សមាជិកព្រឹទ្ធសភាជាច្រើនរូប ស្នើសុំឲ្យរដ្ឋបាលប្រធានាធិបតី ចូ បៃដិន ហាមឃាត់ការធ្វើដំណើរទៅប្រទេសចិន

សមាជិកព្រឹទ្ធសភាមកពីគណបក្សសាធារណរដ្ឋចំនួន ៥រូប ដែលដឹកនាំដោយលោក Marco Rubio កាលពីចុងសប្តាហ៍មុន បានស្នើសុំឲ្យរដ្ឋបាលរបស់ប្រធានាធិបតី លោក ចូ បៃដិន ហាមឃាត់ការធ្វើដំណើររវាងសហរដ្ឋអាមេរិក និងប្រទេសចិន បន្ទាប់ពីមានករណីជំងឺផ្លូវដង្ហើមកើនឡើងខ្លាំង ក្នុងប្រទេសនៅតំបន់អាស៊ីមួយនេះ។ នេះបើតាមការចុះផ្សាយពីសារព័ត៌មាន Reuters។

លិខិតមួយដែលបានចុះហត្ថលេខាដោយលោក Rubio ដែលជាសមាជិកសភាជាន់ខ្ពស់នៃគណៈកម្មាធិការស៊ើបការណ៍ព្រឹទ្ធសភា រួមជាមួយនឹងសមាជិកព្រឹទ្ធសភាផ្សេងទៀតដូចជាលោក J.D. Vance , Rick Scott, Tommy Tuberville និង Mike Braun បាននិយាយថា ៖ ” យើងគួរតែដាក់កម្រិតជាបន្ទាន់នូវការធ្វើដំណើររវាងសហរដ្ឋអាមេរិក និងចិន រហូតដល់យើងអាចដឹងបន្ថែមអំពីគ្រោះថ្នាក់ដែល​បង្ក​ឡើងដោយជំងឺថ្មីនេះ”។

ការកើនឡើងនៃចំនួនករណីចំពោះជំងឺឆ្លងថ្មីនេះ បានក្លាយជាបញ្ហាសកលធំមួយកាលពីសប្តាហ៍មុន នៅពេលដែលអង្គការសុខភាពពិភពលោក បានស្នើសុំឲ្យប្រទេសចិនផ្តល់ជូនព័ត៌មានបន្ថែម ជុំវិញរបាយការណ៍ស្តីពីចង្កោមនៃប្រភេទជំងឺរលាកផ្លូវដង្ហើម ដោយបានកើតឡើងជាពិសេសទៅលើកុមារ។

ជុំវិញបញ្ហានេះ មន្ត្រីរដ្ឋបាលលោក បៃដិន បានចេញមុខឆ្លើយតបវិញថា សហរដ្ឋអាមេរិកកំពុងតាមដានយ៉ាងដិតដល់នូវការកើនឡើងនៃករណីជំងឺផ្លូវដង្ហើម នៅក្នុងប្រទេសចិន ដោយបានបន្ថែមថានៅពេលនេះ ពុំមានសញ្ញាណាមួយបង្ហាញថាមានករណីណាមួយកំពុងកើតឡើងនៅក្នុងនាយកដ្ឋានសង្គ្រោះបន្ទាន់របស់សហរដ្ឋអាមេរិកនៅឡើយនោះទេ។

ទន្ទឹមនឹងនេះ អ្នកនាំពាក្យស្ថានទូតចិនប្រចាំទីក្រុងវ៉ាស៊ីនតោន លោក Liu Pengyu ក៏បានចេញមុខឆ្លើយតបទៅនឹងលិខិតរបស់លោក Rubio វិញផងដែរថា ៖”ការអះអាងដែលពាក់ព័ន្ធចំពោះករណីនេះ គឺជាការប្រឌិតដោយចេតនាសុទ្ធសាធ។ ហើយរដ្ឋាភិបាលចិន នឹងធ្វើការប្រឆាំងយ៉ាងម៉ឺងម៉ាត់ជាទីបំផុត” ៕