កាលពីពេលថ្មីៗនេះ សមាជិកសភាហ្វីលីពីនបានអនុម័តលើមូលនិធិក្នុងទំហំទឹកប្រាក់ប្រមាណ ៨,៩ពាន់លានដុល្លារ ដើម្បីបង្កើនកំណើនសេដ្ឋកិច្ច និងកាត់បន្ថយភាពក្រីក្រក្នុងប្រទេស។ នេះបើតាមការចុះផ្សាយពី CNA។
មូលនិធិមួយនេះមានឈ្មោះថា Maharlika Investment Fund ដែលមានការចូលរួមយ៉ាងធំធេងពីរដ្ឋាភិបាល និងអូសទាញទឹកប្រាក់បន្ថែមពីធនាគារកណ្ដាល ប្រាក់ចំណូលផ្សេងៗ និងធនាគារគ្រប់គ្រងដោយរដ្ឋចំនួន ២ ទៀត ហើយក៏នឹងមានការរួមចំណែកពីស្ថាប័នហិរញ្ញវត្ថុឯកជន និងសាជីវកម្មផងដែរ បើសិនជាពួកគេចង់ចូលរួម។
គួររំលឹកដែរថា សំណើដើមសម្រាប់មូលនិធិមួយនេះ គឺ ៤,៩ពាន់លានដុល្លារអាមេរិក ដែលនឹងត្រូវដាក់បញ្ចូលក្នុងធនាគារមួយផ្នែក ដោយប្រាក់សោធននិវត្តន៍របស់រដ្ឋសម្រាប់កម្មករក្នុងវិស័យឯកជន និងរដ្ឋាភិបាល ដែលបង្កឱ្យមានការភ័យខ្លាចជាសាធារណៈថា ការសន្សំប្រាក់ចូលនិវត្តន៍អាចប្រឈមនឹងហានិភ័យ។
សូមជម្រាបដែរថា មូលនិធិនេះនឹងត្រូវបានអនុញ្ញាត ឱ្យធ្វើការបណ្តាក់ទុនយ៉ាងទូលំទូលាយ រួមទាំងនៅក្នុងមូលបត្របំណុលសាជីវកម្ម ភាគហ៊ុន បណ្តាក់ទុនរួមគ្នា និងគម្រោងហេដ្ឋារចនាសម្ព័ន្ធផងដែរ៕
