ក្រុមហ៊ុនខ្នាតយក្ស China Evergrande បានប្រកាសកាលពីថ្ងៃទី២៥ ខែមករាថា ក្រុមហ៊ុនបុត្រសម្ព័ន្ធមួយរបស់ពួកគេគឺ Hengda Real Estate Group Yuedong នឹងលក់ភាគហ៊ុនទាំងស្រុងនៅក្នុងក្រុមហ៊ុន Shantou Hengmeng Property Development ក្នុងតម្លៃប្រហែល ១៣៧,៦លានយ៉ន់ ឬប្រមាណ ១៩,២លានដុល្លារ។
យោងតាមការចុះផ្សាយពីសារព័ត៌មាន Reuters បានបង្ហាញថា ក្រុមហ៊ុនបុត្រសម្ព័ន្ធរបស់ China Evergrande មួយនេះ មានភាគហ៊ុនប្រមាណ ៦៥% នៅក្នុងក្រុមហ៊ុន Shantou Hengmeng។
ជាមួយគ្នាគេហទំព័រ SCMP ក៏បានរាយការណ៍ដែរថា ក្រុមហ៊ុន Evergrande រំពឹងទទួលបានប្រាក់រហូតដល់ ៣០៤លានយ៉ន់ ពីការលក់មួយនេះ ដើម្បីយកទៅទូទាត់បំណុលប្រមាណ ៣៧៦លានយ៉ន់ ដែលជំពាក់ក្រុមហ៊ុន Shantou Hengyao Property Development។
រំលឹកបន្តិចថា ក្រុមហ៊ុន China Evergrande ដែលបានប្រកាសពីបំណុលដ៏ច្រើនមហាសាលកាលពីឆ្នាំ២០២១ កំពុងប្រឈមនឹងការបញ្ជាពីតុលាការឲ្យរំលាយក្រុមហ៊ុន បើសិនជាមិនមានលទ្ធភាពសងបំណុល ស្របពេលសេចក្ដីសម្រេចនឹងត្រូវប្រកាសនាពេលឆាប់ៗខាងមុខ៕
