ដូណាល់ ត្រាំ ក្លាយជាអតីតប្រធានាធិបតីអាមេរិកដំបូងគេ ស្គាល់រសជាតិជាប់ពន្ធនាគារ

អតីតប្រធានាធិបតីអាមេរិក លោក ដូណាល់ ត្រាំ បានបង្កើតប្រវត្តិសាស្ត្រថ្មីទៀតហើយ ដោយបាន​ក្លាយជាអតីតប្រធានាធិបតីអាមេរិក​ដំបូងគេ ស្គាល់រសជាតិជាប់ពន្ធនាគារ និងមានរូបថត មុនបញ្ជូនខ្លួនចូលក្នុងបន្ទប់ឃុំឃាំង។

យោងតាមការចុះផ្សាយពីសារព័ត៌មាន BBC បានបង្ហាញថា លោក ត្រាំ ត្រូវបានបញ្ជូនចូលពន្ធនាគារ Fulton County ប្រមាណ ២០នាទី មុនពេលលោកបង់ប្រាក់ ២០០ ០០០ដុល្លារ ដើម្បីធានានៅក្រៅឃុំ។

គួរជម្រាបដែរថា តុលាការបានចោទប្រកាន់លោករហូតដល់ ១៣ករណី រាប់បញ្ចូលទាំងការចោទ​ថា លោកបញ្ចេញមតិមិនពិត និងបង្កឲ្យមានភាពចលាចល ប៉ុន្តែអតីតប្រធានាធិបតីអាមេរិករូបនេះ ច្រានចោលការចោទប្រកាន់ទាំងនោះ និងអះអាងថា នេះគឺជាអន្ទាក់នយោបាយ ដែលគេរៀបចំមកលើរូបលោកប៉ុណ្ណោះ។

រំលឹកបន្ថែមថា អំឡុងពេលជាប់ពន្ធនាគារនៅ Fulton County ក្រុមប៉ូលិសក៏បាន​ថតរូប និងកត់ត្រា​ពី​ព័ត៌មានផ្ទាល់ខ្លួនរបស់លោក ដូណាល់ ត្រាំ ផងដែរ ដោយបានបញ្ជាក់ថា លោកមានកំពស់ ១៩០,៥សង់ទីម៉ែត្រ និងមានទំងន់ ៩៧គីឡូក្រាម៕