រដ្ឋមន្ត្រីការបរទេសអាមេរិក Antony Blinken បានសំណូមពរឲ្យប្រធានាធិបតីចិន ដាក់វិធានការព្រមានក្រុមហ៊ុនដែលផ្គត់ផ្គង់អាវុធទៅឲ្យប្រទេសរុស្ស៊ី ខណៈវាដូចជាការបង្ហាញពីការគាំទ្រសង្គ្រាមមួយនេះ។
យោងតាមការចុះផ្សាយពី The Hill បានបង្ហាញថា ក្នុងជំនួបរវាងប្រមុខការទូតអាមេរិក និងលោក ស៊ី ជិនពីង ភាគីអាមេរិកបានសុំឲ្យចិនចាត់វិធានការពេញទំហឹង ចំពោះក្រុមហ៊ុនឯកជន ដែលលក់អាវុធឲ្យរុស្ស៊ី។
“អ្វីដែលពួកយើងកំពុងព្រួយបារម្ភគឺ ក្រុមហ៊ុនឯកជននៅប្រទេសចិនបានផ្ដល់ជំនួយ ដោយខ្លះបែបប្រយោល និងខ្លះទៀតដោយផ្ទាល់ទៅកាន់រុស្ស៊ី ដែលវាប្រៀបដូចជាការបំប៉នកម្លាំងយោធា សម្រាប់ការធ្វើសង្គ្រាមនៅអ៊ុយក្រែន។ នេះគឺជាអ្វីដែលយើងកំពុងបារម្ភជាខ្លាំង ហើយខ្ញុំសុំសំណូមពរឲ្យចិនមានចំណាត់ការខ្ពស់ ចំពោះបញ្ហាមួយនេះ”។ នេះបើតាមសម្ដីរបស់លោក Blinken បាននិយាយ។
សូមជម្រាបដែរថា ចំពោះដំណើរទស្សនកិច្ចដំបូងរបស់រដ្ឋមន្ត្រីការបរទេសអាមេរិក ទៅកាន់ប្រទេសចិនរយៈពេល ៥ឆ្នាំចុងក្រោយ Antony Blinken សម្រេចបានសមិទ្ធផលដ៏ធំមួយ គឺជួបជាមួយប្រធានាធិបតី ស៊ី ជិនពីង ស្របពេលទំនាក់ទំនងរវាងមហាអំណាចទាំង ២ កំពុងមិនមានស្ថិរភាព ខណៈដំណើរទស្សនកិច្ចមួយនេះទៀតសោត ត្រូវបានគេមើលឃើញថា ជាឧបករណ៍វាស់ស្ទង់ទំនាក់ទំនងរវាងអាមេរិក និងចិន៕
