ក្រុមហ៊ុន Meta Platforms បានឡើងដល់ចំណុចកំពូលជាថ្មី ជាក្រុមហ៊ុនមានតម្លៃថ្លៃបំផុតមួយនៅលើលោក ប្រមាណ ១ទ្រីលានដុល្លារ បន្ទាប់ពីតម្លៃហ៊ុនរបស់ក្រុមហ៊ុនខ្នាតយក្សមួយនេះកើនឡើងកប់ក្ដោង។
យោងតាមការចុះផ្សាយពីសារព័ត៌មាន CNBC បានបង្ហាញថា ក្រុមហ៊ុន Meta ធ្លាប់ឡើងដល់ចំណុចកំពូលនេះម្ដង កាលពីខែកញ្ញាឆ្នាំ២០២១ ដោយកាលនោះក្រុមហ៊ុនមហាសេដ្ឋី ស្ថិតនៅក្រោមឈ្មោះ Facebook នៅឡើយ។
ប៉ុន្មានខែចុងក្រោយនេះ ក្រុមហ៊ុន Meta ធ្វើបានល្អខ្លាំងណាស់ ពោលប្រាក់ចំណូលប្រចាំត្រីមាសកើនឡើងជាលំដាប់ ខណៈតម្លៃភាគហ៊ុនក៏បន្តកើនឡើងឥតឈប់ឈរ ដោយសារតែគម្រោងអភិវឌ្ឍបច្ចេកវិទ្យា AI របស់ពួកគេ កំពុងទទួលបានការបណ្ដាក់ទុនច្រើន។
ជម្រាបបន្ថែមថា គិតត្រឹមថ្ងៃទី២៦ ខែមករានេះ ក្រុមហ៊ុន Meta Platforms ឈរនៅលេខរៀងទី០៧ ជាក្រុមហ៊ុនមានតម្លៃថ្លៃបំផុតលើលោក ប្រមាណ ១,០១ទ្រីលានដុល្លារ ដោយក្រុមហ៊ុន Microsoft ស្ថិតនៅកំពូលតារាង មានតម្លៃ ៣,០០៩ទ្រីលានដុល្លារ និងក្រុមហ៊ុន Apple មានតម្លៃ ៣,០០២ទ្រីលានដុល្លារ។ នេះបើតាមទិន្នន័យផ្ដល់ឲ្យដោយគេហទំព័រ Companiesmarketcap៕
