នាយករដ្ឋមន្ត្រីវៀតណាម បានអនុម័តលើផែនការសាងសង់រោងចក្រថាមពលតម្លៃប្រមាណ ១៣៤,៧ពាន់លានដុល្លារ ជាមួយក្ដីរំពឹងថានឹងអាចស្រូបយកថវិកាមកវិញរាប់ពាន់លានដុល្លារដូចគ្នា ពីការបណ្ដាក់ទុនផ្ទាល់ពីបរទេស។
យោងតាមការចុះផ្សាយពី CNA បានបង្ហាញថាគម្រោងមួយនេះមានឈ្មោះថា PDP8 ជាមួយគោលបំណងធានាសន្តិសុខថាមពលសម្រាប់ប្រទេសអាស៊ីអាគ្នេយ៍ ខណៈដែលប្រទេសនេះចាប់ផ្តើមការផ្លាស់ប្តូរពីការពឹងផ្អែកខ្លាំងនាពេលបច្ចុប្បន្នរបស់ខ្លួនលើធ្យូងថ្ម ទៅជាការកាត់បន្ថយការបំភាយឧស្ម័នពុលនៅពាក់កណ្តាលសតវត្ស។
ផែនការនេះត្រូវបានពន្យារពេលជាងពីរឆ្នាំ ដោយសារមានជម្លោះផ្ទៃក្នុង និងការងារមានកំណែទម្រង់ដ៏ស្មុគស្មាញ ហើយត្រូវបានគេដឹងថាធ្លាប់ឆ្លងកាត់សេចក្តីព្រាងច្បាប់ជាច្រើន មុនការអនុម័តដោយនាយករដ្ឋមន្ត្រី Pham Minh Chinh ខណៈឥឡូវនេះរង់ចាំតែការវាយត្រាពីរដ្ឋសភាប៉ុណ្ណោះ។
សូមជម្រាបដែរថា វៀតណាមមានបំណងបញ្ឈប់ការប្រើប្រាស់ធ្យូងថ្មទាំងស្រុងត្រឹមឆ្នាំ ២០៥០ ប៉ុន្តែរដ្ឋាភិបាលអះអាងថា ពួកគេចាំបាច់ត្រូវការទឹកប្រាក់ប្រមាណ ៦៥៨ពាន់លានដុល្លារ ដើម្បីសម្រេចផែនការនេះ ខណៈទឹកប្រាក់ប្រហែល ១/៥ នៃចំនួននោះ នឹងត្រូវយកមកប្រើប្រាស់នៅទសវត្សនេះ៕
