កាលពីថ្ងៃទី ១០ ខែកក្កដាកន្លងទៅ ប្រធានាធិបតីចិន លោក ស៊ី ជិនពីង បានបង្ហើបថា ប្រទេសចិន និងរុស្ស៊ី គួរតែជា “អ្នកតម្រែតម្រង់ផ្លូវដ៏ត្រឹមត្រូវ សម្រាប់កំណែទម្រង់អភិបាលកិច្ចថ្មី” អំឡុងពេលជួបប្រជុំជាមួយឥស្សរជនជាន់ខ្ពស់របស់រុស្ស៊ី អ្នកស្រី Valentina Matviyenko។ នេះបើតាមការចុះផ្សាយពី CNA។
ប្រភពដដែលបន្ថែមថា រដ្ឋាភិបាលទីក្រុងប៉េកាំង និងមូស្គូ បានព្យាយាមរឹតចំណងមិត្តភាព ទាំងផ្នែកសេដ្ឋកិច្ច និងកិច្ចសហប្រតិបត្តិការណ៍នានាក្នុងរយៈពេលប៉ុន្មានឆ្នាំមកនេះ។
ជម្រាបបន្ថែមថា អំឡុងពេលប្រជុំជាមួយប្រធានសភារុស្ស៊ី ប្រធានាធិបតី ស៊ី បាននិយាយថា៖ ការអភិវឌ្ឍន៍ទំនាក់ទំនងរបស់ប្រទេសទាំងពីរគឺជា “ជម្រើសយុទ្ធសាស្ត្រដែលធ្វើឡើង ដើម្បីផលប្រយោជន៍ជាមូលដ្ឋាននៃប្រទេស និងប្រជាជនរៀងៗខ្លួន”។
រំលឹកដែរថា កិច្ចប្រជុំរវាងមេដឹកនាំចិន និងប្រធានសភារុស្ស៊ី គឺធ្វើឡើងចំពេល ថ្នាក់ដឹកនាំលោកខាងលិចបើកកិច្ចប្រជុំណាតូនៅប្រទេសលីទុយអានី ទាក់ទងនឹងអនាគតជាសមាជិកនៃអង្គការណាតូ របស់ប្រទេសអ៊ុយក្រែនផងដែរ៕
