ក្រុមហ៊ុនកាសចរណ៍ Thai Airways International PCL បាននិយាយថា ខ្លួននឹងចាប់ផ្តើមបើកការពិភាក្សាជាមួយក្រុមហ៊ុនផលិតយន្តហោះ ដើម្បីបញ្ជាទិញយន្តហោះធុនធំថ្មីៗចំនួន ៣០ គ្រឿងបន្ថែម នៅពេលពួកគេកំពុងសម្លឹងឃើញពីការងើបឡើងវិញនៃវិស័យទេសចរណ៍ ក្រោយជំងឺរាតត្បាតកូវីដ-១៩ ។ នេះបើតាមការចុះផ្សាយពីសារព័ត៌មាន Bloomberg ។
នាយកប្រតិបត្តិក្រុមហ៊ុន Thai Airways លោក Chai Eamsiri បាននិយាយនៅក្នុងបទសម្ភាសមួយថា ក្រុមហ៊ុនរបស់ខ្លួន នឹងដាក់សំណើជាផ្លូវការមួយ ទៅកាន់ក្រុមហ៊ុនផលិតយន្តហោះខ្នាតយក្ស Airbus SE និង Boeing Co នៅសប្តាហ៍នេះ ជុំវិញការបញ្ជាទិញយន្តហោះថ្មី ដែលខ្លួនរំពឹងថានឹងទទួលបាន ចាប់ពីឆ្នាំ ២០២៦។
គួរឱ្យដឹងថាក្រុមហ៊ុនអាកាសចរណ៍ Thai Airways កំពុងដាក់គម្រោងពង្រីកសេវាកម្មហោះហើររបស់ខ្លួនបន្ថែមទៀត ជាមួយនឹងការទិញយន្តហោះថ្មី និងការជំនួសយន្តហោះចាស់ៗរបស់ខ្លួន ជាមួយនឹងយន្តហោះថ្មី ដែលមានសមត្ថភាពផ្ទុកប្រេងកាន់តែច្រើន នៅចំពេលតម្រូវការធ្វើដំណើរកំពុងកើនឡើងខ្លាំង ។
ជម្រាបជូនផងដែរថា បច្ចុប្បន្នក្រុមហ៊ុនអាកាសចរណ៍ខ្នាតយក្សរបស់ប្រទេសថៃមួយនេះ មានយន្តហោះសរុបចំនួន ៦៥ គ្រឿង បើធៀបនឹងចំនួន ១០៣ គ្រឿង នៅមុនពេលមានជំងឺរាតត្បាតកូវីដ-១៩។ យ៉ាងណាមិញ លោក Chai បាននិយាយទៀតថា ការបញ្ជាទិញយន្តហោះថ្មី រួមជាមួយនឹងយន្តហោះដែលខ្លួនមានស្រាប់ អាចនឹងធ្វើឱ្យក្រុមហ៊ុនរបស់ខ្លួន កើនឡើងចំនួនហោះយន្តលើសពី ១១៣ គ្រឿង នៅឆ្នាំ ២០២៧ ខាងមុខ ៕
