តាមការចុះផ្សាយពីបណ្តាញសារព័ត៌មាន VNExpress បានរាយការណ៍ថា ក្នុងកំឡុងខែមករា មកដល់ខែកក្កដា ប្រទេសវៀតណាមបានទាញចំណូលចូលរដ្ឋខ្លួនបានដល់ទៅ ៤២,៥៣ពាន់លានដុល្លារ ឬស្មើនឹងប្រមាណ ៦២,៧%នៃការប៉ាន់ស្មានប្រចាំឆ្នាំ ខណៈទិន្នន័យនេះធ្លាក់ចុះ ៧,៨%បើធៀបនឹងរយៈពេលដូចគ្នាកាលពីឆ្នាំមុន។
ក្នុងនោះដែរ បើយោងទៅតាមក្រសួងហិរញ្ញវត្ថុរបស់វៀតណាមបាននិយាយថា ក្នុងចំណោម ៦៣ខេត្តក្រុងទូទាំងប្រទេស មានខេត្តក្រុងតែ ៨ប៉ុណ្ណោះមានការកើនឡើងប្រចាំឆ្នាំ ខណៈដែល ៥៥ខេត្តក្រុងផ្សេងទៀតមានការថយចុះ។
ជាមួយគ្នានោះ រដ្ឋមន្ត្រី Ho Duc Phoc បាននិយាយផងដែរថា ប្រភពចំណូលមួយចំនួនបានធ្លាក់ចុះយ៉ាងខ្លាំង រួមមាន ពន្ធការពារបរិស្ថាន ប្រេង សាំង និងពន្ធលើអចលនទ្រព្យជាដើម បានធ្លាក់ចុះជាង ៣៨%និង ៥៣%ពីមួយឆ្នាំទៅមួយឆ្នាំ។
ដោយឡែក ក្រសួងក៏បាននិយាយផងដែរថា រយៈពេល ៧ខែដំបូងនៃឆ្នាំ ២០២៣នេះ ថវិការដ្ឋបានចំណាយដល់ទៅ ៩៥៧ពាន់ពាន់លានដុងឬប្រមាណ ៤៦,១%នៃការប៉ាន់ប្រមាណ ខណៈទិន្នន័យនេះកើនឡើង ១៣,៧%បើធៀបនឹងរយៈពេលដូចគ្នាកាលពីឆ្នាំមុន។
