ក្រុមហ៊ុនបច្ចេកវិទ្យាអាមេរិក Apple បានប្រកាសពីការខាតបង់មិនធ្លាប់មាន ពោលតម្លៃហ៊ុនធ្លាក់ចុះ ២ថ្ងៃជាប់គ្នា និងធ្វើឲ្យក្រុមហ៊ុនខាតបង់ទឹកប្រាក់ប្រហែលជិត ២០០ពាន់លានដុល្លារ។
យោងតាមការចុះផ្សាយពីសារព័ត៌មាន BBC បានឲ្យដឹងថា ការខាតបង់ដ៏សម្បើមនេះ គឺកើតឡើងត្រឹមរយៈពេល ២ថ្ងៃប៉ុណ្ណោះ បន្ទាប់ពីរដ្ឋាភិបាលចិនហាមប្រាមមិនឲ្យមន្ត្រីរបស់ខ្លួន យកទូរស័ព្ទ ឬប្រើប្រាស់ iPhone អំឡុងពេលធ្វើការ។
ជាមួយគ្នានោះគេហទំព័រ Bloomberg ក៏បានរាយការណ៍បន្ថែមថា ការហាមប្រាមសារនេះ អាចនឹងប្រើជាមួយបុគ្គលិកក្រុមហ៊ុន និងភ្នាក់ងារទាំងអស់ ដែលគ្រប់គ្រងដោយរដ្ឋាភិបាលថែមទៀតផង។
គួររំលឹកដែរថា ជុំវិញមូលហេតុនៃការហាមប្រាមនេះ គឺអាចជាការសងសឹកទៅលើរដ្ឋាភិបាលអាមេរិក ដែលបានដាក់គំនាបទៅលើក្រុមហ៊ុនបច្ចេកវិទ្យាចិន TikTok ខណៈចិនក៏មានបំណងចង់កាត់បន្ថយការពឹងផ្អែក ទៅលើបច្ចេកវិទ្យាអាមេរិកផងដែរ។
សូមជម្រាបបន្ថែមថា ចិនគឺជាទីផ្សារធំបំផុតទី៣ របស់ក្រុមហ៊ុន Apple ដែលអាចរកចំណូលឲ្យក្រុមហ៊ុនយក្សអាមេរិក បានប្រហែល ១៨% នៃប្រាក់ចំណូលសរុបរបស់ក្រុមហ៊ុនមានតម្លៃថ្លៃបំផុតលើលោក៕
