៊ីតាលី ជប៉ុន កូរ៉េខាងត្បូង ម៉ិកស៊ិក នីហ្សេរីយ៉ា ន័រវេស អារ៉ាប៊ីសាអូឌីត តួកគី អេមីរ៉ាត់អារ៉ាប់រួម ចក្រភពអង់គ្លេស និងវៀតណាម៕
