ការជួញដូរភាគហ៊ុនរបស់ក្រុមហ៊ុន China Evergrande ត្រូវបានផ្អាក កាលពីថ្ងៃព្រហស្បតិ៍ បន្ទាប់ពីមានរបាយការណ៍ថា ប្រធានក្រុមហ៊ុនរបស់ខ្លួន កំពុងស្ថិតនៅក្រោមការឃ្លាំមើលពីក្រុមប៉ូលិស យ៉ាងយកចិត្តទុកដាក់ជាទីបំផុត។ នេះបើតាមការចុះផ្សាយពីសារព័ត៌មាន Reuters ។
ការជួញដូរភាគហ៊ុន ដែលបានចុះនៅក្នុងបញ្ជីទីផ្សារហ៊ុននៅហុងកុង រួមទាំងសេវាកម្មអចលនទ្រព្យ និងអង្គភាពរថយន្តអគ្គិសនី ត្រូវបានផ្អាកទាំងស្រុង កាលពីថ្ងៃព្រហស្បតិ៍ម្សិលមិញ ពោលគឺបន្ទាប់ពី Evergrande ទើបតែបានចាប់ផ្តើមបន្តការជួញដូរហ៊ុនរបស់ខ្លួនឡើងវិញប៉ុណ្ណោះ កាលពីនៅចុងខែសីហាកន្លងទៅ បន្ទាប់ពីផ្អាករយៈពេល ១៧ខែ។
ជុំវិញការផ្អាកនេះ បានកើតឡើង បន្ទាប់ពីសារព័ត៌មាន Bloomberg កាលពីថ្ងៃពុធ បានរាយការណ៍ថា លោក Hui Ka Yan ដែលជាស្ថាបនិកក្រុមហ៊ុន Evergrande ត្រូវបានប៉ូលិសចិនធ្វើការឃាត់ខ្លួនកាលពីដើមខែនេះ ហើយកំពុងត្រូវបានតាមដាន នៅទីតាំងសំងាត់មួយ។
ប្រភពដដែលនេះ បាននិយាយទៀតថា រហូតមកដល់ពេលនេះ មិនទាន់មានព័ត៌មានជាក់លាក់ណាមួយ បញ្ជាក់ពីការឃាត់ខ្លួនរបស់មហាសេដ្ឋីចិនម្នាក់នេះឡើយ ដោយគ្រាន់តែដឹងថា មេធំ Evergrande កំពុងស្ថិតក្រោមការតាមដានពីក្រុមប៉ូលិសប៉ុណ្ណោះ។
សូមជម្រាបដែរថា កន្លងមករដ្ឋាភិបាលចិនធ្លាប់បន្ទោសលោក Hui ដែលធ្វើឲ្យវិស័យអចលនទ្រព្យនៅចិនធ្លាក់ក្នុងរណ្ដៅ ខណ:នៅសប្តាហ៍នេះ ក្រុមហ៊ុន Evergrande ក៏បានចេញមុខបញ្ជាក់ថាមិនមានលទ្ធភាពក្នុងការសងបំណុលថ្មីបាននោះឡើយ ដោយសារតែមានការស៊ើបអង្កេតទ្រង់ទ្រាយធំមកលើក្រុមហ៊ុនបុត្រសម្ព័ន្ធរបស់ខ្លួន ដែលជាហេតុធ្វើឱ្យមានភាពស្មុគស្មាញកាន់តែខ្លាំង ដល់ផែនការរៀបចំរចនាសម្ព័ន្ធឡើងវិញ ដែលត្រូវបានស្នើឡើងនាពេលកន្លងមក៕
