កាលពីពេលថ្មីៗនេះ រដ្ឋាភិបាលចិនបានចេញមុខប្រឆាំងជាមួយនឹងបណ្ដាប្រទេសនៅអឺរ៉ុបមួយចំនួន ដែលបានដាក់ទណ្ឌកម្មបិទក្រុមហ៊ុនខ្នាតយក្ស Huawei និងបានអះអាងថា គណៈកម្មាការអឺរ៉ុប មិនមានមូលដ្ឋាន និងភ័ស្ដុតាងច្បាស់លាស់ សម្រាប់បិទអាជីវកម្មរបស់ Huawei ឡើយ។ នេះបើតាមការចុះផ្សាយពី CNA។
គួររំលឹកបន្តិចថា កាលពីថ្ងៃព្រហស្បតិ៍ ប្រធានឧស្សាហកម្មសហភាពអឺរ៉ុបលោក Thierry Breton បានជំរុញឱ្យបណ្តាប្រទេស EU ជាច្រើនចូលរួមជាមួយប្រទេសទាំង ១០ ដែលបានរឹតបន្តឹង ឬហាមឃាត់ក្រុមហ៊ុន Huawei និង ZTE របស់ចិន ពីបណ្តាញទូរគមនាគមន៍ 5G ដោយលើកឡើងពីហានិភ័យចំពោះសន្តិសុខសមូហភាពរបស់ប្លុកមួយនេះនិងបាននិយាយថា ក្រុមហ៊ុនទាំងពីរក៏នឹងត្រូវបានហាមប្រាមពីកម្មវិធីដែលផ្តល់មូលនិធិដោយសហភាពអឺរ៉ុបផងដែរ។
ចំពោះបញ្ហាមួយនេះ ក្រុមហ៊ុនចិន Huawei ក៏បានចេញមុខបកស្រាយការចោទប្រកាន់មួយនេះថា ជាការចោទគ្មានមូលដ្ឋាន មិនត្រឹមត្រូវ និងគ្មានតម្លាភាពឡើយ។
សូមជម្រាបទៀតថា ប្រតិបត្តិករទូរគមនាគមន៍នៅទូទាំងទ្វីបអឺរ៉ុប បាននឹងកំពុងប្រើប្រាស់ឧបករណ៍ Huawei ព្រោះវាមានតម្លៃថោកជាងគូប្រជែង និងដំណើរការល្អ ដែលធ្វើឲ្យក្រុមហ៊ុនពិបាកជ្រេរកជម្រើសដែលមានតម្លៃធូរថ្លៃជាង Huawei ខ្លាំងណាស់៕
