រដ្ឋសភាថៃ នឹងបោះឆ្នោតជ្រើសរើសនាយករដ្ឋមន្ត្រីថ្មីជាលើកទី៣ នាសប្ដាហ៍ក្រោយ

បន្ទាប់ពីមានការអូសបន្លាយពេលជាយូរ ការបោះឆ្នោតជ្រើសរើសនាយករដ្ឋមន្ត្រីថៃថ្មី ត្រូវបាន​កំណត់ធ្វើឡើងនាថ្ងៃទី ២២ ខែសីហាខាងមុខ។ នេះបើតាមការឲ្យដឹងពីប្រធានសភា លោក Wan Muhamad Noor Matha។

គួររំលឹកដែរថា ការបោះឆ្នោតនាពេលខាងមុខ គឺជាការបោះឆ្នោតលើកទី ៣ ក្នុងការជ្រើសរើសនាយករដ្ឋមន្ត្រីថៃថ្មី ខណៈ ២ លើកកន្លងទៅ ដែលធ្វើឡើងនាថ្ងៃទី ១៣ និង ១៩ ខែកក្កដា ដែលមានបេក្ខភាពតែមួយរូបគត់គឺ លោក ភីថា លីមចារើនរ៉ាត់ មិនទទួលបាន​សម្លេងគាំទ្រគ្រប់គ្រាន់ ពីសមាជិកសភា និងព្រឹទ្ធសភា។

ក្រោយបរាជ័យ ២សារផ្ទួនៗ គណបក្សឆ្ពោះទៅមុខ ក៏ប្រកាសចែកផ្លូវដើរជាមួយគណបក្សភឿថៃ ដែលបច្ចុប្បន្នកំពុងដឹកនាំបក្សចម្រុះ ក្រោមការចូលរួមពី ១១ គណបក្ស ដោយមានលោក Srettha Thavisin ជាបេក្ខភាពឈរឈ្មោះជានាយករដ្ឋមន្ត្រី។

ជាមួយគ្នានោះ ប្រភពជិតស្និទ្ធមួយបានទម្លាយប្រាប់សារព័ត៌មាន Bangkokpost ថា មុនពេលបោះឆ្នោត អាចនឹងមានរឿងនឹកស្មានមិនដល់ ដោយមេបក្ស Palang Prcharath លោកឧត្ដមសេនីយ៍ Prawit Wongsuwon អាចនឹងក្លាយជានាយករដ្ឋមន្ត្រីថ្មីថែមទៀត៕