នាយកប្រតិបត្តិក្រុមហ៊ុន Tesla លោក Elon Musk នឹងបំពេញទស្សនកិច្ចទៅកាន់ប្រទេសចិន នាសប្ដាហ៍នេះ ខណៈវានឹងក្លាយជាដំណើរទស្សនកិច្ចទៅចិនជាលើកដំបូងក្នុងរយៈពេល ៣ឆ្នាំចុងក្រោយ។ នេះបើតាមការចុះផ្សាយពី CNA។
ប្រភពដដែលបានបន្ថែមថា មហាសេដ្ឋីអាមេរិកនឹងចូលជួបសំណេះសំណាលជាមួយរដ្ឋមន្ត្រីចិនជាន់ខ្ពស់ជាច្រើនរូប ក៏ដូចជានឹងទៅមើលរោងចក្រ Tesla នៅទីក្រុងសៀងហៃផងដែរ ប៉ុន្តែមិនទាន់មានព័ត៌មានលំអិតបញ្ជាក់ថា លោកនឹងជួបអ្នកណា ខណៈប្រធានបទនៃការជជែកនោះ ក៏មិនទាន់បង្ហើបដូចគ្នា។
យ៉ាងណា កាលពីខែមីនាកន្លងទៅសារព័ត៌មាន Reuters បានអះអាងថា Elon Musk គ្រោងបំពេញទស្សនកិច្ចទៅចិន ដើម្បីជួបពិភាក្សាជាមួយនាយករដ្ឋមន្ត្រីចិន Li Qiang ខណៈពេលវេលាគឺស៊ីសងទៅលើកាលវិភាគរបស់នាយករដ្ឋមន្ត្រីចិន។
សូមជម្រាបដែរថា ប្រទេសចិនគឺជាទីផ្សារធំបំផុតទី ២ របស់ក្រុមហ៊ុន Tesla បន្ទាប់ពីអាមេរិក ហើយរោងចក្រនៅសៀងហៃទៀតសោត គឺជាមជ្ឈមណ្ឌលផលិតរថយន្តអគ្គិសនីធមបំផុតរបស់ក្រុមហ៊ុនមួយនេះ៕
